Luke 10 - Ai Vola Tabu Ena Vakavakadewa Vou

Sa Talai Ira na Lewe Vitusagavulukarua ko Jisu

¹ Ni sa oti o ya, sa qai lesia tale na Turaga e lewe 72 na tamata, ka talai ira me ra lakolako yarurua ka liu tiko vua ki na veikoro kece kei na veivanua e vakarau me lakova.

² A sa kaya vei ira o koya, “Sa levu sara na i teitei sa matua vinaka tu, ia sa lewe lailai ga na tamata cakacaka; mo ni masuti koya kina na Turaga ni tatamusuki me talai ira mai na tamata cakacaka ki na i teitei.

³ Mo ni lako; ka raica, au sa talai kemuni yani me vaka na lami ena kedra maliwa na olifa.

⁴ Ni kakua ni kau taga i lavo, se kau kakana, se kau i vava, ka kakua ni tu vakadua ka veikidavaki kaya kei na dua na tamata e gaunisala.

⁵ Ena vale kecega o ni curu kina, ni kaya taumada kina, ‘Me yaco mada ga na vakacegu ena vale oqo!’

⁶ Kevaka e tiko kina e dua na tamata dau veivakacegui, ena yaco sara vua na nomuni veivakacegui; kevaka e sega, ena lesu tale mai vei kemuni.

⁷ Ia mo ni tiko ga ena vale o ni sa dui curu kina, ka kania ka gunuva na veika e ratou solia; ni sa dodonu ga me taura na kena i sau na tamata cakacaka. Mo ni kakua ni veitokiyaki e veivale.

⁸ Ena gauna o ni sa curuma kina e dua na koro ka ra ciqomi kemuni vinaka na lewena, ni kania na ka e mai tauci e matamuni.

⁹ Mo ni vakabulai ira na tauvimate era tiko kina, ka kaya vei ira, ‘Sa volekati kemuni mai na matanitu ni Kalou.’

¹⁰ Ia na koro kecega o ni curu kina, ka ra qai sega ni ciqomi kemuni, ni lako ki na kena veigaunisala ka kaya,

¹¹ ‘Ia na kuvu ni soso ni nomudou koro ka sa kabita mai na yava i keimami, sa keimami qusia laivi tale vei kemuni. Ia mo ni nanuma ga ni sa voleka sara vei kemuni na Matanitu ni Kalou!’

¹² Au sa kaya oqo vei kemuni, ena lailai cake na ka e yaco vei Sotoma ena siga o ya, ka na ca vakalevu na koro o ya.

Na Veikoro Tawa Vakabauta

¹³ “O sa kalouca sara, Koresini! O sa kalouca sara, Pecisaita! Ni kevaka sa caka mai Taia kei Saitoni na cakacaka mana ka a caka vei kemudrau, ke rau a sa veivutuni makawa, ka dabe tiko ena i sulu taga kei na dravusa me i vakaraitaki ni nodra veivutuni.

¹⁴ Ena rawa cake ni mamada na kedrau i totogi o Taia kei Saitoni ena Siga ni Lewa, ka na sega ga oi kemudrau.

¹⁵ O iko talega Kapenaumi, mo na vakacerecerei iko li mo yaco ki lomalagi? O na biu sobu ga ki Etesi!

¹⁶ “O koya sa rogoci kemuni sa rogoci au, ia o koya sa besetaki kemuni sa besetaki au; ia o koya sa besetaki au sa besetaki koya sa talai au mai.”

Na Nodra Lesu Tale Mai na Lewe Vitusagavulukarua

¹⁷ Era sa qai lesu tale vua na lewe 72 ena marau ka kaya, “Turaga, era sa bau guce talega vei keimami na tevoro ena vuku ni yacamuni!”

¹⁸ Sa qai kaya vei ira ko Jisu, “Au a raici Setani ni sa lutu sobu mai lomalagi me vaka na livaliva.

¹⁹ Mo ni kila, au sa solia na kaukauwa vei kemuni mo ni butuka kina na gata kei na batibasaga, ka rawa na kaukauwa kecega ni meca, ka na sega na ka me na vakacacani kemuni.

²⁰ Ia mo ni kakua ni reki baleta ni ra sa talairawarawa vei kemuni na yalo velavela, ia mo ni reki ga ni sa volai na yacamuni mai lomalagi.”

Sa Reki ko Jisu

²¹ Ena gauna vata ga o ya, sa vakasinaiti koya ena reki na Yalo Tabu ka sa kaya, “Au sa vakavinavinaka vei kemuni Tamaqu, na Turaga ni lomalagi kei vuravura, ni o ni sa vunia na veika oqo vei ira na vuku kei ira na kila-ka, ka vakatakila ga vei ira na gone lalai. Io, Tamaqu, ni sa vaka oqori na i naki ni lomamuni.

