NA SAME 111 - Ai Vola Tabu Ena Vakavakadewa Vou

Me Laveti na Cakacaka Talei ni Kalou

¹ Ni vakacaucautaki Jiova! Au na vakavinavinaka vei Jiova ena yaloqu taucoko, Ena nodra soqoni na nona tamata.

² Sa uasivi dina na veika sa cakava ko Jiova! O ira kece era taleitaka era gadreva me ra kila.

³ Sa sinai na veika e cakava ena lagilagi kei na veika vakaturaga; Sa sega ni mudu na nona loloma.

⁴ Sa sega ni dau laiva ko Jiova me da guilecava na nona cakacaka veivakurabuitaki, Sa yalovinaka ga ka dauloloma o koya.

⁵ Sa solia na kedra era rerevaki koya; A sa sega ni guilecava o koya na nona veiyalayalati.

⁶ Sa vakaraitaka o koya na nona kaukauwa vei ira na nona tamata Ena nona solia vei ira na nodra vanua na kai tani.

⁷ Sa yalodina ka dodonu o koya ena veika kecega e cakava; Sa vakadinadinataki na nona veivakaro kecega.

⁸ Era na tudei tu ga ka sega ni mudu Era sa solia ena yalodina kei na yalododonu.

⁹ Sa kauta mai na veivakabulai vei ira na nona tamata Ka cakava e dua na veiyalayalati tawa mudu vata kei ira. Sa yalosavasava ka qaqa o koya!

¹⁰ Na sala ni vuku sai koya na rerevaki Jiova, Era sa yalomatua o ira kecega era muria na nona i vakaro. Me vakacaucautaki ga o koya ka sega ni mudu.