Luke 22 - Ai Vola Tabu Ena Vakavakadewa Vou

Na Bukiveretaki i Jisu

¹ A sa voleka mai na gauna ni Solevu ni Madrai Sega ni Vakatubu, ka sa vakatokai na Lakosivia.

² Era sa rerevaki ira voli na tamata o ira na bete levu kei ira na daunilawa, ka ra sa vakasaqara e dua na sala me ra vakamatei Jisu kina.

Sa Vakadonuya o Jutasa me na Vakatakilai Jisu

³ Sa qai curu o Setani ki na loma i Jutasa, o koya ka yacana talega o Isikarioti, a sa dua vei ira na lewe tinikarua.

⁴ A lako o koya ka veivosaki kei ira na bete levu kei ira na i liuliu ni ovisa ni Valenisoro se me na vakatakilai Jisu vakacava vei ira.

⁵ Era sa marau sara ka ra yalataka vua na i lavo.

⁶ Sa mani vakadonuya o koya, ka sa vakasaqara e dua na gauna vinaka, ni ra yali tu na lewe vuqa, me na vakatakilai Jisu kina vei ira.

Sa Vakarau Kania ko Jisu na Kakana ni Lakosivia

⁷ Sa qai yaco mai na siga ni Solevu ni Madrai Sega ni Vakatubu, na gauna ka dau vakamatei kina na lami me baleta na kakana ni Lakosivia.

⁸ Sa qai talai Pita kei Joni o koya, ka kaya, “Drau la'ki vakarautaka na kakana ni Lakosivia me datou kania.”

⁹ E rau sa kaya vua, “E vei o ni vinakata me keirau la'ki vakarautaka kina?”

¹⁰ Sa qai kaya vei rau o koya, “Drau raica, ni drau sa curu ki na koro, drau na sota kaya e dua na tamata e cola tiko e dua na saqa wai; drau muri koya ki na vale e la'ki curu kina.

¹¹ Ka mo drau kaya vua na i taukei ni vale, ‘E tukuna mai na i Vakavuvuli, me tukuni vei kemuni e vei na tiki ni vale me keitou kania kina na kakana ni Lakosivia kei iratou na noqu tisaipeli?’

¹² Ena qai vakaraitaka vei kemudrau e dua na rumu levu ena i taba vale e cake sa vakaiyaya tu; drau la'ki vakarau kina.”

¹³ E rau sa mani lako ka raica me vaka sa tukuna o koya vei rau, ka rau a vakarautaka sara na kakana ni Lakosivia.

Na i Vakayakavi ni Turaga

¹⁴ Ia ni sa yaco mai na kena gauna, sa tiko sobu ko Jisu, kei iratou na i apositolo me ratou kana.

¹⁵ Sa qai kaya vei iratou, “Au sa gadreva vakalevu me'u kania vata kei kemudou na kakana ni Lakosivia oqo ni bera na noqu vakararawataki!

¹⁶ Au sa kaya oqo vei kemudou, au na sega tale ni kania me yacova na gauna sa vakaraitaki kina na kena i balebale taucoko ena Matanitu ni Kalou.”

¹⁷ Sa qai taura na bilo ko Jisu, ka vakavinavinaka vua na Kalou, ka sa qai kaya, “Taura oqo ka vota ena kemudou maliwa.

¹⁸ Au sa kaya vei kemudou ni tekivu oqo ka lako yani, au na sega tale ni gunuva na waini oqo me yacova na gauna sa yaco kina na matanitu ni Kalou.”

¹⁹ Sa qai taura e dua na madrai, ka vakavinavinaka vua na Kalou, a sa dovia, ka solia vei iratou, ka kaya, “Oqo na yagoqu sa soli ena vukumudou. Dou cakava oqo mo dou vakananumi au kina.”

²⁰ Sa vaka talega kina na bilo, ni sa oti na i vakayakavi, a sa kaya, “Na bilo oqo sai koya na veiyalayalati vou ni Kalou sa dregati ena noqu dra, [na dra ka sa liviraki ena vukumudou.]

²¹ “Ia, dou raica! O koya ena soli au yani sa tiko vata kei au ena teveli oqo!

²² Na Luve ni Tamata ena mate me vaka sa lewa oti tu na Kalou, ia ena kalouca ga na tamata ena soli koya yani!”

²³ E ratou sa qai veitarotarogi vakai iratou se o cei mada ena cakava na ka o ya.

O Cei ena Vakacerecerei Duadua

²⁴ E a qai tubu e dua na veiba ena kedratou maliwa, se o cei vei iratou me na okati me ka levu duadua.

²⁵ Sa qai kaya vei iratou ko Jisu, “Era dau vakacola sau na nodra tui na kai veimatanitu tani kivei ira na nodra tamata, ka ra sa vakatokai ira na veiliutaki me ra ‘Nodra i Tokani na Tamata’.

