Marika 7 - Ai Vola Tabu Ena Vakavakadewa Vou

Na Nodra i Vakavuvuli na Qase

¹ Ia ni ra sa soqoni vata yani vei Jisu na Farisi kei ira eso na daunilawa ka ra lako mai Jerusalemi,

² era qai raica ni ratou sa kana tiko eso vei iratou na nona tisaipeli ka sega tu ni savasava na ligadratou, o ya ni ratou a se sega ni vuluvulu mada e liu.

³ (O ira na Farisi, ka vakakina o ira na vo ni Jiu, era sa dau muria na i nodra i vakavuvuli na nodra qase me vakaoqo: era na sega mada ni kana kevaka era se bera ni savata na ligadra ena i valavala ni vuluvulu e vakavulici vei ira;

⁴ ka ra na sega talega ni kania e dua na i voli mai na makete kevaka era sega mada ni vakasavasavataka e liu; ka vuqa tale na i valavala ni bula era sa muria me vaka na i valavala ni kena sava na bilo, kei na kuro, kei na beseni parasa, kei na i davodavo.)

⁵ Era sa qai tarogi koya na Farisi kei na daunilawa, ka kaya, “Na cava e ratou sega kina ni muria na nomu tisaipeli na nodra i vakavuvuli na neimami qase, ni ratou sa kana ka sega mada ni vuluvulu?”

⁶ Sa qai kaya vei ira ko Jisu, “Sa dina sara o Aisea ena nona vosa ni parofisai me baleti kemuni! O ni sa tamata dauveivakaisini vakaidina, me vaka sa vola vakaoqo o koya: ‘Era sa vakarokorokotaki au na tamata oqo ena tebenigusudra, Ia na yalodra sa yawa sara mai vei au.

⁷ Sa sega ni yaga na nodra qaravi au, Ni ra sa vakatavuvulitaka na i vakavuvuli ni tamata Me vaka era sa lawa ni Kalou!’

⁸ “O ni sa biuta na i vakaro ni Kalou, ka taura matua na i vakavuvuli ni tamata.”

⁹ Sa qai kaya vei ira ko Jisu, “O ni sa rui maqosataka na nomuni biuta vakatikitiki na i vakaro ni Kalou me rawa kina na nomuni taurivaka tikoga na nomuni i vakavuvuli makawa!

¹⁰ Ni a vakarota vakaoqo o Mosese, ‘Vakarokoroko vei rau na tamamu kei na tinamu,’ ka a kaya talega, ‘O koya e vosa vakacacataka na tamana se na tinana, me vakamatei.’

¹¹ Ia o ni sa kaya, ‘Kevaka e kaya e dua na tamata vua na tamana se tinana, Na veika e noqu ka a nanumi mo taura me yaga vei iko e sa Koripani’ (a kena i balebale, a sa soli tu vua na Kalou),

¹² o ni sa qai tarovi koya kina me kakua ni cakava tale e dua na ka me yaga vua na tamana se tinana.

¹³ Ena ka oqo, sa vakatawayagataka kina na vosa ni Kalou na nomuni i vakavuvuli sa vakadewataki sobu mai. Sa levu sara na veika vakaoqo o ni sa vakayacora.”

Na Ka e Vakadukadukalitaka na Tamata

¹⁴ Sa qai kacivi ira tale yani na tamata ki vua ko Jisu, ka kaya vei ira, “Ni rogoci au kece mada, ka mo ni kila:

¹⁵ sa sega ni dua na ka ena taudaku ni tamata ka sa curu ki na loma ni tamata me vakavuna na nona vakadukadukalitaki. Ia na veika ga e lako mai lomana sa vakavuna na nona tawasavasava.

¹⁶ Kevaka o ni sa vakadaligana, ia mo ni rogoca sara.”

¹⁷ Ena gauna sa biuti ira kina na lewe vuqa ka curu yani ki vale, e ratou sa qai tarogi koya na nona tisaipeli me baleta na vosa vakatautauvata o ya.

