Josua 7 - Ai Vola Tabu Ena Vakavakadewa Vou

Valavala Ca i Ekani kei na Kena i Totogi

¹ Era sa talaidredre na Isireli ki na lewa i Jiova me ra kakua sara ni taura e dua na ka a lewai me vakarusai ka sai Ekani ga na luve i Kamai, na luve i Sapiti, na luve i Sira mai na mataqali i Juta na tamata ka taura eso na veiyaya oqo. A sa cudruvi ira sara vakalevu na Isireli ko Jiova.

² Sa qai talai ira eso na tamata o Josua mai Jeriko ki Ai, e dua na koro ena tokalau kei Peceli, volekati Peciaveni. E a vakaroti ira me ra la'ki vakadikeva na vanua taucoko. Ni ra sa vakayacora oti na ka era sa talai kina,

³ era sa lesu tale mai vei Josua, ka tukuna, “E sega soti ni vinakati me da lako kece sara. Me talai ga e rua se tolu na udolu me ra la'ki valuti Ai. Me kakua ni lako kece na mataivalu, e sega soti ni koro levu o Ai.”

⁴ A mani lako cake ga e rauta ni lewe tolu na udolu na Isireli, ia era sa vakamalumalumutaki mai vei ira na kai Ai.

⁵ Era sa vakamatea kina na meca e tolusagavulu kaono na tamata; ka ra vakasavi ira na Isireli mai na matamata ni koro me yacova sara na i kelikeli ni vatu, ka ravuti ira ni ra dro sobu tiko ki baba. Era sa yalolailai ka rere vakalevu na Isireli ena vuku ni ka oqo.

⁶ Ena levu ni nona rarawa, sa qai dresulaka kina na nona i sulu o Josua ka bale sobu vakatoboicu ki na qele, ena mata ni kato ni veiyalayalati i Jiova, ka koto ga e kea me yacova sara na yakavi. Era sa kitaka talega vakakina o ira na qase ni Isireli, ka sova na kuvu ni qele ki uludra.

⁷ Sa qai tukuna o Josua, “Kemuni Jiova! A cava na vuna o ni kauti keimami mai kina ki na tai ni Joritani oqo? O ni vinakata li mo ni soli keimami vei ira na Amoraiti me ra vakarusai keimami? A cava na vuna keimami a sega ni tu ga kina mai na tai kadua ni Joritani?

⁸ Na cava tale me'u qai tukuna, kemuni Jiova, oqo ni ra sa vakanadaku vei ira na meca o ira na Isireli?

⁹ Era na rogoca na kena i tukutuku o ira na kai Kenani kei ira kece ka tiko ena vanua oqo, era na mai wavokiti keimami ka vakamatei keimami kece sara! A cava beka o ni na cakava me taqomaki kina na i rogorogo ni yacamuni?”

¹⁰ Sa qai vosa vei Josua ko Jiova, ka tukuna, “Mata cake mai! A cava o sa davo vakatoboicu tu kina vakaoqo?

¹¹ Sa talaidredre o ira na Isireli, ka ra sa vakacacana na noqu i veiyalayalati kei ira me vaka au a vakaroti ira me ra dina kina. Era sa tara eso na ka vakatabui sa lewai me vakarusai; era sa butako ka vosa lasu, ka biuta vata me nodra i yau.

¹² Oqori sara ga na vuna era sa sega ni vorati ira rawa kina na kedra meca o ira na Isireli. Era sa vakasuka e matadra na meca, me baleta ni sa lewai talega me ra vakarusai! Au sa na sega ni tiko tale kei kemuni, vakavo ga kevaka o ni vakarusa sara na veika sa lewai mo ni kakua ni taura!

