Luke 1 - Ai Vola Tabu Ena Vakavakadewa Vou

A Kena i Kau

¹ Kivei Ceofilo: Era sa lewe vuqa era tovolea ena nodra i gu taucoko me ra vola na i tukutuku ni veika sa yaco vakaidina ena keda maliwa.

² Era sa vola na veika sa tukuni vei keda mai vei ira era a raica e matadra ka vakadewataka na kena i tukutuku mai na i vakatekivu.

³ O koya oqo, au sa nanuma kina ni na vinaka me'u vola vei kemuni, na turaga dokai, e dua na kena i tukutuku sa tuvani vakamatau, baleta ni'u sa vakatarotaroga matua sara na veika kece sa yaco mai na i vakatekivu.

⁴ Au sa vakayacora oqo mo ni kila kina na dina ni veika o ni sa vakatavulici kina.

Na Vakarogoi ni Sucu i Joni na Dauveipapitaisotaki

⁵ Ena gauna e tui tiko kina mai Jutia o Eroti, a sa tiko kina e dua na bete o Sakaraia na yacana, ena matabete i Apaijia; a watina e dua vei ira na kawa i Eroni, ka yacana o Ilisapeci.

⁶ E rau dodonu ruarua ena mata ni Kalou oi rau oqo, e rau dau muria na i vakaro kei na lawa kecega ni Turaga, ka rau sega ni vakalewai rawa.

⁷ E sega na luvedrau, ni a yava o Ilisapeci ka rau sa qase ruarua talega mai.

⁸ Ena dua na gauna ni a cakacaka vakabete tiko ena mata ni Kalou o Sakaraia, o ya ni a vakaitavi kina na nona matabete,

⁹ a mani donui koya ena vakawirimadigi me vaka na i vakarau vakabete, me curu ki na Valenisoro ni Turaga ka vakama na ka boi vinaka.

¹⁰ Ia o ira na lewe vuqa era a masu tu ga e tautuba ni sa kama tiko na ka boi vinaka.

¹¹ Sa qai rairai vua e dua na agilosi ni Turaga, ni sa tucake tu ena yasa i matau ni cabocabonisoro ni ka boi vinaka.

¹² Ia ni sa raica o Sakaraia, a sa kidroa ka tuburi koya na rere.

¹³ Sa qai kaya vua na agilosi, “I Sakaraia, mo kakua ni rere! Sa rogoca na Kalou na nomu masu, ka na vakasucuma e dua na luvemu tagane o Ilisapeci na watimu, ia mo qai vakayacani koya me o Joni.

¹⁴ O na reki ka marau kina, era na reki talega na lewe vuqa ni sa sucu!

¹⁵ Ni na dokai vakalevu o koya ena mata ni Turaga, ka na sega ni gunuva na waini se na gunu kaukauwa. Ena vakasinaiti ena Yalo Tabu me tekivu sara mai na kete i tinana,

¹⁶ ka na vakalesuya mai o koya vua na Turaga na nodra Kalou e lewe vuqa vei ira na Isireli.

¹⁷ O koya ena liu tiko vua na Turaga ena qaqa kei na kaukauwa i Ilaijia na parofita. Ena kauti ira vata tale mai na qase kei ira na gone o koya; ena saumaki ira lesu na tamata dautalaidredre ki na sala ni yalododonu; ena vakavuna talega me ra vakarau tu vua na Turaga o ira na tamata ni Kalou.”

¹⁸ Sa qai kaya vua na agilosi o Sakaraia, “Au na kila vakacava na ka oqo, ni'u sa qase, ka sa qase talega na watiqu?”

¹⁹ Sa qai sauma na agilosi ka kaya vua, “Oi au o Kaverieli, au sa dau tu me'u veiqaravi ena mata ni Kalou, ka'u sa talai mai me'u vosa vei iko ka tukuna vei iko na i tukutuku vinaka oqo.

²⁰ Ia o na galu tu mada ka sega ni vosa rawa me yacova na siga ena vakayacori kina na veika oqo, ni o sega ni vakadinata na noqu vosa, ka ni na vakayacori ga ena kena gauna.”

²¹ Era a waraki Sakaraia tiko na tamata, ka ra kurabui ni sa la'ki dede tiko o koya ena loma ni Valenisoro.

²² Ia ni sa curu mai ki tautuba o koya, sa sega ni vosa rawa vei ira, ka ra sa qai kila ni a raica o koya e dua na raivotu ena Valenisoro. E a vakatabataba ga vei ira o koya ni sa galu tu.

²³ Ia ni sa oti na nona cakacaka vakabete, sa qai lesu tale ki na nona vale o Sakaraia.

