Josua 6 - Ai Vola Tabu Ena Vakavakadewa Vou

Na Vakarusai nei Jeriko

¹ A sa sogolati matua sara na bai kei Jeriko, ena gauna o ya, ena vukudra na Isireli. A sa sega kina ni rawa vua e dua me curuma yani, se lako tani mai kina.

² Sa qai tukuna vei Josua ko Jiova, “Mo rogoca mada oqo. Au sa soli Jeriko vei iko vata kei na kena tui kei ira na kena mata i valu qaqa.

³ Mo wavokita vakadua na koro, o iko kei ira kece na nomu mata i valu. Mo cakava tiko vakaoqo me siga ono,

⁴ kei na vitu na bete me ratou yadua na davui caka mai na i leu ni me tagane ka lako ki liu ena mata ni kato ni veiyalayalati. Ena i kavitu ni siga o ni na lako wavolita vakavitu kina na koro ka ra uvu davui tiko na bete

⁵ Ni o ni rogoca ni ra sa uvuca vakabalavu na davui, me ra qai kaila vakadomoilevu kece na tamata, ena qai bale sobu na bainikoro. Era na qai lako cake kece na tamata, ka curu vakadodonu yani ki loma ni koro.

⁶ Sa qai kacivi ira vata na bete o Josua na luve i Nuni, ka tukuna, “Mo dou kauta na Kato ni Veiyalayalati kei na vitu na bete me ratou liu ena matamudou ka kauta e yadua na davui.”

⁷ A sa qai tukuna vei ira na Isireli, “Mo ni cavutu ka lako yani; ka yabe wavokita na koro; me ra liu sara tiko na mataivalu yadra, ka tarava yani na Kato ni Veiyalayalati i Jiova.”

⁸ Ia me vaka ni a vakarota vei ira na Isireli o Josua, e ratou a qai lako yani na lewe vitu na bete ka kauta na davui e vitu ena mata i Jiova. E ratou a uvuca lako na nodratou davui, a qai muri iratou tiko yani na Kato ni Veiyalayalati i Jiova.

⁹ O ira na mataivalu yadra era a liu sara vei ira na bete ka uvuca lako na davui. E dua talega na mataivalu yadra era muri tarava yani na Kato ni Veiyalayalati. A uvu tikoga na davui ena gauna kece sara era lako tiko kina.

¹⁰ Ia a vakaroti ira na Isireli o Josua, me ra kakua mada ni kaila, se vakavuna e dua na rorogo, me yacova sara na gauna a qai lewa kina me ra kaila.

¹¹ Sa qai vakarota o koya me ra colata na Kato ni Veiyalayalati i Jiova ka wavokita vakadua na koro; era a qai lesu tale mai ki na keba ka moce kina.

¹² A sa yadra sara vakamataka ena mataka ka tarava o Josua, kei ira talega na bete era a colata na Kato ni Veiyalayalati.

¹³ E ratou sa lako yani na bete e lewe vitu ka kauta e vitu na davui, ena mata ni Kato ni Veiyalayalati i Jiova, ka uvuca lako na nodratou davui. Era sa liu ena matadratou o ira na mataivalu yadra, ka dua talega na mataivalu yadra a muria yani na kato ni veiyalayalati i Jiova. A sa rogo tikoga na domo ni davui.

¹⁴ Era a lako wavokita tale vakadua na koro ena i karua ni siga ka lesu tale ki na nodra keba. Era sa cakava tiko vaka o ya me siga ono.

¹⁵ Era sa sou sara ena mataka caca ena i kavitu ni siga, ka lako wavokita vakavitu na koro me vaka era a sa vakayacora oti. Oqo wale ga na siga era a lako wavokita kina vakavitu na koro.

¹⁶ Ia ena i kavitu ni wavoki, ni ra sa uvuca vakadomoilevu na davui na bete, a qai tukuna vei ira na Isireli o Josua, “Ni kaila! Sa solia vei kemuni ko Jiova na koro oqo!

¹⁷ Me vakarusai vakadua na koro oqo kei na veika kecega sa tu kina me i soro vei Jiova. Ia me vakabulai wale ga na yalewa dautagane o Reapi kei ira na wekana, baleta ni a vunitaki rau na noda yamata.

¹⁸ Mo ni kakua ni taura e dua na ka sa lewai me vakarusai. Kevaka o ni taura e dua na ka, ka sa lewai me vakarusai, o ni na kauta ga mai na leqa kei na rusa ki na noda i tikotiko na Isireli.

¹⁹ Na veika kecega sa caka ena siliva, ena koula, ena parasa, se na kaukamea sa vakatabui me nei Jiova. Me ra maroroi kece ena valeniyau i Jiova.”

²⁰ Era sa qai uvuca na davui na bete, ia ni ra rogoca na domo ni davui na Isireli, era a qai kaila vakadomoilevu. A qai bale sara ki ra na bainikoro kei Jeriko, ka ra curuma yani vakadodonu na koro na Isireli, ka taura.

²¹ Era sa samuti ira kece na tamata ena koro o ya ena nodra i seleiwau, na tagane, na yalewa, na cauravou kei ira na qase. Era a vakamatea talega na bulumakau, na sipi kei na asa.

²² A sa tukuna o Josua vei rau na tamata ka talai me yamata, “Drau lako ki na nona vale na yalewa dautagane, ka kauti koya mai kei ira na lewe ni nona vuvale, me vaka drau a yalataka vua,”

²³ E rau sa qai lako yani ka kauti Reapi tani mai, vata kei tamana, tinana, tuakana tagane, na tacina kei na ka kecega e taukena. Era sa tokitaki iratou tani mai na matavuvale nei Reapi ka la'ki vakatikori iratou ena dua na tikina ena taudaku ni nodra keba na Isireli.

²⁴ Era sa qai vakama na koro taucoko kei na veika kecega a tu kina, ka qai vakavo ga na veika buli ena koula, siliva, parasa kei na kaukamea, era a taura oqo ka biuta ki na valeniyau i Jiova.

²⁵ A sa vakabulai Reapi kei ira na wekana o Josua, ka ni a vunitaki rau na talai me rau la'ki yamata ki Jeriko. A bula maliwai ira na Isireli o Reapi me yacova na siga oqo.

²⁶ Ena gauna o ya, a sa vakarota o Josua e dua na i vakaro bibi ka vaka: “Na cudru i Jiova ena tau vua na tamata sa tovolea me vakaduria tale na koro o Jeriko. O koya sa tara na kena yavu ena mate na nona ulumatua tagane. O koya sa tara na kena matamata ena mate na luvena e gone duadua.”

²⁷ A tiko ga kei Josua ko Jiova ka sa robota na veivanua taucoko na kena i rogorogo.