Luke 20 - Ai Vola Tabu Ena Vakavakadewa Vou

Na Taro me Baleta na Kaukauwa i Jisu

¹ Ena dua na siga ni a vakatavulici ira tiko na tamata ena Valenisoro ko Jisu ka vunautaka tiko na i Tukutuku Vinaka, era sa qai lako yani na bete levu kei ira na daunilawa, kei ira na qase,

² ka kaya vua, “Tukuna mai vei keimami se na kaukauwa cava o vakayacora tiko kina na veika oqo, se o cei sa solia vei iko na kaukauwa oqo.”

³ Sa qai sauma vei ira o koya, ka kaya, “Au na tarogi kemuni talega ena dua na taro, ni tukuna mada mai,

⁴ e vu li mai lomalagi na veipapitaisotaki i Joni, se vu ga mai vei ira na tamata?”

⁵ Era sa qai veivosakitaka vakai ira, ka kaya, “Kevaka eda kaya, ‘Mai lomalagi,’ ena qai kaya o koya, ‘A cava ga o ni a sega ni vakabauti koya kina?’

⁶ Ia kevaka eda kaya, ‘Mai vei ira na tamata,’ era na vakaviriki keda na tamata kecega ena vatu, ni ra sa vakabauta dina ni a dua na parofita o Joni.”

⁷ Era sa qai kaya ni ra sega ni kila se a vu mai vei.

⁸ Sa qai kaya vei ira ko Jisu, “Au na sega talega ni tukuna, se na lewa i cei au vakayacora tiko kina na veika oqo.”

Na Vosa Vakatautauvata ni Tauri Qele

⁹ Sa qai tekivu ko Jisu me tukuna vei ira na tamata na vosa vakatautauvata oqo. “E a tea e dua na tamata e dua na loganivaini, ka lisitaka vei ira eso na dauteitei, ka lako ki na dua na vanua tani ka la'ki dede tu kina.

¹⁰ Ia ni sa yacova na gauna ni tatamusuki, sa qai tala na i taukei ni loganivaini e dua na tamata kivei ira era lisitaka na qele me ra solia vua na nona i wasewase ni qerepi sa tamusuki; ia era a qai mokuta ka vakatalai koya tani, ka sega ni solia vua e dua na ka.

¹¹ Sa qai tala e dua tale na tamata o koya, ka ra a mokuta talega ka vakamaduataka, ka vakatalai koya tani, ka sega talega ni solia vua e dua na ka.

¹² Sa qai tala na kena i katolu o koya; ka ra a vakamavoataki koya talega ka vakasava lesu.

¹³ Sa qai kaya na i taukei ni loganivaini, ‘Na cava beka me'u cakava? Au sa na tala na luvequ e dua bauga; ni dodonu me ra na dokai koya!’

¹⁴ Ia ni ra sa raici koya na tauri qele, era sa qai veivosaki vakai ira ka ra kaya, ‘O koya oqo ena kena i taukei mai muri; me da vakamatea, me na qai noda na veika ena nona.’

¹⁵ Era sa qai biliraki koya tani mai na loganivaini ka vakamatea.” A qai taroga ko Jisu, “Na cava beka ena qai cakava vei ira na tamata oqo o koya na i taukei ni loganivaini?

¹⁶ Ena lako mai ka vakamatei ira na tamata o ya, ka solia na loganivaini vei ira eso tale.” Ni ra sa rogoca oqo na tamata, era sa kaya, “E sega vakadua ni rawa!”

¹⁷ Ia sa qai vakaraici ira ko Jisu, ka kaya, “Sa qai cava beka na i balebale ni tiki ni Vola Tabu oqo? ‘Na vatu era sa cata na matai ni vale, Sa yaco me tikina bibi duadua ena veika kecega.’

¹⁸ O koya yadua e lutu ena dela ni vatu o ya ena dasila kina; ia o koya ena lutuka, ena vurumemea me vaka na nuku.”

Na Taro me Baleta na Soli Vakacavacava

¹⁹ Era a tovolea na daunilawa kei ira na bete levu me ra vesuki koya ena tiki ni gauna vata ga o ya, ni ra kila rawa ni a vosataki ira o koya ena vosa vakatautauvata o ya. Ia era a rerevaki ira ga na tamata.

²⁰ Era sa mani qai vakaraici koya lo tiko, ka tala eso me ra veretaki koya. Era la'ki lasutaka ni ra tamata dodonu, ka ra saga me ra coriti Jisu mai na nodra vakatataro eso, me ra soli koya yani kina ki na vakatulewa kei na kaukauwa nei Kovana ni Roma.

²¹ Era sa kaya na yamata oqo vei Jisu, “Vakavuvuli, keimami kila ni o ni dau vosa ka vakatavuvuli vakadodonu, ka sega ni dau totaka e dua, ia o ni dau vakatavuvulitaka vakadodonu ga na sala ni Kalou.

