Josua 4 - Ai Vola Tabu Ena Vakavakadewa Vou

Tuva na Vatu ni Vakananumi

¹ Ni ra lako kosova na uciwai na Joritani o ira na lewe ni matanitu taucoko o Isireli, a qai vosa vei Josua ko Jiova ka tukuna,

² “Mo digitaka e lewe tinikarua na tamata, me ra yadua mai na veimataqali,

³ ka vakaroti ira me ra la'ki kauta mai e tinikarua na vatu mai na lomadonu ni Joritani donuya na vanua era sa duri tu kina na bete. Me ra colata voli na vatu oqo ka la'ki biuta ena vanua o ni na la'ki keba kina ena bogi nikua.”

⁴ A sa kacivi ira na lewe tinikarua na tamata ka sa digitaka oti tu o Josua,

⁵ ka tukuna vei ira, “Mo dou lako ki na Joritani, ka liutaka na Kato ni Veiyalayalati i Jiova na nomuni Kalou ki na loma ni Joritani. Mo dou dui taura e yadua na vatu ka colata mai ena vuku ni mataqali yadua e Isireli.

⁶ Na veivatu kece oqori era na vakananuma kina na Isireli na ka sa vakayacora ko Jiova ena veisiga mai muri; era na taroga vei kemuni o ira na luvemuni na i balebale ni veivatu oqo,

⁷ o ni na qai tukuna vei ira ni a mudu na drodro ni wai ena Joritani ni a takosova na uciwai na kato ni veiyalayalati i Jiova. Na veivatu oqo ena vakananumi ira tiko na Isireli kecega me ra kakua sara ni guilecava na ka a yaco e kea ena siga o ya.

⁸ E ratou sa qai vakayacora na lewe tinikarua me vaka a vakarota o Josua. E ratou a kauta mai na loma ni Joritani e tinikarua na vatu me vaka na i wiliwili ni mataqali e Isireli, me vaka a tukuna vei Josua ko Jiova, ka colata yani ki nodra keba ka biuta kina.

⁹ A sa qai tuvana cake talega o Josua e tinikarua na vatu ena lomadonu ni Joritani, ena vanua era a tucake tu kina o ira na bete era colata tiko na Kato ni Veiyalayalati. (Sa tu ga e kea na veivatu o ya me yacova edaidai.)

¹⁰ Era sa tu ga vakadua na bete era colata tiko na Kato ni Veiyalayalati ena lomadonu ni Joritani, me yacova sara ni ra a vakayacora na Isireli na veika a vakarota vei Josua ko Jiova, me vaka a tukuna vei Josua o Mosese. Era sa kusa rawa na Isireli me ra takoso.

¹¹ Ia ni ra takoso kece, era sa qai colata na kato ni veiyalayalati na bete ka liutaki ira yani na Isireli.

¹² O ira na tagane ena mataqali i Rupeni, Kata kei na veimama ni mataqali i Manasa, era sa vakaiyaragi ni valu ka liutaki ira na Isireli ena takoso, me vaka a vakaroti ira kina o Mosese.

¹³ Sa rauta ni ra lewe 40,000 na tamata sa vakarautaki ki na i valu era sa takoso ki tai kadua ena mata i Jiova, ki na veibuca kei Jeriko me ra la'ki valu kina.

¹⁴ Ena veika sa vakayacora ko Jiova ena siga o ya, a sa vakalevulevui ka dokai sara kina o Josua ena matadra kecega na Isireli. Era sa dokai koya ena gauna kece ni nona bula, me vaka ga a dau vakayacora vei Mosese.

¹⁵ A sa qai vosa vua ko Jiova ka kaya,

¹⁶ Mo vakaroti ira na bete era colata tiko na Kato ni Veiyalayalati me ra cabe mai na Joritani.”

¹⁷ A sa qai vakaroti ira na bete o Josua me ra cabe mai na Joritani.

¹⁸ Ni ra cabe ki tai ka dua na bete, sa qai vakatekivu me drodro tale na wai ni uciwai na Joritani, ka la'ki vuabale kina na batina ruarua me vaka ga e liu.

¹⁹ Era sa lako kosova ka cabe ki na tai kadua ni Joritani na Isireli ena i katini ni siga ena i matai ni vula, ka ra la'ki vakaitikotiko e Kilikali ena tokalau kei Jeriko.

²⁰ Sa qai tuvana e kea o Josua e tinikarua na vatu a kau mai na Joritani.

²¹ A sa vosa vei ira na Isireli o Josua ka tukuna, “Ena gauna mai muri ni ra sa tarogi kemuni o ira na nomuni kawa me baleta na i balebale ni vatu oqo,

²² mo ni tukuna vei ira na veika a yaco ena gauna era kosova kina o ira na Isireli na Joritani ena qele mamaca.

²³ Mo ni tukuna vei ira ni a vakamamacataka na wai ni Joritani ko Jiova na nomuni Kalou ena vukumuni me yacova na nomuni sa yaco kece ki tai kadua, ka oqo me vaka na nona a vakamamacataka na Wasa Damudamu ena vukuda.

²⁴ Ena vuku ni ka oqo, era na kila kina na lewe i vuravura kecega na kaukauwa ni liga i Jiova, ka o ni na qai vakarokorokotaka na nomuni Kalou ko Jiova ka tawa mudu.”