¹⁸ Sa qai kaya vei iratou o koya, “Dou sa sega beka ni kila oi kemudou? Sa sega ni dua na ka mai taudaku sa curu ki na tamata me na vakavuna na nona tawasavasava,

¹⁹ baleta ni sa sega ni curu ki yalona, ia ki ketena ga, ka na la'ki lako tani sara ki tuba.” (Sa vakaraitaka kina vakaoqo ko Jisu ni sa savasava na kakana kecega.)

²⁰ Sa qai kaya o koya, “Na ka e lako mai na loma ni tamata sai koya na ka e vakadukadukalitaki koya.

²¹ Ni sa dau lako mai loma, mai na yalo ni tamata, na veivakanananu ca, na dauyalewa, na daubutako, na daulaba, na veibutakoci,

²² na kocokoco, na i valavala velavela, na veivakaisini, na gagano ca, na vuvu na vosa vakacaca, na viavialevu, na i valavala lialia.

²³ Era lako mai loma na veika ca kecega oqo, ka ra vakadukadukalitaka na tamata.”

Na Nona Vakabauta e Dua na Yalewa

²⁴ Sa qai biuta na vanua o ya ko Jisu ka sa lako yani ki na yasayasa vaka-Taia kei Saitoni. A sa curu ki na dua na vale ka sega ni vinakata me dua e kila, ia sa sega ga ni rawa ni tiko vuni e kea.

²⁵ A sa rogoca na kena i tukutuku e dua na yalewa ka curumi yalo velavela tiko na luvena goneyalewa. Sa qai lako na yalewa o ya ka la'ki cuva e yavana.

²⁶ E kai matanitu tani na yalewa oqo, ka sa sucu ena yasayasa vaka-Finisia mai Siria. A sa qai vakamasuti Jisu me vakasava tani na tevoro mai vua na luvena yalewa.

²⁷ Ia sa qai kaya vua ko Jisu, “Me liu taumada na nodra vakani na gone. Sa sega sara ni dodonu me tauri na kedra na gone ka viritaki yani vei ira na koli.”

²⁸ A sa sauma na yalewa, ka kaya, “Sa dina saka oqori, ia o ira na koli ena ruku ni teveli era sa kania na i vovo ni kedra na gone!”

²⁹ Sa qai kaya vua ko Jisu, “Ena vuku ni vosa oqori, mo lesu tale ki vale, o na la'ki kunea ni sa biuta na luvemu na tevoro!”

³⁰ Sa qai lako na yalewa ki na nona vale, ka raica na luvena ni davo koto ena i davodavo; ka sa biuti koya vakaidina na tevoro.

Sa Vakabula ko Jisu e Dua na Tamata Didivara ka Galu

³¹ Sa qai biuta na yasayasa vaka-Taia ko Jisu me lako ki Kalili ena sala vaka ki Saitoni kei na Veikoro e Tini.

³² Era a qai kauta mai vua e dua na tamata didivara ka dredre tu ni vosa, ka ra kerei koya me tabaki koya e ligana.

³³ Ia ni sa kauti koya tani vakatikitiki mai vei ira na lewe vuqa ko Jisu, sa qai tara na daligana ruarua ena nona i qaqalo, ka kasivi, ka tara na yamena.

³⁴ Sa qai tacake ki lomalagi, ka sa vutugu na yalona ka kaya vua, “Efaca!” (a kena i balebale, “Mo tadola mai!”).

³⁵ Sa qai rogo rawa sara na daligana ka tasere na yamena, ka sa macala na nona vosa.

³⁶ Sa qai vakaroti ira ko Jisu me ra kakua ni tukuna vua e dua na tamata; ia na kena levu ga ni nona vakatabuya, na kena levu talega ni nodra veitukuniyaka.

³⁷ Era sa kurabui vakalevu sara o ira kecega era sa rogoca, ka ra kaya, “Na ka kece sara e cakava e caka vakavinaka! Era sa bau mai rogo rawa na didivara ka ra vosa na galu ena nona cakacaka!”