²² Mo ni tukuna mada mai vei keimami oqo, sa tara li ena noda Lawa me da soli vakacavacava vei Sisa, se segai?”

²³ Ia sa kila rawa o koya na nodra i lawaki ka mani kaya vei ira,

²⁴ “Vakaraitaka mada mai vei au e dua na i lavo siliva. Na mata i cei kei na yaca i cei e tu kina?” Era sa kaya, “A nei Sisa.”

²⁵ Sa qai kaya ko Jisu, “Sa vinaka, mo ni solia vei Sisa na ka sa nei Sisa, ka solia vua na Kalou na ka sa nona na Kalou.”

²⁶ Sa mani sega ni rawa me ratou coriti koya mai na vosa e cavuta ena matadra na tamata; ia eratou sa qoroqoro ga ena nona vosa, ka galu.

Na Taro me Baleta na Tucake Tale mai na Mate

²⁷ Era sa qai lako vua eso na i tokani i Setoki, o ira era kaya ni sega na tucake tale mai na mate,

²⁸ ka tarogi koya ka kaya, “Vakavuvuli, sa vola tu vei keda o Mosese, kevaka sa mate na tuakana e dua na tagane, ka a vakawati ka sega na luvena, me qai vakawatitaka na watina o tacina me so kina na gone me ra wili vua na tuakana.

²⁹ Ia ena dua na gauna e ratou a tiko e lewe vitu na veitacini. E a vakawatitaka e dua na yalewa o koya na i matai, ka mani mate ka sega na luvena.

³⁰ E vakakina o koya na i karua.

³¹ Sa qai tauri koya na i katolu, ka vakakina o iratou kece na lewe vitu; e ratou mate kece ka sega na luvedratou.

³² Sa qai mate talega e muri na yalewa.

³³ Ia ni sa yaco na tucake tale mai na mate, ena qai wati cei na yalewa oqo? A sa vakawati o koya kei iratou kece na lewe vitu.”

³⁴ Sa qai kaya vei ira ko Jisu, “Era sa dau vakawati ka veimusumusukitaki me ra vakawati na gone ni vuravura oqo;

³⁵ ia o ira sa ganiti ira me ra rawata yani na vuravura vou kei na tucake tale mai na mate, era na sega ni vakawati se veimusumusukitaki me ra vakawati.

³⁶ Ni ra sa na sega tale ni mate. Era sa na tautauvata kei ira na agilosi. Era sa na luve ni Kalou, ni ra sa na tucake tale mai na mate.

³⁷ Sa vakatakila vakavinaka sara o Mosese ni ra sa vakaturi cake tale o ira na mate. Ena vanua e volai koto kina na veika me baleta na vunikau kama, a sa vakatoka kina na Turaga o Mosese me o koya na Kalou i Epara-ama, na Kalou i Aisake, kei na Kalou i Jekope.

³⁸ O koya sa nodra Kalou na bula, ka sega ni o ira na mate. Vua na Kalou, sa bula na tamata kecega.”

³⁹ Era sa qai sauma eso vei ira na daunilawa ka kaya, “Na i Vakavuvuli, sa vinaka sara na nomuni vosa.”

⁴⁰ Era sa sega tale ni doudou me ra taroga vua e dua na ka.

Na Taro me Baleta na Mesaia

⁴¹ Sa qai kaya vei ira ko Jisu, “Era sa tukuna rawa beka vakaevei ni na basika mai na kawa i Tevita na Mesaia?

⁴² Ni o Tevita mada ga vakai koya e kaya ena i Vola ni Same, ‘Sa kaya na Turaga ki vua na noqu Turaga: Mai dabe ena yasaqu i matau

⁴³ me yacova ni'u sa vakamalumalumutaki ira na nomu meca me ra i tutu ni yavamu.’

⁴⁴ Sa vakatokai koya o Tevita me ‘Turaga’; ia me qai luvena tale vakacava na Mesaia?”

Sa Veivakasalataki ko Jisu me Ra Qarauni na Daunilawa

⁴⁵ Ia ni ra vakarorogo tiko na lewe vuqa, sa qai kaya o koya vei iratou na nona tisaipeli,

⁴⁶ “Dou qarauni kemudou mai vei ira na daunilawa, ka ni ra dau vinakata na lako voli ena i sulu balavu, ka taleitaka na veivakabulataki ena vanua ni veivoli, kei na i dabedabe e cake ena veivalenilotu, kei na veitikotiko vakaturaga ena gauna ni kana magiti.

⁴⁷ Era kovea vakailawaki na nodra veivale na yada dravudravua, ka ra veivakaisini walega ena nodra masu balavu. Na ka oqo ena bibi vakalevu cake sara kina na kedra i totogi.”