Luke 6 - Ai Vola Tabu Ena Vakavakadewa Vou

Na Taro me Baleta na Siga ni Vakacecegu

¹ Ena dua na Siga ni Vakacecegu, a sa lako voli ko Jisu ena dua na veiloga ni sila. E ratou sa qai tekivu doloka eso na sola ni sila na nona tisaipeli, ka qilia e ligadratou, ka kania.

² Era sa qai taroga eso na Farisi, “A cava dou sa cakava kina na ka e sa tukuna na neimami Lawa ni sega ni dodonu me vakayacori ena Siga ni Vakacecegu?”

³ A sa qai sauma vei ira ko Jisu vakaoqo, “O ni a sega beka ni wilika na ka sa cakava o Tevita ni sa viakana o koya kei iratou na nona tamata?

⁴ E a curu o koya ki na vale ni Kalou, ka taura ka kania na madrai tabu (na ka e sega ni vakatarai me kania e dua, ka sega ni bete), ka solia talega vei ira era lako vata tiko.

⁵ Sa qai kaya tale vei ira ko Jisu, “Na Luve ni Tamata sai koya na Turaga ni Siga ni Vakacecegu.”

Na Tamata Liga Mate

⁶ Ena dua tale na Siga ni Vakacecegu sa curu ki na valenilotu ko Jisu ka vakatavuvuli kina. E a tiko kina e dua na tamata sa mate tu na ligana i matau.

⁷ Era sa qai vakaraici koya na daunilawa kei ira na Farisi, se na veivakabulai ena Siga ni Vakacecegu se sega, me rawa ni ra kunea kina e dua na ka me ra beitaki koya kina.

⁸ Ia sa kila na nodra vakanananu ko Jisu, sa qai kaya vua na tamata liga mate, “Tu cake, mai tucake tu e lomadonu eke.” Sa qai duri cake o koya ka la'ki tucake tu e kea.

⁹ Sa qai kaya vei ira ko Jisu, “Au tarogi kemuni mada: sa tara beka me caka na ka vinaka ena Siga ni Vakacecegu se na ka ca, na veivakabulai se na veivakamatei?”

¹⁰ Sa qai vakawadravi ira wavoki kecega o koya, ka kaya vua na tamata tauvimate, “Dodoka mai na ligamu.” A sa kitaka vakakina o koya, ka sa vakabulai sara na ligana.

¹¹ Era sa qai cudru vakalevu sara, ka ra veivosaki vakai ira se cava me ra cakava vei Jisu.

Sa Digitaki Iratou na i Apositolo e Tinikarua ko Jisu

¹² Ena gauna o ya, a sa lako cake ko Jisu ki na ulunivanua me la'ki masu, ka a masu tiko vua na Kalou ena bogi taucoko.

¹³ Ni sa siga na vanua, sa qai kacivi ira vata yani ki vua na nona tisaipeli, ka sa digitaka mai vei ira e lewe tinikarua, ka vakatokai iratou na i apositolo:

¹⁴ o Saimoni (o koya ka sa vakayacana me o Pita) vata kei Adriu na tacina; o Jemesa kei Joni, o Filipe kei Pacolomiu,

¹⁵ o Maciu kei Tomasi, o Jemesa na luve i Alifio, kei Saimoni (sa vakatokai na Gugumatua),

¹⁶ kei Jutasa na luve i Jemesa, kei Jutasa Isikarioti, o koya ka a qai bukiveretaki koya.

Sa Veivakatavulici ka Veivakabulai ko Jisu

¹⁷ Sa qai lako vata sobu ko Jisu kei iratou na nona apositolo kei na dua na i wase levu ni nona tisaipeli; ka la'ki tu ena dua na vanua buca. Era a lewe vuqa sara na tamata mai Jutia taucoko kei Jerusalemi, kei na baravi kei Taia kei Saitoni era lako yani kina me ra rogoci koya, ka vakabulai talega mai na kedra mate.

¹⁸ O ira talega era dau vakaleqai mai vei ira na yalo velavela era sa vakabulai.

¹⁹ Era a saga kecega na lewe vuqa me ra tarai koya, ka ni sa taka tiko mai vua na kaukauwa mana ka ra sa vakabulai kece kina.

Na Kalougata kei na Kalouca

²⁰ Sa qai raici iratou cake na nona tisaipeli ko Jisu ka kaya: “Dou sa kalougata, oi kemudou sa dravudravua; Ni sa nomudou na matanitu ni Kalou!

²¹ Dou sa kalougata, oi kemudou sa viakana edaidai; Ni dou na vakamamautaki! Dou sa kalougata, oi kemudou sa tagi edaidai, Ni dou na dredre!

²² “Dou sa kalougata ni ra sa cati kemudou na tamata, ni ra wasei kemudou tani mai na nodra i soqosoqo, ka vakasewasewani kemudou, ka vakarogocataka na yacamudou ena vuku ni Luve ni Tamata!

²³ Dou reki ni sa yaco na veika o ya, ka meke ena marau, baleta ni sa ka levu na kena i sau vei kemuni mai lomalagi; ni ra a kitaka vakakina na nodra qase vei ira na parofita.

²⁴ “Ia dou na kalouca oi kemudou sa vutuniyau edaidai; ni dou sa tovolea oti na bula e rawarawa!

²⁵ “Dou na kalouca oi kemudou sa mamau tu edaidai; ni dou na qai viakana mai! Dou na kalouca oi kemudou sa dredre tiko edaidai; ni dou na qai rarawa ka tagi!

²⁶ “Dou na kalouca oi kemudou sa ciqoma rawa oqo na vosa vinaka; o ira na nodra qase era a kitaka vakakina me baleti ira na parofita vakailasu.

