Maika 1 - Ai Vola Tabu Ena Vakavakadewa Vou

¹ Sa tu ena i vola oqo na i tukutuku i Jiova sa tukuna vei Maika na kai Moreseci ena gauna e ratou tui Juta kina o Jocame, o Easi kei Esekaia. Sa vakaraitaka vei Maika ko Jiova na veika oqo me baleti Samaria kei Jerusalemi.

Sa Tagicaki o Samaria kei Jerusalemi

² Ni rogoca oqo, na veivanua kecega: Ni vakatudaliga, oi kemuni kece na kai vuravura! Ena beitaki kemuni na Turaga ko Jiova. Rogoca! Sa vosa mai o koya mai na nona vale tabu.

³ Sa lako mai ko Jiova mai na nona i tikotiko tabu; Ena siro sobu mai ka lako voli ena dela ni veiulunivanua.

⁴ Era na qai waicala e rukuna na veiulunivanua Me vaka na dago ni kadrala ena bukawaqa; Era na qai sovaraki sobu ki na veiqakilo Me vaka na tasova sobu ni wai mai na delana.

⁵ Na ka kecega oqo ena yaco baleta ni ra sai valavala ca ka dauvorata na Kalou o ira na Isireli. O cei me na beitaki vua na nodra talaidredre na Isireli? O Samaria ga, na koro turaga! O cei sa vakadinadinataka na cala ni qaravi kalou matakau mai Juta? O Jerusalemi ga!

⁶ O koya oqo sa mani kaya kina ko Jiova, “Au na vukici Samaria me vaka na i rusarusa ni koro e tu ena dua na vanua lala, ka rauta ga me vanua ni tei vaini. Au na sovaraka sobu ki na qakilo na yavuyavu ni ka sa kama ka rusa mai na koro levu oqo, ka me qai vo wale sara ga na yavu ni koro.

⁷ Na nodra veivakatakarakara talei ka voli dredre ena koro era na vorovorolaki vakamatailalai, na veika kece sa soli vei ira na bete ni burekalou ena kama laivi me ra rusa vakadua, kei na nodra i vakatakarakara kece sara ena yaco me dua na i rusarusa ni koro sa bini cake tu. Sa tu vei Samaria na veika kece oqo me rawa ni vuavuai kina, ia era sa na kauta tani yani na kedra meca me nodra na bete ni burekalou ena veivanua tale eso.”

⁸ A sa qai kaya o Maika, “Ena vuku ni ka oqo, au sa na vakaloloku ga ka tagicaka. Au na veilakoyaki voli ka'u na sega ni vakaivava se vakaisulu me'u vakaraitaka kina na noqu rarawa. Au na tagi me vaka na jekeli ka tagiyaso me vaka na ositeriji.

⁹ Ni sa sega ni maca rawa na mavoa i Samaria, na mavoa vata vakaoqo sa vakarau yacovi Juta; ni sa yaco mai na veivakarusai ki na veimatamata ni koro e Jerusalemi, na koro era sa tiko kina na noqu tamata.”

Era sa Torovi Jerusalemi na Meca

¹⁰ Ni kakua ni tukuna vei ira mai Kaca na ka e baleta na noda sa vakamalumalumutaki; ni kakua ni vakalaiva me ra raica ni o ni sa tagi. Oi kemuni na kai Peci Leafira, ni qiqi voli ga ena kuvu ni soso me vakaraitaki kina na nomuni yaluma!

¹¹ Oi kemuni na kai Safiri, ni lako ga yani vakabobula ka luvawale kei na madua. O ira era tiko mai Sianani me ra se kakua ni lako tani mai na nodra koro. Ni o ni sa rogoca ni ra sa vakaloloku na kai Peci-eseli, o ni sa na kila sara ni sa sega mai kea na vanua me i drodro.

¹² Era sa veidoloyaki ena mosi na kai Meroca; ka ra sa gadreva vakalevu na veivuke, baleta ni sa volekati Jerusalemi tiko yani na veivakarusai i Jiova.

¹³ Kemuni na kai Lakisi, ni vesuka vata na nomuni ose ki na kedra qiqinivalu. O kemuni o ni a vakamurimuria na nodra i valavala ca na Isireli, ka sa vakavuna kina me valavala ca o Jerusalemi.

¹⁴ O koya oqo, oi kemuni na Juta, mo ni solia kina na nomuni ka ni loloma ni vakamoce ena gauna oqo ki na koro o Mereseci Kaca. O ira na tui e Isireli era na sega sara ni vukei mai na koro o Akasipi.

¹⁵ Kemuni na kai Maresa, ena soli kemuni ko Jiova ki vua e dua na kemuni meca, o koya ena qai taura vakaukauwa na nomuni koro. Ena qai dro na dauveiliutaki e Isireli ka la'ki vuni ena qara vatu mai Etulama.

¹⁶ Kemuni na kai Juta, ni kotiva vakadua sara na ulumuni me kedra i loloku na luvemuni o ni daulomani ira. Ni cakava sara mo ni ulu cou me vaka na ikeli baleta ni ra sa na kau tani mai vei kemuni o ira na nomuni gone.