Josua 22 - Ai Vola Tabu Ena Vakavakadewa Vou

Lesu o Ira na Mataqali mai na Tokalau ki na Nodra Vanua

¹ Sa qai kacivi ira vata na lewe ni mataqali i Rupeni, Kata kei na veimama ni mataqali i Manasa o Josua.

² Sa qai tukuna vakaoqo vei ira, “O ni sa vakayacora na veika kece a vakaroti kemuni kina o Mosese na tamata ni Kalou, ka o ni sa muria talega na noqu i vakaro taucoko.

³ Ena veigauna kece oqo, o ni sega ni bau laivi ira na wekamuni na Isireli. O ni sa qarauna sara mo ni muria na lewa kece i Jiova na nomuni Kalou.

⁴ Ia oqo, me vaka na nona vosa ni yalayala, a sa solia vei ira na wekamuni na Isireli ko Jiova na nomuni Kalou, na sautu. Mo ni lesu tale ki na nomuni vuvale ena vanua o ni taura me nomuni, o ya na vanua ena tai tokalau ni Joritani, ka solia vei kemuni o Mosese na tamata ni Kalou.

⁵ Qarauna vinaka, mo ni muria na i vunau ka vakarota vei kemuni o Mosese; mo ni lomani Jiova na nomuni Kalou ka vakayacora na lomana, mo ni muria na nona i vakaro kece ka yalodina tiko vua, ka qaravi koya ena yalomuni kei na lomamuni taucoko.”

⁶ A sa vosa vakalougatataki ira o Josua ka vakasukai ira yani, era a qai dui gole yani ki na nodra i tikotiko.

⁷ E a solia o Mosese e dua na vanua mai Pasani me nodra e dua na veimama ni mataqali i Manasa, ia sa qai solia o Josua na vanua ena ra ni Joritani ki na i karua ni veimama, vata kei ira na veimataqali tale eso ni Isireli.

⁸ Ni vakalesui ira yani ki na nodra i tikotiko o Josua sa vosa vakalougatataki ira, ka tukuna, “Mo ni lesu tale ki na nomuni i tikotiko, vata kei na nomuni yau levu: na nomuni qele ni manumanu yava i va levu, kei na nomuni siliva, koula, parasa, kaukamea, vata kei na i binibini i sulu. Mo ni vota vei ira na wekamuni na i tokinivalu o ni rawata mai vei ira na nomuni meca.”

⁹ Era sa qai lesu tale ki na nodra dui vanua o ira na mataqali i Rupeni, na mataqali i Kata kei na dua na veimama ni mataqali i Manasa. Era sa veitalatala kei ira na vo ni lewe i Isireli mai Sailo ena vanua o Kenani, me ra lako yani ki na nodra vanua, o ya na vanua o Kiliati, era a taukena me vaka sa vakaroti ira kina ko Jiova ena gusu i Mosese.

Cabocabo ni Soro me i Vakananumi

¹⁰ Ni ra yaco, na mataqali i Rupeni, Kata kei na veimama ni mataqali i Manasa, ki Qeliloci ka toka volekati Joritani ena vanua o Kenani, era sa tara e dua na i cabocabonisoro levu, totoka ka lagilagi e bati ni uciwai na Joritani.

¹¹ A qai tukuni yani vei ira na vo ni luve i Isireli, “Mo ni vakarorogo! O ira na lewe ni mataqali i Rupeni, Kata kei na veimama ni mataqali i Manasa, era a tara e dua na i cabocabonisoro e Qeliloci, ena noda tai ni Joritani!”

¹² Ia, ni ra rogoca na i tukutuku o ya o ira na vo ni luve i Isireli, era sa lako taucoko yani ki Sailo, me ra la'ki valuti iratou na mataqali ena tai tokalau ni Joritani.

¹³ Era sa qai talai Finiasi na luve i Iliesa na bete o ira na Isireli me lako vei ira na lewe ni mataqali i Rupeni, Kata, kei na veimama ni mataqali i Manasa, ena vanua o Kiliati;

¹⁴ era sa salavata kaya e lewe tini na turaga ni mataqali, mai na yavusa i Isireli.

¹⁵ Era sa lako yani vei ira na mataqali i Rupeni, Kata kei na veimama ni mataqali i Manasa ena vanua o Kiliati ka tukuna vei ira,

¹⁶ “Sa vosa vakaoqo na matatamata taucoko i Jiova, ‘A cava o ni sa cakava kina na ka ca oqo, mo ni vorata na Kalou ni Isireli? O ni sa vakauyalomuni ka vorati Jiova ni o ni sa tara na i cabocabonisoro oqo me nomuni! O ni sa sega ni muria na nona vosa.

¹⁷ Nanuma na nodra i valavala ca mai Piori, na gauna ka cudruvi ira kina na nona tamata ena mate levu ko Jiova? Eda sa rarawataka tikoga na ka o ya. E se sega beka ni rauti keda na i valavala ca o ya?

¹⁸ O ni sa gole tani li mai vei Jiova? Kevaka o ni vakauyalomuni ka vorati Jiova edaidai, ena cudruvi keda taucoko na lewenivanua e Isireli ni mataka.