Na Nodra Lomani na Meca

²⁷ “Ia au sa kaya vei kemuni sa vakarogoci au tiko: Lomani ira na kemuni meca, caka vinaka vei ira sa cati kemuni,

²⁸ vosa vakalougatataki ira era vosacataki kemuni, ka masulaki ira era vakalolomataki kemuni.

²⁹ Kevaka sa sabica na balumu e dua, vagolea talega vua na kena i karua, ka kakua ni bureitaka na nomu sote vei koya sa kauta na nomu kote.

³⁰ Mo solia vei ira kece era mai kerekere vei iko na ka era vinakata, ka kakua ni taroga tale na nomu i yau vei koya sa kauta tani.

³¹ Mo ni vakayacora vei ira na tamata me vaka na ka o ni sa vinakata me ra vakayacora vei kemuni na tamata.

³² “Kevaka o ni dau lomani ira ga era lomani kemuni, a cava mo ni vakalougatataki kina? Ni o ira sara tale mada ga na tamata i valavala ca era dau kitaka vakakina.

³³ Ia kevaka o ni caka vinaka vei ira ga era caka vinaka vei kemuni, a cava mo ni vakalougatataki kina? Ni ra sa dau kitaka talega vakakina na tamata i valavala ca.

³⁴ Kevaka o ni dau soli i lavo vei ira ga o ni nuitaka ni o ni na rawata tale mai kina na i lavo, a cava mo ni vakalougatataki kina? O ira talega na tamata i valavala ca era dau veisolisoli vakai ira me ra na qai taura lesu tale na ka e tautauvata kei na ka era a solia.

³⁵ Ia mo ni dau lomani ira na nomuni meca, ka caka vinaka ga, ka dau solia na ka, ka sega ni namaka e dua na ka mo ni rawata tale mai kina; ena qai levu kina na kena i sau vei kemuni, ka mo ni na qai luve i Koya sa Cecere Sara; ni sa dau lomasoli o koya vei ira era sega ni dau vakavinavinaka, kei ira era dau nanumi ira ga vakai ira.

³⁶ Mo ni dau yalololoma me vaka sa dau yalololoma na Tamamudou.

Na Vakalewai Ira na Tani

³⁷ “Mo ni kakua ni dau veivakalewai, ena qai sega ni lewai kemuni na Kalou; mo ni kakua ni dau veibeitaki, ena qai sega ni beitaki kemuni na Kalou; mo ni dau veivosoti, ka na qai vosoti kemuni na Kalou.

³⁸ Mo ni dau solisoli, ena qai solia ga vei kemuni na Kalou. Sa dina sara ni o ni na ciqoma na nomuni i votavota sa sinai vutuvutu, e dua na ka ni veivuke loloma sa sovaraki ki na ligamuni — na kena levu ga o ni rawa ni taura. Na i vakarau o ni dau vakayagataka vei ira na tani sai koya na i vakarau vata ga ena vakayagataka vei kemuni na Kalou.”

³⁹ Sa qai cavuta vei ira e dua na vosa vakatautauvata ka kaya: “E rawa li vua na mataboko me tubera na mataboko? E rau na sega beka ni lutu ruarua ki na i keli?

⁴⁰ E sega ni dua na tisaipeli me uasivi cake vua na nona qasenivuli, ia o koya yadua sa vakaotia vakavinaka na nona vuli sa na qai tautauvata kei na nona qasenivuli.

⁴¹ “Na cava o raica ga kina na mala ni kau ena mata ni wekamu ka sega ni raica rawa na tolo ni kau e tiko e matamu?

⁴² Se o na kaya rawa vakacava vua na wekamu, ‘Na wekaqu, me'u leuta tani mada na mala ni kau e tiko e matamu,’ ia o iko o sega tiko mada ga ni raica na tolo ni kau ka tiko ga e matamu? Tamata dauveivakaisini, mo biuta tani mada na tolo ni kau mai na matamu o na qai rai vinaka mo leuta tani kina na mala ni kau ena matai na wekamu.

Na Kau kei na Vuana

⁴³ “Ni sa sega ni dua na kau vinaka me vuataka na vua ca, se na kau ca me vuataka na vua vinaka.

⁴⁴ Ni sa kilai ga na kau yadua ena vuana. E sega ni dau veti na lolo mai na wa vakavotona, se veti na qerepi mai na soni.

⁴⁵ Sa dau kauta mai na ka vinaka na tamata vinaka mai na lololo vinaka ni lomana, ka dau kauta mai na ka ca na tamata ca mai na lololo ca ni lomana; ni sa dau vosataka na gusuna na ka sa sinai kina na lomana.

E Rua na Dautara Vale

⁴⁶ “Na cava o ni vakatokai au kina me, ‘Turaga, Turaga,’ ka sega ni muria na noqu vosa?

⁴⁷ O koya yadua e lako mai vei au ka rogoca na noqu vosa ka cakava, au na vakaraitaka vei kemuni na tamata e rau tautauvata kaya.

⁴⁸ Sa tautauvata o koya kei na dua na tamata, ni sa tara na nona vale, a sa kelikeli vakatitobu ka vakayavutaka na vale ena dela ni vatu. Sa qai yaco mai na waluvu, ka sa coka vakaukauwa na dobui ka tabaka ena vale o ya, ia sa sega ga ni yavalati rawa ni sa tara tu vakavinaka.

⁴⁹ Ia o koya sa rogoca ka sega ni cakava sa tautauvata kei na tamata sa tara e dua na nona vale ka qai sega ni cakava na yavu ni vale. Ni sa sotava na waluvu na vale o ya, sa qai bale sara kina, ka sa ka levu na rusa ni vale o ya!”