NA SAME 102 - Ai Vola Tabu Ena Vakavakadewa Vou

A Masu ni Kere Veivuke Vua na Tui ni Sautu

A masu ni tamata ni sa rarawa, ni sa luluvu na lomana, ka sa tukuna yani na ka e rarawa kina ena mata i Jiova.

¹ Kemuni Jiova, ni vakarorogo ki na noqu masu, Ka rogoca na noqu kerekere!

² Ni kakua ni vunitaki kemuni vei au, Ena gauna au sa leqa tu kina! Ni rogoci au, Ka sauma mai vakatotolo na noqu masu, ni'u masu yani vei kemuni.

³ Sa takali yani na noqu veisiga me vaka na kubou; Sa kama na yagoqu me vaka na buka.

⁴ Au sa mokuti sobu me vaka na co madu, Ka'u sa sega ni garova mai na kakana.

⁵ Au sa vutugu vakadomoilevu, Sa kabita na suiqu na kuliqu ena kequ lila

⁶ Au sa vaka e dua na manumanu vuka kila ena vanua dravuisiga, Ka vaka e dua na lulu ena veivanua sa rusa tu,

⁷ Au sa davo ka yadra koto; Ka'u sa vaka e dua na manumanu vuka sa tiko taudua ena dua na dela ni vale.

⁸ Era sa vakasewasewani au na kequ meca ena veisiga taucoko, O ira era vakalialiai au era sa vakayagataka na yacaqu me ka ni veivakamadualaki.

⁹ Ni na kequ kakana na dravusa me vaka na madrai, Ka sa veiwaki na wai ni mataqu kei na mequ gunu,

¹⁰ Baleta na nomuni cudru waqawaqa, Ni o ni a tauri au cake ka viritaki au tani.

¹¹ Na noqu bula sa vaka na i yaloyalo ni bogi; Ka'u sa vaka na co madu.

¹² Ia, oi kemuni Jiova, o ni sa Tui ka sega ni mudu; Era na nanumi kemuni na veitabatamata kecega.

¹³ O ni na tucake ka lomani Saioni, Sa yaco mai na gauna me lomani kina; Sa kena gauna dodonu sara ga oqo!

¹⁴ Era sa lomani Saioni na nomuni tamata, Dina ga ni sa vakarusai, Era sa lomani Saioni dina ga ni sa rusa tu.

¹⁵ Era sa rerevaki Jiova na veimatanitu, Era na rerevaka na nona kaukauwa na tui kecega e vuravura.

¹⁶ Sa na tarai Saioni vou tale ko Jiova, Ena vakaraitaka o koya na nona cecere.

¹⁷ Ena rogoci ira na nona tamata sa biu laivi tu, Ka rogoca na nodra masu.

¹⁸ Vola na veika sa cakava ko Jiova me baleti ira na veitabatamata e muri, Me ra na vakacaucautaki koya kina na tamata era sa bera ni sucu.

¹⁹ Sa rai sobu mai ko Jiova mai na nona i tikotiko tabu mai cake, Sa rai sobu mai ki vuravura mai lomalagi,

²⁰ Me rogoca na nodra vutugu na tamata era sa vesu tu, Ka sereki ira era sa lewai me ra mate.

²¹ Ia, era na tusanaka na tamata na yaca i Jiova mai Saioni, Ka ra na vakavinavinaka vua o ira mai Jerusalemi,

²² Ni ra sa soqo vata mai na veimatatamata, Kei na veimatanitu, me ra sokalou vei Jiova.

²³ Sa vakamalumalumutaki au ko Jiova ni'u se gone ga; Sa vakalekalekataka o koya na noqu bula.

²⁴ Kemuni na noqu Kalou, ni kakua ni kauti au tani oqo Ni'u se bera ni qase sara. I Jiova, o ni na bula tikoga ka sega ni mudu,

²⁵ O ni a bulia na vuravura ena gauna makawa sara, Ka cakava sara ga na lomalagi ena ligamuni.

²⁶ Era na takali kece yani, ia o ni na qai vo taudua ga; Era na madra kece yani me vaka na i sulu, Ka takali yani,

²⁷ Ia, o ni sai koyakoya tikoga, Ka na sega ni mudu rawa na nomuni bula.

²⁸ Era na bula tikoga na luvedra na nomuni tamata, Ka ra na taqomaki na nodra kawa ena ruku ni nomuni veitaqomaki.