¹⁹ Kevaka sa sega ni kilikili me ia na vakacaboisoro ena nomuni vanua, mo ni lako mai ki na vanua i Jiova, na vanua sa tu kina na nona vale tabu, ka mai tawana e dua na vanua vei keimami. Mo ni kakua ga ni vakauyalomuni ka vorati Jiova, se vakatubura mai vei keda na tamata dauvakau yalodra, ni kemuni sa tara tale e dua na i cabocabonisoro tani me i kuri ni cabocabonisoro i Jiova na noda Kalou.

²⁰ Mo ni nanumi Ekani na luve i Sira, ni sa bese ni muria na i vakaro me baleta na veika sa lewai oti me vakarusai. E a cudruvi taucoko na lewe i Isireli, ena vuku ni nona i valavala ca.”

²¹ Era sa qai vosa vei ira na turaga ni veivuvale ni veimataqali ena ra, o ira na lewe ni mataqali i Rupeni, Kata kei na veimama ni mataqali i Manasa, ka vaka,

²² “O koya sa kaukauwa sara, ko Jiova na Kalou! Ko Jiova na nodra Kalou na veikalou! Sa kila o koya. Ia me kila talega o Isireli! Kevaka keimami sa cakava na veika oqo ena loma i keimami ka talaidredre vei Jiova, ia me kakua sara ni qai vo bula e dua vei keimami ena siga edaidai.

²³ Kevaka keimami sa vakanadakui Jiova ka tara cake ga na neimami dui i cabocabonisoro, ka vakacabora kina na i soro kama kei na i madrali laukana, se vakacabora kina na i soro ni veivinakati, ia me qai cudruvi keimami ga kina ko Jiova.

²⁴ Keimami sa sega ni cakava na ka oqo ena vuku ni rere de dua na siga era na tukuna kina na luvemuni vei ira na luve i keimami, “Na cava o ni sa cakava kina na ka oqo vei Jiova na Kalou ni Isireli?

²⁵ Sa biuta tu na uciwai na Joritani ko Jiova me tawasei keimami kina vei kemuni na luve i Rupeni kei ira na luve i Kata! Sa sega na nomuni votavota vei Jiova.” Era qai vakavuna o ira na luvemuni me ra sega ni qaravi Jiova o ira na luve i keimami.

²⁶ Ena vuku ni ka oqo, keimami sa tara cake kina e dua na i cabocabonisoro ka sega ni kena i naki me vakacabori kina na i soro kama se i madrali.

²⁷ Ia sa tara ga me i vakadinadina vei ira na neimami tamata kei ira na nomuni, ka vakakina vei ira na veitabatamata kece era na muri keda mai, ni keimami sa qaravi Jiova talega ena nona vale tabu ena neimami i madrali vakamai, na i soro eso kei na i madrali ni veivinakati. Oqo me ra kakua ni tukuna kina na luvemuni vei ira na luve i keimami, “Sa sega na nomuni votavota vei Jiova.”

²⁸ Keimami sa nanuma kina de mani dina na ka oqo, era na qai tukuna na luve i keimami, ‘Raica! O ira na neimami qase era a tara e dua na i cabocabonisoro i Jiova. E sega ni caka me vakamai kina na i madrali, se na i soro, ia me i vakadinadina ga vei ira na neimami tamata kei ira na nomuni.

²⁹ Keimami na sega sara ni vakadrecike ka vorati Jiova, se bese ni muri koya edaidai mai na kena tarai cake e dua na i cabocabonisoro me vakamai kina na i madrali, se me cabori kina na i madrali laukana, se i soro. Keimami na sega ni tara tale e dua na i cabocabonisoro ka rokova ga na cabocabonisoro i Jiova ka toka ena mata ni nona Valelaca tabu.”

³⁰ Ia ni ra rogoca, na nodra i vakamacala na mataqali i Rupeni, Kata kei na veimama ni mataqali i Manasa, o Finiasi na bete kei ira na turaga ni veimataqali kei ira na i liuliu ni veivuvale ena ra, era sa vakacegui.

³¹ Sa qai vosa vei ira na Rupeni, na Kata kei ira na Manasa, o Finiasi na bete na luve i Iliesa ka tukuna, “Eda sa qai kila edaidai ni sa tiko kei keda ko Jiova. O ni a sega ni vakauyalomuni mo ni vorati koya, ka o ni sa vakabulai keda na lewe i Isireli mai na cudru i Jiova.”

³² Sa qai lesu tale o Finiasi na bete na luve i Iliesa kei ira na i liuliu ki Kenani, vei ira na Isireli me ra la'ki vakasavu i tukutuku kina ka biuti ira tu yani na mataqali Rupeni kei Kata ena vanua o Kiliati.

³³ Era sa vakacegui na Isireli ka vakavinavinaka vua na Kalou. A sega tale ni qai toso i na veivosakitaki ni nodra la'ki valuta ka vakarusa na vanua era tawana na mataqali i Rupeni kei Kata.

³⁴ Era sa vakatoka na i cabocabonisoro oqo na mataqali i Rupeni kei Kata me o ‘Vakadinadina’ baleta ni ra tukuna, “Na i cabocabonisoro oqo sai vakadinadina vei keimami ni sa Kalou ko Jiova.”