Luke 4 - Ai Vola Tabu Ena Vakavakadewa Vou

Na Veretaki i Jisu

¹ Sa sinai tu ko Jisu ena Yalo Tabu ni sa lesu tale mai na Joritani. A sa vakauti koya na Yalo Tabu ki na loma ni vanua lala,

² ena vanua ka veretaki koya kina na tevoro ena loma ni 40 na siga. A sega ni bau kania e dua na ka ena veisiga o ya o koya, ka sa qai viakana ni sa oti na ka kece o ya.

³ Sa qai kaya vua na tevoro, “Kevaka o sa Luve ni Kalou dina, mo kaya mada me vuki na vatu oqo me i buli madrai.”

⁴ Sa qai kaya vua ko Jisu, “Sa volai tu, ‘Ena sega ni bula na tamata ena madrai duadua ga.’ ”

⁵ Sa qai kauti koya cake na tevoro ki na dua na vanua cecere ka vakaraitaka vua na veimatanitu kecega e vuravura ena dua vata ga na tiki ni gauna.

⁶ Sa qai kaya vua na tevoro, “Au na solia vei iko na lewa ni ka kecega oqo kei na kedra lagilagi, ni ra sa soli oti tu vei au, ka'u sa dau solia vei ira yadua sa lomaqu me'u solia vei ira.

⁷ Ena nomu na veika kece oqo kevaka o na cuva ka vakarokoroko vei au.”

⁸ Sa qai sauma ko Jisu ka kaya vua, “Sa volai ena i Vola Tabu, ‘Mo vakarokoroko vua na Turaga na nomu Kalou ka qaravi koya duadua ga!’ ”

⁹ Sa qai kauti koya ki Jerusalemi na tevoro ka vakaturi koya ena taba ni Valenisoro e cake sara, ka kaya vua, “Kevaka o sa Luve ni Kalou, mo rika sobu mada eke,

¹⁰ ni sa volai ena i Vola Tabu, ‘Ena vakaroti ira na nona agilosi o koya ena vukumu me ra taqomaki iko.’

¹¹ Sa volai talega, ‘Era na tabei iko cake ena ligadra de tavutu na yavamu ena dua na vatu.’ ”

¹² Sa qai sauma ko Jisu ka kaya vua, “Sa tukuna vakaoqo na vosa ni Kalou, ‘Mo kakua ni vakatovolea na Turaga na nomu Kalou.’ ”

¹³ Ia ni sa vakaotia na tevoro na nona veitemaki kecega, sa qai biuti koya me yacova e dua tale na gauna e muri.

Sa Vakatekivutaka na Nona Cakacaka mai Kalili ko Jisu

¹⁴ Sa mani lesu tale ko Jisu ena kaukauwa ni Yalo Tabu ki Kalili, ka sa rogovaki yani na kena i tukutuku ki na veivanua kece ka tu vakavolivolita.

¹⁵ A sa veivakatavulici ena nodra veivalenilotu, ka ra sa vakalagilagi koya kecega.

Era Besetaki Jisu mai Nasareci

¹⁶ Sa qai yaco ko Jisu ki Nasareci, ena koro ka a susugi kina, ka la'ki curu ki na valenilotu, me vaka sa dau nona i vakarau, ena vei Siga ni Vakacecegu. Sa mani tucake me wili vola,

¹⁷ ka sa soli vua na i vola i Aisea na parofita. Sa qai tevuka na i vola vivigi ka kunea na tikina oqo:

¹⁸ “Sa tu vei au na Yalo ni Turaga, Ni sa lumuti au o koya me'u vunautaka na i tukutuku vinaka vei ira na dravudravua. Sa talai au me'u vunautaka na veisereki vei ira sa vesuki, kei na rai tale vei ira na mataboko; Me ra lako ena galala o ira sa dauraici sobu,

¹⁹ Me'u kacivaka ni sa yaco mai oqo na gauna Me vakabulai ira kina na nona tamata na Turaga.”

²⁰ Sa qai viviga na i vola ka solia tale vua e dau maroroya, ka dabe sobu; ka sa coba vakadua vua na matadra kece era tiko e valenilotu.

²¹ Sa qai kaya vei ira o koya, “Edaidai, sa vakayacori kina na tiki ni Vola Tabu oqo o ni sa rogoca.”

²² Era a vakacaucautaki koya kece, ka ra kurabuitaka na vosa vinaka e basika mai gusuna, ka ra kaya, “E sega li ni o koya oqo na luve i Josefa?”