²⁶ Ia me kakua sara ni vakaoqo vei kemudou; ka me yaco ga o koya e cecere cake duadua vei kemudou me vaka e dua sa gone duadua, kei koya e veiliutaki me vaka e dua sa dauveiqaravi.

²⁷ O cei vei rau e levu cake, o koya e dabe me kana se o koya e veiqaravi? E sega li ni o koya e dabe me kana? Ia oi au, au sa tiko ena kemudou maliwa me vaka e dua sa dauveiqaravi.

²⁸ “Sa i kemudou ga sa dau tu vata tu kei au ena veigauna dredre ka'u sa curuma;

²⁹ ia me vaka ga ni sa solia vei au ko Tamaqu na dodonu ni vakataulewa, au sa solia talega vakakina vei kemudou na dodonu oqo.

³⁰ Dou na kana ka gunu ena noqu teveli ena noqu Matanitu, ka dabe ena i dabedabe vakatui ka vakatulewa vei ira na yavusa e tinikarua ni Isireli.

Sa Tukuna Rawa ko Jisu ni na Cakitaka o Pita ni Kilai Koya

³¹ “I Saimoni, I Saimoni! Rogoca! Sa soli na galala vei Setani me vakatovolei kemudou kece sara, me tawasea tani na vinaka mai na ca, me vaka na dauteitei sa tawasea tani na witi mai na qa ni witi.

³² Ia au sa masulaki iko oti, Saimoni, me kakua ni malumalumu na nomu vakabauta; kei na gauna o saumaki lesu tale mai kina vei au, mo qai vakaukauwataki iratou na tacimu.”

³³ A sa kaya o Pita, “Turaga, au sa vakarau tu me'u lako vata kei kemuni ki na valeniveivesu ka me'u mate vata talega kei kemuni!”

³⁴ Sa qai kaya vua ko Jisu, “Au sa tukuna oqo vei iko, Pita, ni o na tukuna vakatolu ni o sa sega ni kilai au ni se bera ni tagi na toa ena bogi edaidai.”

Na Taga ni Lavo, na Taga ni Vaqa, kei na i Seleiwau

³⁵ Sa qai kaya vei iratou ko Jisu, “Ena gauna au a talai kemuni wale kina ka sega ni o ni kauta e dua na taga ni lavo se taga ni vaqa, se na i vava, o ni a leqa li ena dua na ka?” E ratou sa qai kaya, “E sega sara.”

³⁶ Sa qai kaya tale vei iratou o koya, “Ia oqo o koya e tiko na nona taga ni lavo me kauta tiko, ka vakakina na taga ni kakana; kei koya e sega na nona i seleiwau, me volitaka na nona i sulu ka volia kina e dua.

³⁷ Ni'u sa tukuna vei kemudou ni dodonu me vakayacori mada vei au na tiki ni Vola Tabu oqo, ‘Ka sa wili vata o koya kei ira na tamata talaidredre’; ia sa dina sara, ni sa vakayacori oti na veika kece sa volai oqo me baleti au.”

³⁸ E ratou sa qai kaya vua, “Turaga, ni raica, sa tu oqo e rua na i seleiwau.” Sa qai kaya vei iratou o koya, “Sa rauta.”

Sa Masu ko Jisu

³⁹ Sa qai curu ki tautuba ko Jisu, ka lako ki na Ulunivanua ni Veiolive me vaka na nona i vakarau; ka ratou sa muri koya na tisaipeli.

⁴⁰ Ia ni sa yaco ki na tikina o ya, sa qai kaya vei iratou, “Dou masu mo dou kakua ni rawai ena veitemaki.”

⁴¹ Sa qai biuti iratou o koya ka toso vakayawa toka vakalailai, rauta na yawa ni vanua e viritaki rawa kina e dua na vatu, ka sa tekiduru ka masu, ka kaya,

⁴² “I Tamaqu, kevaka sa lomamuni, ni kauta tani vei au na bilo ni veivakararawataki oqo; ia me kakua ni yaco na lomaqu, me yaco ga na lomamuni.”

⁴³ Sa qai rairai mai vua e dua na agilosi mai lomalagi ka vakaukauwataki koya.

⁴⁴ Ni sa rarawa vakalevu sara na yalona, sa qai masu vagumatua cake ga kina; kei na nona buno sa vaka na titiri ni dra sa lutu ki na qele.

⁴⁵ Ia ni sa tu cake mai na masu o koya, sa lako tale vei iratou na tisaipeli ka raici iratou ni ratou sa moce tu, ni sa bibi vakalevu na lomadratou.

⁴⁶ Sa qai kaya vei iratou, “A cava o dou moce tiko kina? Dou duri cake ka masu mo dou kakua ni rawai ena vere.”

Sa Vesu ko Jisu

⁴⁷ Ia ni sa vosa tikoga ko Jisu, era sa tokatu yani na lewe vuqa, ka liutaki ira yani na tamata ka vakatokai o Jutasa, e dua vei iratou na lewe tinikarua. A toro voleka yani vei Jisu o koya ka reguca.