²⁴ Ni sa oti yani na veisiga o ya, sa qai kunekune na watina, o Ilisapeci, ka sa tiko voli ga e vale me vula lima, ka sa kaya,

²⁵ “Sa i koya oqo na cakacaka ni Turaga vei au, ni sa raici au o koya ena mataloloma, me kauta laivi kina na levu ni noqu madua ena kedra maliwa na tamata!”

Na Vakarogoi ni Sucu i Jisu

²⁶ Ena i kaono ni vula sa talai na agilosi o Kaverieli mai vua na Kalou, ki na dua na koro mai Kalili o Nasareci na yacana,

²⁷ ki vua e dua na goneyalewa ka sa musuki tu vua e dua na tagane o Josefa na yacana, ena mataqali i Tevita; a yaca ni goneyalewa koya o Meri.

²⁸ Sa yaco yani vua na agilosi ka kidavaki koya, ka kaya, “Mo reki mada, o iko o sa lomani vakalevu! Sa tiko vata kei iko na Turaga! O sa kalougata vakalevu o iko mai vei ira kecega na yalewa.”

²⁹ Sa kidroa o koya ena vosa o ya, ka vakasamataka e lomana se cava na i balebale ni veikidavaki vaka o ya.

³⁰ Sa qai kaya vua na agilosi, “I Meri, mo kakua ni rere, ni sa lomani iko na Kalou.

³¹ Raica, o na kunekune, ka vakasucuma e dua na gonetagane; ia mo vakayacani koya ko Jisu.

³² Ena dokai vakalevu o koya, ka na vakatokai me Luve i Koya sa Cecere Sara. Na Turaga na Kalou ena solia vua na i tutu vakatui, me vakataka na nona qase o Tevita,

³³ ka na tui tiko o koya ena mataqali i Jekope ka sega ni mudu; ena sega talega ni mudu na nona matanitu!”

³⁴ Sa qai kaya o Meri vua na agilosi, “Ena yaco rawa vakacava na ka oqo, ni'u sa sega ni veiyacovi kei na dua na tagane?”

³⁵ Sa qai sauma na agilosi ka kaya vua, “Ena lako sobu mai vei iko na Yalo Tabu, ka na sobuti iko na kaukauwa i Koya sa Cecere Sara. Ena ka oqo, ena vakatokai kina na gonelailai tabu sa sucu mai vei iko me Luve ni Kalou.

³⁶ Raici koya mada na wekamu o Ilisapeci. A sa dau tukuni tu ni sa sega ni rawa vua me vakaluveni, ia sa vula ono oqo na nona kunekunetaka tiko e dua na gone, e dina ga ni sa qase sara o koya.

³⁷ Ni sa sega ni dredre vua na Kalou e dua na ka.”

³⁸ Sa qai kaya o Meri, “Oi au na vada ni Turaga; me yaco mada ga vei au na veika oqori me vaka na nomuni vosa.” Sa qai biuti koya sara na agilosi.

Sa La'ki Sikovi Ilisapeci o Meri

³⁹ Ni oti o ya, a sa vakarautaki koya o Meri ka lako vakusakusa ki na dua na koro ena veidelana mai Jutia.

⁴⁰ A sa lako ki na vale i Sakaraia ka sa kidavaki Ilisapeci.

⁴¹ Ia ni sa rogoca na vosa ni veikidavaki i Meri o Ilisapeci, a sa yavala e ketena na gone. A sa vakasinaiti o Ilisapeci ena Yalo Tabu

⁴² ka sa tabalaka cake na domona, ka kaya, “O sa kalougata vakalevu mai vei ira kece na yalewa, ka sa kalougata talega na lewe ni ketemu!

⁴³ A cava au sa rui kalougata kina, me mai sikovi au kina na tina ni noqu Turaga?

⁴⁴ Kila ga, ni sa rorogo e daligaqu na nomu vosa ni veikidavaki, sa yavala ena reki na gone e ketequ.

⁴⁵ Sa kalougata o koya sa vakadinata ni na vakayacori dina ga na veika sa tukuna vua na Turaga.”

Na Sere ni Veivakalagilagi i Meri

⁴⁶ Sa qai kaya o Meri, “Sa vakalagilagia na Turaga na yaloqu,

⁴⁷ Ka sa reki na yaloqu vua na Kalou na noqu i Vakabula!

⁴⁸ Ni sa nanuma na i tutu vakaloloma ni nona vada. Ka raica, me tekivu mai na gauna oqo era na kaya na veitabatamata kecega ni'u sa kalougata;

⁴⁹ Ni sa cakava vei au na veika lelevu o koya sa qaqa. Ka sa yaca tabu na yacana.

