Josua 24 - Ai Vola Tabu Ena Vakavakadewa Vou

Vakavoui ni Veiyalayalati

¹ A sa vakasoqoni ira vata kece na veimataqali ni Isireli ki Sikemi o Josua. A sa kacivi ira na qase, na turaga, na dauveilewai kei ira na vakailesilesi kece e Isireli, ka ra lako mai ki na mata ni Vale ni Kalou.

² Sa qai vosa vakaoqo vei ira na tamata kecega o Josua, “Sai koya oqo na ka sa via vakaraitaka ko Jiova, na Kalou ni Isireli: “Ena gauna makawa sara sa vakaitikotiko na nomuni qase o Tira na tama i Epara-ama kei Neori ena tai kadua ni Uciwai na Euferetisi, ka qarava na veikalou tani eso.

³ Ia au sa qai kauti Epara-ama na nomuni qase mai na vanua ena tai ka dua ni Euferetisi, ka tuberi koya voli ena vanua taucoko o Kenani. Au sa solia vua e levu na nona kawa. Au a soli Aisake vua,

⁴ ka soli Jekope kei Iso vei Aisake. Au a qai solia vei Iso na vanua veidelana o Sia me nona, ia e ratou a lako sobu ki Ijipita o Jekope kei ira na luvena.

⁵ E muri au a qai talai Mosese kei Eroni, ka vakayacora na rarawa levu ki na vanua o Ijipita, ka kauti kemuni tani mai kina.

⁶ Ni'u a kauti ira tani na nomuni qase mai Ijipita, era a cici muri ira o ira na kai Ijipita ena qiqi ni valu kei na mataivalu ose. Ia ni ra yaco ki na Wasa Damudamu o ira na nomuni qase,

⁷ era sa tagi ka kere veivuke vei au. Au sa qai biuta na butobuto ena kemuni veimama kei ira na kai Ijipita. Au a qai cakava na wasawasa me ubi ira ka luvuci ira. O ni sa kila na ka au a cakava vei ira na kai Ijipita. Ni oti o ya o ni a qai mai tiko ena vanua lala ena dua na gauna balavu.

⁸ Ni oti o ya au a qai kauti kemuni ki na nodra vanua na Amoraiti, ka ra tiko ena tai ni tokalau ni Joritani. Era a veivala kei kemuni, ia au a soli ira ki ligamuni, mo ni qaqa. Au a vakarusai ira ena matamuni, ka o ni sa taura ka taukena na nodra vanua.

⁹ Ni vakavakarau o Pelaki na luve i Sipori, na tui Moapi, me valuti Isireli, a talai Balami na luve i Piori, me vakatauca vei kemuni na vosa-ni-cudru.

¹⁰ Ia, au a bese ni rogoci Balami, ka sa vosa vakalougatataki kemuni tiko o koya. Au a vakabulai kemuni mai na ligana.

¹¹ Ni o ni kosova na Joritani, ka lako mai ki Jeriko. Era sa vala kei kemuni na lewe i Jeriko, ka vaka talega kina na Amoraiti, Perisaiti, Kenani, Itaiti, Kakesaiti, Aivaiti kei ira na Jepusaiti, ia au a soli ira ki ligamuni.

¹² Au a vakatala na tina ni oni dau kata me ra liu e matamuni, ka cemuri ira tani mai matamuni, o rau talega na tui, e rua na Amoraiti. O ni a sega ni vala ga ena nomuni i seleiwau kei na dakaititi.

¹³ Au a solia vei kemuni na vanua o ni a sega ni oca kina, kei na veikoro o ni a sega ni tara; o ni sa vakaitikotiko kina, ka kana mai na veivaini kei na veiolive o ni a sega ni tea.’

¹⁴ “Ena vuku ni ka oqo, mo ni rerevaki Jiova, ka qaravi koya ena yalodina kei na yalododonu. Mo ni biuta tani na veikalou era a qarava na nomuni qase mai Mesopotemia kei Ijipita, ka mo ni qaravi Jiova duadua ga.

¹⁵ Ia, o ni sega ni vinakata mo ni qaravi Jiova, mo ni digitaka edaidai o koya mo ni qarava, se nodra veikalou na nomuni qase mai na vanua o Mesopotemia, se na nodra veikalou na Amoraiti o ni sa mai tiko oqo ena nodra vanua. Ia, oi au kei na noqu matavuvale keitou na qaravi Jiova ga.”