⁴⁸ Sa qai kaya vua ko Jisu, “I Jutasa, o sa vakatakila na Luve ni Tamata vei ira na nona meca ena dua na i regu?”

⁴⁹ Ia ni ratou sa raica na tu volekati koya na ka ena vakarau yaco, e ratou sa kaya sara, “Turaga, me keitou sa vakayagataka na neitou i seleiwau?”

⁵⁰ E dua vei iratou sa mani taya na nona tamata na Bete Levu, ka muduka laivi kina na daligana i matau.

⁵¹ Ia sa qai kaya ko Jisu, “Sa rauta o ya!” Sa qai tara na daliga i koya na tamata o ya ka vakabula.

⁵² Sa qai kaya ko Jisu vei ira na bete levu kei ira na i liuliu ni ovisa ni Valenisoro, kei ira na qase era sa lako yani me ra vesuki koya, “Oi au beka e dua na daubutako, mo ni lako tu mai kina vakaoqo kei na nomuni i seleiwau kei na i yaragi?

⁵³ Au a tiko vata ga kei kemuni mai na Valenisoro ena siga kei na bogi, ka o ni a sega ni bau via vesuki au. Ia sa qai nomuni gauna oqo, ni sa veiliutaki na kaukauwa ni butobuto.”

Sa Cakitaka o Pita ni Kilai Jisu

⁵⁴ Era sa qai tauri Jisu, ka tubera yani ka kauta ki na vale ni Bete Levu; ka sa muri vakayawa tiko yani o Pita.

⁵⁵ A sa waqa tiko na buka ena veimama donu ni buturara, ka sa la'ki tomani ira era sa dabe wavolita o Pita.

⁵⁶ Ia ni sa raici koya e dua na yalewa dauveiqaravi ni tatalai tiko ena buka, sa mani vakaraici koya matua toka, ka kaya, “Na tamata talega oqo e dau tiko vata kei Jisu!”

⁵⁷ Ia sa qai cakitaka o koya, ka kaya, “Yalewa au sa sega ni kilai koya!”

⁵⁸ Ni dede tale vakalailai, sa raici Pita e dua tale na tamata, ka kaya, “O iko talega e dua vei ira!” Ia sa kaya ga o Pita, “O iko, e sega ni o au oqori!”

⁵⁹ Ni oti tale e rauta e dua na aua, sa mai vakadinadinataka matua sara e dua tale ka kaya, “Na tamata oqo e dau tiko vata dina kei Jisu, ni sa kai Kalili o koya!”

⁶⁰ Ia sa qai kaya o Pita, “O iko, au sega ni kila na ka o kaya tiko!” Ia ena gauna vata o ya, ni se vosa tikoga o Pita, sa tagi sara na toa.

⁶¹ Sa qai vuki na Turaga ka rai vakadodonu sara vei Pita. Sa qai nanuma o Pita na vosa ni Turaga, ni a kaya vua, “Ni bera ni tagi na toa ena bogi edaidai, o na tukuna vakatolu ni o sa sega ni kilai au.”

⁶² A sa curu ki tuba o Pita ka tagi vakalevu sara.

Sa Vakalialiai ka Mokulaki ko Jisu

⁶³ Ia o ira ka a tauri Jisu era sa vakalialiai koya, ka vakamokuti koya.

⁶⁴ Era a tabonaka talega na matana ka taroga, “Tukuna mada mai, se o cei ka sabaki iko?”

⁶⁵ Era a kaya talega e vuqa tale na ka me ra vosa vakacacataki koya kina.

Ko Jisu e Matadra na Matabose e Cake

⁶⁶ Ia ni sa siga na vanua, era sa qai soqoni vata o ira na nodra qase na Jiu, kei ira na bete levu kei ira na daunilawa, ka ra sa kauti koya yani ki na nodra matabose e cake, ka ra kaya,

⁶⁷ “Kevaka o iko na Mesaia, mo tukuna mai vei keimami.” Ia sa qai kaya vei ira o koya, “Kevaka ka'u sa tukuna vei kemuni, o ni na sega ni vakabauti au;

⁶⁸ ka kevaka ka'u sa tarogi kemuni e dua na taro, o ni na sega ni sauma.

⁶⁹ Ia mai na gauna oqo ka lako yani, ena dabe na Luve ni Tamata ena yasana i matau nei Koya na Kalou kaukauwa.”

⁷⁰ Era sa qai taroga kece vua, “Oi, sai iko li na Luve ni Kalou?” Sa qai kaya vei ira o koya, “Oqori na ka o ni sa kaya me baleti au.”

⁷¹ Era sa mani kaya, “Na i vakadinadina cava tale me keimami gadreva? Eda sa rogoca sara ga oi keda na veika sa tukuna!”