Josua 21 - Ai Vola Tabu Ena Vakavakadewa Vou

Na Nodra Veikoro na Livai

¹ Era sa qai lako cake vei Iliesa na bete levu, kei Josua na luve i Nuni, kei ira talega na i liuliu ni veivuvale ena mataqali kece i Isireli, o ira na i liuliu ni veivuvale ena mataqali i Livai.

² Era sa vosa vei rau mai Sailo ena vanua o Kenani, ka tukuna, “E a vakarota ko Jiova ena gusu i Mosese me soli vei keimami eso na koro me keimami tiko kina kei na vanua veico e volita me ra maroroi kina na neimami manumanu yava i va.”

³ Ia, me vaka ga na lewa i Jiova, era a solia na Isireli vei ira na kawa i Livai eso na koro kei na vanua veico ka wavolita, mai na nodra i votavota.

⁴ Sa votai taumada na nodra veikoro na veivuvale i Koaca. Na veivuvale ka ra kawa mai vei Eroni na bete, a soli vei ira e tini katolu na koro lelevu ena loma ni nodra vanua na mataqali i Juta, Simione, kei Penijamini.

⁵ Na vo ni veivuvale i Koaca, a soli vei ira e tini na koro lelevu ena loma ni nodra vanua na mataqali i Ifereimi, Tani, kei na veimama ni mataqali i Manasa ena tai i ra ni Joritani.

⁶ Ki na veivuvale i Kerisoni, a soli kina e tini katolu na koro lelevu mai na nodra vanua na mataqali i Isikari, Aseri, Navitalai, kei na veimama ni mataqali i Manasa e Pasani.

⁷ E a soli e tinikarua na koro lelevu ena loma ni nodra vanua na mataqali i Rupeni, Kata, kei Sevuloni, me nodra na veivuvale i Merari.

⁸ Era sa vota vei ira na Livai o ira na Isireli na veikoro kece oqo kei na kedra vanua veico ena vakawiri madigi me vaka a vakarota ko Jiova ena gusu i Mosese.

⁹ Oqo na yacadra na veikoro mai na nodra vanua na mataqali i Juta, kei na mataqali i Simione, ka soli me nodra,

¹⁰ na kawa i Eroni, era lewe ni veivuvale i Koaca, ka kawa mai vei Livai. E a votai e liu na nodra i votavota.

¹¹ E a soli vei ira na koro levu i Kiriarapa o Arapa na tama i Anaki, ka vakatokai o Epironi edaidai, ka toka ena vanua veidelana e Juta, a soli vata kei na vanua veico ka wavolita.

¹² Ia, na kena vanua kei na kena veikoro lalai sa soli oti vei Kelevi na luve i Jifune me nona i votavota.

¹³ Me i kuri kei Epironi e dua vei ira na koro ni drodro, sa votai me nodra na kawa i Eroni na veikoro lelevu kei na kedra vanua veico kei Lipina,

¹⁴ Jatiri, Esitimoa,

¹⁵ Oloni, Tipiri,

¹⁶ Eini, Juta, kei Peci Semesi. Sa ciwa na koro lelevu mai na mataqali i Juta kei na mataqali i Simione.

¹⁷ E a soli vei ira mai na nodra vanua na mataqali i Penijamini e va na koro lelevu: o Kipioni, Kipa,

¹⁸ Anacoci, kei Alimoni, vata kei na vanua veico e dui wavoliti ira.

¹⁹ Sa tini katolu taucoko na koro lelevu, vata kei na kedra dui vanua veico, sa soli vei ira na bete, na kawa i Eroni.

²⁰ O ira na vo ni veivuvale i Livai ena kawa i Koaca, sa soli vei ira eso na koro ena nodra vanua na mataqali i Ifereimi.

²¹ A sa soli vei ira e va na koro: o Sikemi e dua vei ira na koro ni drodro, ka toka ena vanua veidelana e Ifereimi, vata kei na kena vanua veico; kei Keseri,

²² Kipiseimi, kei Peci Oroni, vata kei na vanua veico e dui wavoliti ira.