⁵⁰ Sa tu na nona yalololoma vei ira sa rerevaki koya ena veitabatamata kecega.

⁵¹ Sa dodoka na ligana kaukauwa, Ka ra sa veiseyaki na viavialevu ena vakanananu ni yalodra.

⁵² Sa talaraki ira na kaukauwa mai na nodra i tikotiko vakatui, Ka laveti ira cake na tamata lalai.

⁵³ Sa vakamamautaki ira na viakana ena ka vinaka; Ka vakatalai ira wale na vutuniyau.

⁵⁴ Sa vukei ira na nona tamata na Isireli, Ni sa nanuma lesu na nona yalololoma,

⁵⁵ Me vaka sa vosa kina vei ira na noda qase, Vei Epara-ama kei na nona kawa ka tawamudu!”

⁵⁶ A tiko vata kei Ilisapeci o Meri ka rauta e vula tolu, ka sa qai lesu tale ki na nona vale.

Na Sucu i Joni na Dauveipapitaisotaki

⁵⁷ Sa mani yaco na gauna me vakasucu kina o Ilisapeci, ka a vakasucuma e dua na gonetagane.

⁵⁸ Era sa mani rogoca o ira era tiko voleka e kea kei ira na wekana ni sa lomani koya vakalevu na Turaga, ka ra sa qai reki vata kaya.

⁵⁹ Ena i kawalu ni siga era sa qai lako me ra ciliva na gone, ka ra a nanuma me rau sa veiyacani kei tamana o Sakaraia.

⁶⁰ Ia sa qai kaya o tinana, “Sega, me yacana ga o Joni.”

⁶¹ Era sa qai kaya vua, “E sega ni dua na wekamu e vakayacani ena yaca oqo.”

⁶² Era sa qai vosa dusidusi me vaka na galu vei tamana se cava e vinakata o koya me yacana.

⁶³ Sa qai kerea o koya e dua na papa ni volavola, ka vola kina, “Na yacana o Joni.” Era sa kurabui kecega.

⁶⁴ Sa qai sereki vakasauri na gusu i Sakaraia kei na yamena, ka sa qai vosa ka vakarokorokotaka na Kalou.

⁶⁵ Era sa rere kecega o ira era tiko vakavolivoliti ira, ka sa veitalanoataki na veika oqo e loma ni vanua taucoko vaka-Jutia.

⁶⁶ O ira kece era rogoca na veika oqo era sa tugana e lomadra, ka ra kaya, “Ena yaco beka me cava na gone oqo?” Ni sa tiko vakaidina kei koya na kaukauwa ni Turaga.

Na Parofisai i Sakaraia

⁶⁷ Sa qai vakasinaiti ena Yalo Tabu o Sakaraia na tamana, ka sa parofisai kaya,

⁶⁸ “Me vakacaucautaki na Turaga na Kalou ni Isireli, Ni sa mai sikovi ira ka vakabulai ira na nona tamata.

⁶⁹ Ka sa vakatubura vei keda e dua na i vakabula kaukauwa, Ena mataqali i Tevita na nona tamata.

⁷⁰ Me vaka a vosataka o koya ena gusudra na nona parofita ena gauna makawa sara,

⁷¹ Me da vakabulai mai na noda meca, Kei na ligadra kecega era cati keda.

⁷² A sa kaya ni na vakatakila na yalololoma sa yalataki vei ira na noda qase Ka me nanuma talega na nona veiyalayalati tabu.

⁷³ Na bubului ka a bubului kina vei Epara-ama na tamada, Me solia vei keda

⁷⁴ Me rawa kina vei keda, ni da sa vakabulai mai na ligadra na noda meca, Me da qaravi koya ka sega ni rere,

⁷⁵ Ena yalosavasava kei na i valavala dodonu Ena matana ena veisiga ni noda bula.

⁷⁶ “Ia o iko na gone, o na vakatokai na parofita i Koya sa Cecere Sara. Ni o na liu ena mata ni Turaga Mo caramaka na nona sala;

⁷⁷ Mo vakatakila vei ira na nona tamata na ka me ra vakabulai kina, Ni sa bokoci na nodra i valavala ca.

⁷⁸ Ena yalololoma ni noda Kalou, Ka na kida mai kina vei keda na rarama mai cake,

⁷⁹ Me vakararamataki ira na tiko ena butobuto kei na yaloyalo ni mate, Ka vakauta na yavada ki na sala ni veisaututaki.”

⁸⁰ A sa tubu cake na gone, ka yaco me yalomatua sara, ka sa dau tiko voli ga ena loma ni vanua lala me yacova na gauna sa qai vakaraitaki koya kina vei ira na Isireli.