¹⁶ Era a qai vosa na tamata, ka tukuna, “Keimami na sega ni laivi Jiova ka la'ki qarava na veikalou tani eso!

¹⁷ Sai Jiova ga na noda Kalou sa kauti ira mai na noda qase vata kei keda mai na vanua ni veivakabobulataki o Ijipita, ka da sarava kece na veicakacaka mana sa vakayacora e matada. Sa taqomaki keda ka maroroi keda ena veivanua kece eda lako kina.

¹⁸ Ena noda gole mai ki ke, sa vakasavi ira tani na Amoraiti era tiko ena vanua oqo ko Jiova. Ena ka oqo, keimami na qaravi Jiova talega; o koya sa neimami Kalou.

¹⁹ Sa vosa vei ira na tamata o Josua, ka tukuna, “O ni na sega ni qaravi Jiova rawa. Sa Kalou savasava o koya ka Kalou vuvu. Ena sega ni vosota na nomuni dauvakau yalomuni kei na nomuni valavala ca.

²⁰ Kevaka o ni biuti Jiova ka qaravi ira na veikalou tani, ena qai vuki mai ka vakarusai kemuni, ka vakawabokotaki kemuni, ka dina ga ni a daucaka vinaka vei kemuni e liu.”

²¹ Era a qai tukuna vei Josua na tamata, “E segai! Keimami na qaravi Jiova ga.”

²² A sa tukuna vei ira o Josua, “O ni sa nomuni i vakadinadina ga oi kemuni ni o ni sa digitaka mo ni qaravi Jiova.” Era a sauma lesu, “Io, keimami sai vakadinadina.”

²³ Sa qai tukuna vei ira o Josua, “Ia mo ni biuta tani na veikalou tani ka ra tiko vei kemuni, ka solia na yalomuni vei Jiova na Kalou ni Isireli.”

²⁴ Era a tukuna vei Josua na Isireli, “Keimami na qaravi Jiova na noda Kalou, ka talairawarawa ki na nona i vakaro.”

²⁵ O koya oqo sa qai cakava kina e dua na veiyalayalati o Josua vata kei ira na Isireli ena siga o ya, ka solia vei ira eso na i vakaro kei na lewa ena vukudra e Sikemi.

²⁶ A sa vola na veivosa kece oqo o Josua ena i vola ni Lawa ni Kalou. Sa qai taura e dua na vatu levu ka vakaduria cake e kea ena ruku ni vu ni oki ena vale tabu i Jiova.

²⁷ Sa qai vosa vei ira kecega na Isireli, ka vaka, “Raica! Na vatu oqo sa na i vakadinadina me beitaki keda. Ni sa rogoca na vatu oqo na vosa kecega ka vosataka vei keda ko Jiova. Ena yaco o koya me i vakadinadina me beitaki kemuni, kevaka o ni na sega ni dina vua na nomuni Kalou.”

²⁸ O koya oqo sa qai vakatalai ira yani na Isireli o Josua, ki na nodra dui votavota ni vanua yadua.

Na Mate nei Josua kei Iliesa

²⁹ Ia ni oti na veika oqo, sa qai mate na tamata ni Kalou o Josua na luve i Nuni, ni sa yabaki dua na drau katini.

³⁰ Era sa buluti koya ena vanua ka nona i votavota, o ya e Timinaca-sera ena vanua veidelana i Ifereimi ena vualiku ni Ulunivanua o Kaasi.

³¹ Era sa qaravi Jiova na Isireli ena gauna kece a bula tiko kina o Josua, ka vakakina ena nodra gauna na qase era sa bula siviti Josua ka ra kila na veika kece sa cakava ko Jiova ena vukudra na Isireli.

³² Ia na sui kece ni yago i Josefa ka ra a kauta mai Ijipita na Isireli, a sa bulu mai Sikemi ena tiki ni vanua a volia o Jekope ena dua na drau na tiki ni siliva mai vei iratou na luve i Amori na tama i Sikemi. A qai yaco me nodra i votavota na luve i Josefa na vanua oqo.

³³ A sa mate talega o Iliesa na luve i Eroni, ka bulu e Kipea, na koro ka toka ena vanua veidelana i Ifereimi, o koya ka votai me nei Finiasi na luvena.