Luke 3 - Ai Vola Tabu Ena Vakavakadewa Vou

Na Vunau i Joni na Dauveipapitaisotaki

¹ Ena i katinikalima ni yabaki sa veiliutaki tiko kina na tui (Sisa) o Tiperiu, a kovana tiko mai Jutia o Ponitio Pailato, ka i liuliu mai Kalili o Eroti, ka i liuliu mai Ituria kei na vanua o Tirakoniti o Filipe na tacina, ka i liuliu mai Apilini o Laisenia,

² donuya ni rau bete levu tiko o Anasa kei Kaiava, sa qai yaco na vosa ni Kalou vei Joni na luve i Sakaraia ena vanua lala.

³ Sa qai lako o koya ki na veivanua taucoko e tiko volekata na Joritani, ka vunautaka voli me ra papitaiso o ira sa veivutuni me bokoci kina na i valavala ca,

⁴ me vaka sa volai tu ena i vola i Aisea na parofita, “Na domona e dua sa kacikaci voli ena loma ni vanua lala: Ni caramaka na sala ni Turaga, Cakava me dodonu na nona gaunisala.

⁵ Ena buluti me cere i cake na buca kecega, Ka na talaraki sobu na veiulunivanua kei na veidelana kecega. Ka na vakadodonutaki na veika veve, Ka na vakalogalogavinakataki na veisala sukusukura;

⁶ Era na raica talega na veivakabulai ni Kalou na tamata kecega.”

⁷ Sa qai kaya kina o Joni vei ira na lewe vuqa ka ra lako yani me papitaisotaki ira o koya, “Oi kemuni na kawa ni gata, o cei sa qai vakasalataki kemuni mo ni dro tani mai na cudru sa bera tiko mai?

⁸ Ni vakaraitaka na nomuni veivutuni, ena nomuni cakacaka ka kakua ni tekivu mo ni veikayaka vakai kemuni, ‘Na tama i keimami o Epara-ama.’ Ni'u sa kaya vei kemuni, sa rawa vua na Kalou me vakatubura na luve i Epara-ama mai na veivatu oqo.

⁹ Sa toka sara ga oqo na matau ena veivunikau; ka sa tatalaki sobu tiko kina na kau kecega era sega ni vuataka na vua vinaka, ka ra biu ki na bukawaqa.”

¹⁰ Era sa qai tarogi koya na lewe vuqa ka kaya, “Ia na cava me keimami cakava?”

¹¹ Sa qai sauma ka kaya vei ira, “O koya e rua na nona sote me solia e dua vua e sega na nona; o koya e tu vua na kakana me kitaka vaka talega kina.”

¹² Era sa qai lako talega yani na daukumuna na i vakacavacava me ra papitaisotaki, ka ra kaya vua, “Na i Vakavuvuli, na cava me keimami cakava?”

¹³ Sa qai kaya vei ira o koya, “Ni kakua ni taura na ka e levu cake mai na ka e vakaroti vei kemuni.”

¹⁴ O ira talega na sotia era sa tarogi koya, ka kaya, “Na cava me keimami cakava?” Sa qai kaya vei ira o koya, “Ni kakua ni taura vakaukauwa na i lavo mai vua e dua na tamata se beitaki koya vakailasu. Ni kakua talega ni didivaka na kemuni i sau.”

¹⁵ A sa tekivu me tubu cake na nodra vakanuinui na tamata, ka tekivu me ra vakataroga e lomadra de sai koya li na Mesaia o Joni.

¹⁶ Sa qai vosa kina o Joni ka kaya vei ira kecega, “Au sa papitaisotaki kemuni ena wai, ia sa lako tiko mai o koya e levu cake vei keirau, ka sega mada ga ni rauti au me'u sereka na wa ni nona i vava. Ena papitaisotaki kemuni o koya ena Yalo Tabu kei na buka.

¹⁷ Sa taura tu e ligana o koya na nona i sivi ni sila, me vakasavasavataka na sila ena nona rara ni qaqi sila ka binia vata mai na sila ki na nona lololo, ka na qai vakama na qana ena buka sa sega ni bokoci rawa.”

¹⁸ A vunautaka na i Tukutuku Vinaka o Joni ena vuqa na sala, ka vakauqeti ira kina na tamata me ra veivutuni.

¹⁹ Ia o Eroti, na i liuliu, o koya ka a vunauca o Joni ena vuku i Erotiasa na wati Filipe na tacina, kei na vuku ni veika ca kecega sa cakava oti o koya;

²⁰ sa qai vakuria sara na nona ca ena nona biuti Joni ki na valeniveivesu.

Na Papitaisotaki i Jisu

²¹ Ni ra sa papitaisotaki na tamata, sa papitaisotaki talega ko Jisu. Ia ni sa masu tiko o koya sa qai wase rua na lomalagi,

²² ka sa lako sobu mai vua na Yalo Tabu, me vaka na ruve, ka sa rogo mai e dua na domo mai lomalagi, ka vaka, “Sa i iko na Luvequ lomani e duabau ga. Au sa dau vinakati iko vakalevu.”

Na i Tubutubu i Jisu

²³ Ni sa tekivutaka na nona cakacaka ko Jisu, sa yabaki tolusagavulu, ka a kainaki voli ni o koya e luve i Josefa, na luve i Ili,

²⁴ na luve i Macati, na luve i Livai, na luve i Meliki, na luve i Janai, na luve i Josefa,

²⁵ na luve i Mataceia, na luve i Emosi, na luve i Neumi, na luve i Esili, na luve i Nakai,

²⁶ na luve i Maaci, na luve i Mataceia, na luve i Semei, na luve i Josefa, na luve i Juta,

²⁷ na luve i Joanani, na luve i Risa, na luve i Serupepeli, na luve i Salacieli, na luve i Niri,

²⁸ na luve i Meliki, na luve i Ati, na luve i Kosami, na luve i Elimotama, na luve i Eri,

²⁹ na luve i Josua, na luve i Iliesa, na luve i Jorima, na luve i Macati, na luve i Livai,

³⁰ na luve i Simione, na luve i Jutasa, na luve i Josefa, na luve i Jonami, na luve i Elaiakimi,

³¹ na luve i Melea, na luve i Menani, na luve i Mataca, na luve i Necani, na luve i Tevita,

³² na luve i Jese, na luve i Opeti, na luve i Poasa, na luve i Salimoni, na luve i Nasoni,

³³ na luve i Amenatave, na luve i Atamini, na luve i Erami, na luve i Eseroma, na luve i Peresi, na luve i Juta,

³⁴ na luve i Jekope, na luve i Aisake, na luve i Epara-ama, na luve i Tera, na luve i Neori,

³⁵ na luve i Seruki, na luve i Rekau, na luve i Peleki, na luve i Eperi, na luve i Sela,

³⁶ na luve i Keinana, na luve i Arivakisati, na luve i Semi, na luve i Noa, na luve i Lemeki,

³⁷ na luve i Meciusela, na luve i Inoke, na luve i Jereti, na luve i Maleli, na luve i Kenana,

³⁸ na luve i Inosi, na luve i Seci, na luve i Atama, na luve ni Kalou.