¹³ Tucake! Vakasavasavataki ira na tamata! Tukuna vei ira, “Mo ni vakasavasavataki kemuni ka vakarautaki kemuni ena vuku ni ka ena yaco ni mataka; ni sa vosa vakaoqo ko Jiova na Kalou ni Isireli: Oi kemuni na Isireli, sa tu oqori vei kemuni eso na ka au a sa lewa me vakarusai! O ni na sega sara ni vorati ira rawa na kemuni meca me yacova sara ni sa vakarusai na veika oqori!

¹⁴ Mo ni qai lako mai vakamataqali ena mataka lailai. Ia na mataqali au na cavuta me ratou lako mai vakaitokatoka. Na i tokatoka au na cavuta me ratou lako mai vakamatavuvale. Na matavuvale au na cavuta me ra lako mai vakatamata yadua.

¹⁵ Ena vakamai o koya e kune vua na ka sa lewai me vakarusai, kei na nona matavuvale kei na veika kece e taukena, ni sa vakavuna na madua levu e Isireli o koya ka sa beca na noqu veiyalayalati.”

¹⁶ A sa sou ena mataka o Josua, ka kauti ira mai na Isireli me vaka na nodra veimataqali yadua, ka sa digitaki na mataqali i Juta.

¹⁷ A sa kauti ira cake tale na mataqali i Juta, me vaka na nodra dui matavuvale, ka sa digitaki sara na vuvale i Sira. A sa qai kauti ira cake mai na matavuvale i Sira mai na nodra veivuvale, ka sa digitaki na vuvale i Sapiti.

¹⁸ Sa qai kauti ira yadudua mai na tamata ena matavuvale nei Sapiti, ka sa digitaki o Ekani na luvena tagane o Kamai, ka makubui Sapiti.

¹⁹ Sa qai vosa vei Ekani o Josua ka tukuna, “I na luvequ, mo tukuna mada vakadodonu ena mata i Jiova, na Kalou ni Isireli, ka vakatusai iko. Mo tukuna vei au na ka o sa vakayacora. Kakua sara ni tovolea mo vunitaka vei au.”

²⁰ Sa qai sauma o Ekani ka tukuna, “Io, sa dina sara au sa cala ena mata i Jiova, na Kalou ni Isireli, oqo na ka au a cakava.

²¹ Au sa raica ena i binibini ni tokinivalu e dua na kote balavu rairai vinaka ni Papiloni, e rua na kilokaramu na siliva, kei na dua na uma koula ka sivia na veimama ni kilokaramu na kena bibi. Au a domona sara vakalevu na veika kece oqori ka taura. Au sa vunia na ka kece ena loma ni qele ena loma ni noqu valelaca, ka koto sara e ra na siliva.”

²² A sa talai ira sara eso na tamata o Josua, me ra cici yani ki na valelaca, ka kunea ni bulu dina tiko kina, ka koto sara e ra na siliva.

²³ Era sa qai kauta na ka kece o ya mai na valelaca ka kauta vei Josua kei ira kecega na Isireli ka la'ki tevuka ena mata i Jiova.

²⁴ Sa qai lako o Josua kei ira kecega na Isireli, ka kauti Ekani na luve i Sira, vata kei na siliva, na kote balavu, na koula, na luvena tagane kei na luvena yalewa kece, na nona bulumakau, na asa kei na sipi, na nona valelaca kei na veika kecega e taukena, ki na buca i Akori.

²⁵ Sa qai tukuna vakaoqo o Josua, “Na cava o sa kauta mai kina vei keda na leqa bibi vakaoqo? Ena kauta mai vei iko ko Jiova na leqa levu edaidai.” Era sa qai vakaviriki Ekani me mate sara, o ira na tamata kece; ka vakaviriki ka vakamai talega na nona vuvale kei na veika kecega e taukena.

²⁶ Era sa qai binia e delana e dua na i binibini vatu vakaitamera, ka sa tu ga e kea me yacova na siga oqo. Sai koya oqori na vuna ka vakatokai kina na vanua o ya na Buca ni Akori. A sa qai seavu yani na cudru katakata i Jiova.