²³ Sa qai kaya vei ira o koya, “Io, o ni na cavuta kina vei au na i vosavosa oqo, ‘Vuniwai, mo vakabulai iko mada; na veika kece keimami sa rogoca ni o dau cakava mai Kapenaumi, cakava talega ena nomu vanua oqo!’ ”

²⁴ Sa kaya talega ko Jisu, “Au sa kaya vakaidina vei kemuni, sa sega ni dua na parofita me vinakati ena nona koro.

²⁵ “Ia me'u tukuna vakadodonu sara vei kemuni, era a lewe vuqa tu na yada e Isireli ena gauna i Ilaijia, ni a sogo tu na lomalagi me sega kina ni tau na uca ena tolu na yabaki ka ono na vula, ka a dausiga vakalevu na vanua taucoko;

²⁶ ia sa sega ni talai o Ilaijia vua e dua vei ira, ki vua ga e dua na yada mai Sarifaci ena yasayasa vaka-Saitoni.

²⁷ Era a lewe vuqa talega na vukavuka e Isireli ena gauna i Ilaisa na parofita, ia e sega ni dua vei ira sa bau vakasavasavataki, o Neamani ga na kai Siria.”

²⁸ Ia ni ra sa rogoca tiko na veika oqo o ira kece ena valenilotu era sa cudru sara.

²⁹ Era sa qai tucake mai ka dretaki koya ki na i bili ni koro, ka kauti koya cake ki na bati ni delana e tara toka kina na nodra koro me ra la'ki biligi koya sobu ena bari ni vatu.

³⁰ Ia sa mani curu maliwai ira ga o koya ka lako tani sara.

Na Tamata ka Curumi Yalo Velavela

³¹ Sa qai gole sobu ko Jisu ki Kapenaumi, e dua na koro mai Kalili, ka vakatavuvuli kina ena Siga ni Vakacecegu,

³² ka ra sa kurabui sara ena nona i vakavuvuli, ni sa vosa me vaka sa nona ga na lewa.

³³ E a bau tiko talega ena valenilotu e dua na tamata e curumi koya tiko e dua na tevoro se yalo velavela. Sa qai kaila mai o koya ena domo levu ka kaya,

³⁴ “Oilei! I Jisu na kai Nasareci, na cava o sa vinakata vei keimami? O sa lako beka mai mo vakarusai keimami? Au sa kilai iko: o iko na nona Le Dua Yalosavasava na Kalou!”

³⁵ A sa qai vakarota na yalo ko Jisu, “Mo galu, ka lako tani mai vua!” A sa viritaka sobu ki ra na tamata o ya o koya na tevoro ena kedra maliwa, a sa lako tani sara mai vua ka sega ni vakamavoataki koya.

³⁶ Era sa qoroqoro kecega ka veivosaki vakai ira ka kaya, “Na mataqali vosa vakacava beka oqo? Sa vakaroti ira na yalo velavela na tamata oqo ena kaukauwa mana kei na sau, ka ra sa lako tani mai!”

³⁷ Sa qai kuruvaki na kena i rogorogo ki na veiyasana kecega e vakavolivolita na vanua o ya.

Sa Vakabulai Ira na Lewe Vuqa ko Jisu

³⁸ A sa biuta mai na valenilotu ko Jisu ka la'ki curu ki na vale i Saimoni. E a tauvi katakata sara tiko vakaukauwa na tina i wati Saimoni, ka ratou sa mani tukuna vua.

³⁹ Sa qai la'ki tu e tikina ko Jisu, ka vakarota me lako tani mai vua na katakata, ka sa yali sara yani na tauvimate. Sa tucake sara o koya ka qaravi iratou.

⁴⁰ Ni sa dromu sobu tiko na siga, era sa qai lako yani vei Jisu na tamata ka kauti ira yani na dui wekadra ka tauvi ira tu na veimataqali mate e vuqa; a sa tabaki ira yadudua ena ligana o koya ka vakabulai ira kece sara.

⁴¹ Era sa lako tani talega na tevoro mai vei ira e lewe vuqa, era sa qoqolou ka kaya, “Sa i kemuni na Luve ni Kalou!” A sa qai vakaroti ira na tevoro ko Jisu, ka sega ni vakatara me ra vosa, baleta ni ra sa kila ni sai koya na Mesaia.

Na Vunau i Jisu ena Veivalenilotu

⁴² Ia ni sa kida na mataka, sa lako o koya ki na dua na vanua lala. Era sa qai vakasaqarai koya o ira na tamata, ka ra mani yaco sara vua, ka via tarovi koya me kakua ni laivi ira.

⁴³ Ia sa mani kaya vei ira o koya, “E dodonu me'u vunautaka talega na i tukutuku vinaka ni matanitu ni Kalou ena veikoro tale eso, ni sai koya oqo na i naki ni noqu talai mai.”

⁴⁴ A sa vunau voli o koya ena veivalenilotu e Jutia.