²³ E a soli vei ira mai na mataqali i Tani e va na koro: o Ilitike, Kipiconi, vata kei na vanua veico e wavolita.

²⁴ O Eijaloni kei Kacarimoni kei na vanua veico e dui wavolita.

²⁵ Mai vei ira na veimama ni mataqali i Manasa ena tai ra ni Joritani, e rua na koro: Tenaki kei Kacarimoni vata kei vanua veico a wavoliti rau.

²⁶ E tini taucoko na koro kei na kedra veivanua veico sa soli me nodra na veivuvale na luve i Koaca.

²⁷ A sa dua tale na kedra i wase na Livai, o ira na luve i Kerisoni. E a soli vei ira e rua na koro mai na nodra vanua na veimama ni mataqali i Manasa ena tai tokalau ni Joritani: o Kolani e Pasani e dua vei ira na koro ni drodro, kei Pesitira, vata kei na vanua veico, sa wavoliti rau.

²⁸ Era a taura mai vei ira na mataqali i Isikari e va na koro: o Kisioni, Tapiraci,

²⁹ Jarimoce, kei Enikanimi, vata kei na vanua veico a dui wavoliti iratou.

³⁰ A sa votai vei ira mai na mataqali i Aseri, e va na koro: o Misali, Apitoni,

³¹ Elikaci kei Riopi, vata kei na vanua veico a dui wavoliti iratou.

³² Mai na nodra vanua na mataqali i Navitalai, era a taura mai kina e tolu na koro: o Ketesi e Kalili e dua vei ira na koro ni drodro, o Emoci-tori kei Karitani, vata kei na vanua veico e wavoliti iratou.

³³ Era sa taura o ira kece na veimatavuvale i Kerisoni e tini katolu na koro, vata kei na kedra dui vanua veico.

³⁴ Vei ira na vo ni Livai, o ya o ira na luve i Merari, sa soli vei ira na mataqali i Sevuloni e va na koro: o Jokiniame, Karita,

³⁵ Timina, kei Neelai, vata kei na vanua veico a dui wavoliti iratou.

³⁶ A sa soli vei ira mai na mataqali i Rupeni e va na koro: o Peseri, Jeasa,

³⁷ Kitemoci, kei Mefeaci, vata kei na kedra dui vanua veico.

³⁸ E a soli vei ira mai na mataqali i Kata e va na koro: o Remoci e Kiliati, e dua vei ira na koro i drodro, Meeneimi,

³⁹ Esiponi, kei Jaseri, vata kei na vanua veico a dui wavoliti iratou.

⁴⁰ A sa rauta ni tinikarua taucoko na koro sa votai vei ira na luve i Merari, oqo o ira na vo ni vuvale ni mataqali i Livai.

⁴¹ Na nodra koro na Livai ena loma ni nodra vanua na Isireli, e vasagavulu kawalu taucoko, vata kei na vanua veico dui wavoliti ira.

⁴² Na veikoro yadua oqo a dui tu na kena vanua veico.

Taukena na Vanua Yalataki o Isireli

⁴³ A sa solia vakaoqo ko Jiova na vanua taucoko vei ira na Isireli me vaka sa yalataka vei ira na nodra qase ni na solia me nodra. Ia ni ra sa taukena, era a lako yani ka vakaitikotiko kina.

⁴⁴ Sa qai solia vei ira ko Jiova na sautu ena vanua taucoko me vaka sara ga a yalataka vei ira na nodra qase. A sa sega sara ni dua vei ira na nodra meca me a kaukauwa cake me vorati ira, baleta ni a solia vei ira na Isireli ko Jiova me ra kaukauwa vei ira kece na nodra meca.

⁴⁵ A sa vakayacora kece sara ko Jiova na veika vinaka kece sa yalataka vei ira na Isireli.