Maciu 14 - Ai Vola Tabu Ena Vakavakadewa Vou

Na Mate i Joni na Dauveipapitaisotaki

¹ Ena gauna o ya, sa qai rogoca o Eroti na tui na i tukutuku kei Jisu;

² ka qai kaya vei iratou na nona turaga, “Oqo o Joni na Dauveipapitaisotaki, sa vakaturi cake tale mai na mate; sai koya ga sa cakava kina na veika mana oqo.”

³ Ni a sa tauri Joni mada o Eroti, ka vesuki koya ena valeniveivesu ena vuku i Erotiasa, na wati Filipe na tacina,

⁴ ni a kaya vua o Joni, “Sa sega sara ni dodonu vei iko mo tauri koya.”

⁵ E dina ga ni a via vakamatei koya sara, ia sa rerevaki ira ga na tamata ni ra nanuma tu ni parofita o Joni.

⁶ Ena soqo ni siga ni sucu i Eroti, a sa meke ena matadra kece na tamata era tiko kina na luve i Erotiasa yalewa. Sa ka levu na marau i Eroti

⁷ ka sa vosa ni yalayala kina vua ka kaya, “Au sa yalataka me'u na solia vei iko na ka ga o vinakata!”

⁸ Ni sa vakatura cake mai o tinana, sa qai kaya, “Mo ni solia mai vei au na ulu i Joni na Dauveipapitaisotaki ena dua na veleti ena gauna sara ga oqo!”

⁹ Sa qai rarawa na tui, ia ena vuku ga ni vosa bubului sa cavuta e matadra na nona vulagi, sa mani lewa ga me vakayacori na nona kerekere.

¹⁰ A sa talatala yani me tamusuki na ulu i Joni ena valeniveivesu,

¹¹ ka me kau mai na uluna ena dua na veleti ka mai soli vua na goneyalewa, ka la'ki solia sara na goneyalewa vei tinana.

¹² E ratou sa qai lako mai na tisaipeli i Joni ka kauta na yagona, ka buluta; ka ratou sa qai la'ki tukuna vei Jisu.

Sa Vakani Ira na Lewe Levu ko Jisu

¹³ Ni sa rogoca ko Jisu, sa qai soko lo tani mai kea ena dua na waqa ki na dua na vanua lala, ia ni ra sa rogoca na lewe vuqa era sa qai taubale e vanua ka muri koya mai na veikoro.

¹⁴ Ni sa sobu yani e matasawa ko Jisu ka raica na levu ni tamata, a sa tubu vakalevu na nona lomani ira, ka sa vakabulai ira era sa tauvimate.

¹⁵ Ni sa yakavi mai, e ratou sa qai lako mai vua na nona tisaipeli, ka kaya, “Oqo na vanua lala, ka sa kala na siga; mo ni vakatalai ira na lewe vuqa, ka me ra bau lako ki na veikoro lalai ka volia kina na kedra.”

¹⁶ Ia, sa qai kaya vei iratou ko Jisu, “E sega ni yaga me ra lako, dou solia oi kemudou eso na ka me ra kania.”

¹⁷ E ratou sa qai kaya vua, “E sega ni tu eke vei keitou e dua na ka, ia e lima walega na i buli madrai kei na rua na ika.”

¹⁸ Sa qai kaya ko Jisu, “Dou kauta mai vei au.”

¹⁹ Ni sa vakaroti ira oti na lewe vuqa me ra tiko sobu ena veico, a qai taura o koya na i buli madrai e lima kei na ika e rua, ka tacake ki lomalagi, ka vakavinavinaka, ka dovidovia na madrai ka solia vei iratou na nona tisaipeli, ka ratou tauca yani na tisaipeli vei ira na lewe vuqa.

²⁰ Era sa qai kana kece ka mamau. Eratou sa qai kumuna vata na tisaipeli e tinikarua na basikete sisinai ena i vovo ni kakana.

²¹ E rauta ni ra lewe 5,000 na tagane era sa kana oqo, ka sega ni okati kina o ira na yalewa kei ira na gone.

Lako Voli e Dela ni Wai ko Jisu

²² Sa qai vakaroti iratou sara na nona tisaipeli me ratou vodoka na waqa, ka liu yani ki tai kadua, ni sa vakasukai ira tiko mada na lewe vuqa o koya.

²³ Ni sa vakatalai ira yani na lewe vuqa, sa qai cabe taudua o koya ki na veidelana me masu.

²⁴ Ni sa yakavi mai sa tiko duadua ga o koya e kea. Ia na waqa sa tiko yawa sara yani mai vanua, ka suaigelegele sara ena ua, ni saqati iratou tiko yani na cagi.

²⁵ Ena maliwa ni tolu kei na ono ena mataka, e sa qai lako mai vei iratou ko Jisu, ka lako voli mai e dela ni wai.

²⁶ Ni ratou sa raici koya na tisaipeli ni sa lako voli e dela ni wai, e ratou sa rere vakalevu, ka kaya, “E dua na yalo!” E ratou sa qoqolou ni ratou sa rere.

²⁷ A sa mani vosa yani kina vei iratou ko Jisu, ka kaya, “Dou vakacegu! Sa i au ga. Dou kakua ni rere!”

²⁸ Sa qai vosa vua o Pita ka kaya, “Kemuni na Turaga, kevaka sai kemuni dina oqori, ni vakaroti au me'u lako yani vei kemuni e dela ni wai.”

²⁹ A sa kaya yani ko Jisu, “Lako mai!” Sa qai kalawa sobu mai waqa o Pita ka tekivu me lako e dela ni wai kivei Jisu.

³⁰ Ia ni sa raica na kaukauwa ni cagi, sa qai rere ka vakatekivu me lutu sobu ki loma ni wai, ka sa qai kacivaka yani, “Kemuni na Turaga, ni vakabulai au!”

³¹ A dodoka yani vakatotolo na ligana ko Jisu ka tauri koya, ka kaya vua, “Tamata lailai na nomu vakabauta! Na cava tale o vakatitiqa kina?”

³² Ia ni rau sa vodo ki waqa, sa ruru na cagi.

³³ E ratou sa qai lako mai na tiko e waqa ka mai cuva vua, ka kaya, “Sa i kemuni dina ga na Luve ni Kalou.”

Sa Vakabulai Ira na Tauvimate mai Kenisereti ko Jisu

³⁴ Ni ratou sa lako ki tai kadua, e ratou sa yaco yani ki na vanua o Kenisereti.

³⁵ Era sa kilai koya o ira na tamata mai na vanua o ya, ka ra sa qai talatala ki na yasayasa kecega e vakavolivolita, me ra kauta mai vei koya na tauvimate kecega.

³⁶ Era sa kerei koya me ra bau tara walega na tutu ni nona i sulu; ia, o ira kecega era tara, era sa vakabulai.