Kalatia 6 - Ai Vola Tabu Ena Vakavakadewa Vou

Ni Veivuketaka na Nomuni i Colacola

¹ Oi kemuni na wekaqu, kevaka sa kunei ni cala e dua na tamata, mo ni vakadodonutaki koya ena yalo malumalumu oi kemuni sa tu vinaka vakayalo. Ia mo ni vakaraici kemuni de o ni mani veretaki talega.

² Ni veivuketaka na nomuni i colacola, ka mo ni vakayacora sara kina na i vunau i Karisito.

³ Kevaka e dua e nanuma ni sa bau dua na ka o koya, ia ka sega tu ni bau dua na ka o koya sa vakalialiai koya tikoga vakai koya.

⁴ Ia me dui lewai koya vakavinaka na tamata yadua; kevaka e vinaka na nona lewa, ena qai rekitaka ga na ka e cakava, ka sega ena ka e cakava na tamata tani.

⁵ Ka ni na dui colata ga na nona i colacola na tamata yadua.

⁶ Me dau vota na veika vinaka kecega sa tu vua o koya sa vakatavulici tiko ena veika Vakarisito vei koya sa veivakatavulici.

⁷ Mo ni kakua ni vakaisini kemuni; ena sega ni vakalialiai na Kalou. Na ka ga e kaburaka na tamata ena tamusuka sara talega.

⁸ Ni kevaka era sa kakaburaki ena nodra i tovo vakayago, era na tamusuka ga na mate; ia kevaka era kakaburaki ena veika ni Yalo Tabu, era na tamusuka na bula tawamudu mai na Yalo Tabu.

⁹ Me da kakua kina ni oca ena caka vinaka ni da na tatamusuki ena kena gauna, kevaka eda sega ni datuvu koso.

¹⁰ O koya oqo me da caka vinaka kina vei ira na tamata kecega ena gauna kecega e rawa kina, ka vakauasivi vei ira era lewe ni matavuvale ena vakabauta Vakarisito.

Na i Otioti ni Vakasala kei na Loloma

¹¹ Ni raica mada na mata ni vola lelevu au volavola tiko yani kina ena ligaqu dina.

¹² O ira era vinakata me vinaka walega na kedra i rairai vakayago era sa via vakasaurarataki kemuni mo ni cilivi, o ya me ra kakua kina ni vakararawataki ena vuku ni kauveilatai nei Karisito.

¹³ Ni o ira sara mada ga ka sa cilivi era sega ni dau muria sara na Lawa, ia era qai gadreva ga mo ni cilivi me ra boletaka kina ni o ni sa vakamalumalumu ki na nodra i valavala oqo.

¹⁴ Ia oi au, me kakua sara na ka tani me'u boletaka, na kauveilatai duadua ga ni noda Turaga ko Jisu Karisito; ni sa mate kina vei au na veika vakavuravura ena vuku ni kauveilatai, ka'u sa mate vakakina oi au ki na veika vakavuravura.

¹⁵ E sega ni ka bibi na cili se na tawa cili, na ka bibi ga na bula vakavoui.

¹⁶ Me yaco na vakacegu kei na yalololoma vei ira kece era sa vakayacora tiko na i vakarau oqo, io vei ira kece talega na tamata ni Kalou.

¹⁷ Me kakua tale e dua me qai vakararawataki au mai muri, ni ra sa vakamawe tu ga e yagoqu na i vakatakilakila ni'u sa bobula i Karisito.

¹⁸ Oi kemuni na wekaqu, me tiko ena yalomuni na lolomasavu ni noda Turaga ko Jisu Karisito. Emeni.