Kolosa 1 - Ai Vola Tabu Ena Vakavakadewa Vou

¹ Mai vei Paula, e dua na i apositolo i Karisito Jisu ena lewa ni Kalou, kei Timoci talega na tacida.

² Vei ira na tamata ni Kalou mai Kolosa, o ira na veiwekani yalodina sa tu vata kei Karisito: Me nomuni na loloma kei na vakacegu mai vua na Kalou o Tamada.

Na Masu ni Vakavinavinaka

³ Keirau sa dau vakavinavinaka tikoga vua na Kalou na Tama i Karisito Jisu na noda Turaga, ka dau masulaki kemuni ena veisiga.

⁴ Keirau sa mai rogoca na nomuni vakabauti Karisito Jisu, kei na nomuni dauloloma vei ira kecega na tamata ni Kalou,

⁵ na vakabauta kei na loloma sa vu mai na ka o ni sa nuitaka ka sa maroroi tiko mai lomalagi me nomuni. O ni a sa rogoca na ka sa nuitaki tiko oqo mai na i tukutuku dina, na kosipeli

⁶ sa yaco yani vei kemuni. Sa tete tikoga yani ki vuravura taucoko na kosipeli oqo, ka sa tu na vuana, ka sa tubu tikoga, me vaka ga sa yaco tiko vei kemuni me tekivu mai na matai ni siga o ni rogoca kina na nona lolomasavu na Kalou, ka kila rawa sara na kena dina.

⁷ O ni a vakatavulici kina mai vei Epafura, na neirau i tokani lomani. Sa i talatala yalodina i Karisito o koya ena vukuda,

⁸ ka sa mai tukuna vei keirau na nomuni loloma ena Yalo Tabu.

⁹ Sa i koya oqo na vuna keirau sa sega ni cegu kina ena masulaki kemuni, me tekivu sara mai na siga keirau a rogoca kina na veika me baleti kemuni. Keirau sa kerea vua na Kalou me vakasinaiti kemuni ena kila-ka mo ni kila kina na lomana, ka vakakina na vuku vakayalo kei na yalomatua.

¹⁰ O ni na qai cakava rawa kina na i valavala e kilikili kei na Turaga, ka na vinakata sara o koya, ka tu na vuamuni ena veicakacaka vinaka kecega, ka tubu cake tikoga na nomuni kila na Kalou.

¹¹ Mo ni vakaukauwataki ena kaukauwa kecega sa taka mai na nona kaukauwa lagilagi, mo ni colata rawa kina na veika kecega ena vosota kei na reki.

¹² Ni vakavinavinaka vua na Tamada, o koya sa vakarautaki kemuni me da wasei rawa ena nodra i votavota na yalosavasava ena matanitu ni rarama.

¹³ Sa vakabulai keda o koya mai na vakatulewa ni butobuto ka kauti keda tani ki na nona matanitu na Luvena lomani,

¹⁴ o koya eda sa sereki kina, ka sa bokoca na noda i valavala ca.

Na i Tutu kei na Cakacaka i Karisito

¹⁵ Ni sai Karisito na i yaloyalo ni Kalou sa tawa raici, na ulumatua ni veika buli kecega.

¹⁶ A sa buli na veika kecega ena vukuna: na veika eso mai lomalagi kei vuravura, na kena era sa raici rawa se tawa raici, se ra i tikotiko vakatui se ra veimatanitu, se ra turaga vakaliuci se ra turaga kaukauwa. A sa bulia na Kalou na veika kecega ena vukuna, ka me nona talega.

¹⁷ A sa bula na Karisito ni bera na veika kecega, ka sa vakataudeitaki na ka kecega ni sa semati ki vua.

¹⁸ Ni sa ulu ni yago, na i soqosoqo lotu, na Karisito; sai koya na i vakatekivu, na nodra ulumatua o ira sa vakaturi cake tale mai na mate, me cecere duadua kina o koya ena ka kecega.

¹⁹ Ni sa vinakata na Kalou me vakasinaiti na Luvena ena i tovo kecega ni Kalou,

²⁰ ka me vakaveivinakatitaki ira na veika kecega ena vukuna, na veika e vuravura se mai lomalagi, ka sa ia na veivinakati oqo ena vuku ni nona dra sa tiri mai na kauveilatai.

²¹ Ena dua na gauna o ni a yawa tani sara mai vua na Kalou ka veimecaki kei koya baleta na nomuni dau kitaka ka vakanananutaka na veika ca.

²² Ia oqo, sa vakaveivinakatitaki kemuni o koya ena vuku ni yago i Karisito sa mate, ka me vakatakila kina ni o ni sa yalosavasava ka sega ni beitaki rawa ka sega ni vunauci rawa e matana.

²³ Sa dodonu kina mo ni vakataudeitaka sara me kaukauwa vinaka na nomuni vakabauta, ka me tomani tikoga oqo, ka me kakua ni yavalati ka toso tani mai na i nuinui sa yalataki ena kosipeli. Sa i koya oqo na kosipeli o ni sa rogoca ka sa vunautaki vei ira na tamata kecega ena ruku i lomalagi, ka'u sa kena i talatala oi au, o Paula.

Na Veiqaravi nei Paula ena i Soqosoqo Lewenilotu

²⁴ Au sa marau ni'u sa vakararawataki ena vukumuni. Mai na veika mosimosi e sotava na yagoqu, sa rawa kina vei au me'u tomana tikoga kina na nona vakararawataki na Karisito ena vuku ni yagona, na i soqosoqo lotu.

²⁵ Ni ka'u sa lesi me'u dauveiqaravi ni soqosoqo lotu mai vua na Kalou, o koya sa solia vei au na i tavi oqo me'u vakayacora me baleti kemuni. Oqo na i tavi ni kena vunautaki me kilai vakavinaka sara na vosa ni Kalou,

²⁶ na ka vuni ka se vunitaki tu mai vakabalavu vei ira na veitabatamata e liu, ia sa qai vakaraitaki mai oqo vei ira na tamata ni Kalou.

²⁷ Ni sai naki ga ni Kalou me vakatakila vei ira na veimatanitu na talei kei na lagilagi ni ka vuni oqo, o ya ni sa tiko na Karisito ena lomamuni, ka kena i balebale ni o ni na vota vata kei koya na lagilagi ni Kalou.

²⁸ O koya oqo keitou sa vunautaki Karisito kina, ka ia na veivakasalataki kei na veivakatavulici vei ira na tamata yadua ena vuku kecega, me rawa ni ra yalomatua ka vinaka sara ena vuku i Karisito.

²⁹ Ena kena rawati oqo, au sa cakacaka ga kina vakaukauwa ka sasaga vagumatua ena veivuke ni kaukauwa i Karisito sa cakacaka yaco tiko vei au.