NA SAME 11 - Ai Vola Tabu Ena Vakavakadewa Vou

Sere ni Noda Nuitaka na Kalou

Vua na i liuliu ni sere. A nei Tevita.

¹ Au sa vakadinata Jiova ni o ni na taqomaki au, A cava o ni kaya kina vei au, “Dro ki na veiulunivanua me vaka na manumanu vuka,

² Baleta ni ra sa dreta na wa ni nodra dakaititi na tamata ca Ka ra vakadodonutaka na nodra gasau Me ra vanai ira na tamata vinaka ena butobuto.

³ Na cava ena cakava rawa e dua na tamata dodonu kevaka sa vakarusai na yavu?”

⁴ Sa tiko ko Jiova, Ena nona i tikotiko vakatui mai lomalagi. Sa wanonovi ira tiko mai na tamata kecega, Ka sa kila vinaka na veika era cakava.

⁵ Sa dikevi ira ruarua na yalododonu kei na i valavala ca. Ka sa cata na tamata i tovo ca ena yalona taucoko.

⁶ Ena vakatauca na bukawaqa kei na sulifure vei ira na tamata ca, Ka vota vei ira na cava rerevaki me kedra i totogi.

⁷ Sa yalododonu ko Jiova ka taleitaka na i tovo vinaka; O ira sa talairawarawa vua era na tiko ga e matana.