²² “Sa solia mai vei au ko Tamaqu na ka kecega. E sega ni dua e kila se o cei na Luvena, na Tamana duadua ga; ka sega ni dua e kila se o cei na Tamana, na Luvena duadua ga, kei ira sa digitaka o koya me vakaraitaki Tamana vei ira.”

²³ Sa qai vuki vei iratou na tisaipeli, o koya, ka kaya lo vei iratou, “Era sa kalougata na mata era raica na ka dou sa raica!

²⁴ Ni'u sa kaya vei kemudou ni ra lewe vuqa na parofita kei na tui era a gadreva me ra raica na ka dou sa raica, ka ra mani sega ni raica; me ra rogoca talega na ka dou sa rogoca, ka ra mani sega ni rogoca.”

Na Vosa Vakatautauvata ni Kai Samaria Dauloloma

²⁵ Raica, sa qai tucake e dua na daunilawa me vakatovolei koya, ka kaya, “Na i Vakavuvuli, na cava me'u cakava me'u taukena kina na bula tawamudu?”

²⁶ Sa qai kaya vua ko Jisu, “Na cava so era volai tu ena lawa? Ka cava na kedra i balebale o kila rawa?”

²⁷ Sa qai sauma o koya ka kaya, “Mo lomana na Turaga na nomu Kalou ena lomamu taucoko, kei na yalomu taucoko, kei na nomu kaukauwa taucoko, kei na nomu vakasama taucoko; ka lomana na kai nomu me vakataki iko.”

²⁸ Sa qai kaya vua ko Jisu, “O sa sauma vakadodonu; la'ki vakayacora na veika oqori, o na bula kina.”

²⁹ Ia ni sa via vakadonui koya vakai koya ga, sa qai kaya vei Jisu, “Ia o cei na kai noqu?”

³⁰ Sa qai sauma ko Jisu ka kaya, “E a lako sobu e dua na tamata mai Jerusalemi ki Jeriko, ka ra mani vesuki koya vakasauri na daubutako; era a qai luvata na nona i sulu, ka mokuta, ka lako tani ka biuti koya tu, ni sa voleka tu ni mate.

³¹ Sa qai lako sobu ena sala o ya e dua na bete, ia ni sa raici koya sa vakatikitikitaka ka lako sara.

³² E vaka talega kina e dua na kawa i Livai, ni sa yaco yani ki kea ka raici koya sa vakatikitikitaka talega ka lako sara.

³³ Ia sa qai lako yani e dua na kai Samaria, ka mani yaco sara vua. Ni sa raici koya sa lomana sara,

³⁴ ka sa lako yani vua, ka vauca na veitikina e mavoa, ka livia kina na waiwai kei na waini, ka sa vakavodoka ki na nona manumanu ka kauta ki na bure ni vulagi, ka qaravi koya kina.

³⁵ Ena siga ka tarava sa qai taura e rua na tiki ni siliva, ka solia vua na i vakatawa ni bure, ka kaya vua, ‘Qai qaravi koya tiko; ke so tale na ka o na vakayagataka vua, au na sauma vei iko ni'u sa lesu tale mai.’

³⁶ “O cei vei iratou oqo ena nomu vakasama, e kai nona na tamata ka ra a vesuka na daubutako?”

³⁷ Sa qai kaya o koya, “O koya ga ka sa yalololoma ki vua.” Sa qai kaya vua ko Jisu, “Lako, la'ki kitaka vakakina.”

Sa Sikovi Marica kei Meri ko Jisu

³⁸ Ia ni ratou sa lako tiko ena nodratou i lakolako, e ratou sa qai yaco ki na dua na koro, ka tiko kina e dua na yalewa, a yacana o Marica. A sa kauti Jisu o koya ki na nona vale.

³⁹ Ia e dua tiko na tacina yalewa, a yacana o Meri. A dabe tiko ena yasa ni yava ni Turaga o Meri ka vakarorogo ki na nona vosa.

⁴⁰ Ia sa veidreyaki na loma i Marica ena levu ni ka me cakava. A sa mani lako kina vua ka kaya, “Turaga, o ni sega ni kauwaitaka ni laivi au o taciqu me'u veiqaravi duadua ga? Ni tukuna mada vua me mai vukei au.”

⁴¹ Sa qai sauma ko Jisu ka kaya vua, “I Marica, i Marica! O sa rui lomaocaocataka ka leqataka na veika e vuqa:

⁴² ia sa dua bau ga na ka e yaga. Sa digitaka o Meri na i votavota vinaka, na ka ena sega ni kau tani rawa mai vua.”