Josua 20 - Ai Vola Tabu Ena Vakavakadewa Vou

Na Koro ni Drodro ni Valu

¹ A sa tukuna vei Josua ko Jiova ka vaka,

² “Mo tukuna vei ira na Isireli, Ni digitaka na koro ni drodro, me vaka au a tukuna oti vei kemuni ena gusu i Mosese,

³ O koya oqo kevaka e dua na tamata sa vakamatea e dua na tamata ka sega ni nakita, ka yaco ena dela ni vakacalaka, me qai dro kina, o koya mai vua ka via sauma na nona dra na mate.

⁴ Me sa dro kina o koya sa veivakamatei, ka la'ki tu ena matamata ni koro, ka vakamacalataka na nona vakacalaka vei ira na qase ni koro o ya, ka me qai kau o koya sa cala ki na loma ni koro, ki na tikina sa soli vua ka me tiko kei ira.

⁵ Ia kevaka sa muri koya tiko yani o koya ka via sauma na dra, me ra qai kakua ni soli koya ka laba, baleta ni a vakamatei na wekana ena vakacalaka ka, ka ni rau a sega ni veimecaki e liu.

⁶ Ia na tamata sa laba me qai tiko ga ena koro o ya me yacova ni sa vakayacori na veilewai mai vei ira na i soqosoqo, me yacova sara na nona mate na bete levu ka bete tiko ena gauna o ya me sa na qai suka tale na tamata sa laba ki nodratou, ki na koro sa vakayacori kina na cala o ya.

⁷ Ni ra sa mani digitaki! Ketesi e Kalili, ena vanua veidelana kei Navitalai, o Sikemi ena vanua veidelana o Ifereimi kei Kiriaci Aripa, o ya o Epironi ena vanua i Juta.

⁸ Ia ena tai ni Joritani ki na tokalau kei Jeriko, a digitaki kina na koro o Pesa ena vanua lala ni veiulunivanua vakatautauvata ena mataqali i Rupeni kei Remoci mai Kiliati ena nodra vanua na mataqali i Kata kei Kolani e Pasani ena nodra vanua na Manasa.

⁹ Sa i ira oqo na veikoro ni drodro a digitaki me baleti ira na Isireli kei ira talega na vulagi era a vakaitikotiko ena nodra vanua, ia kevaka e dua e vakamatea e dua ka sega ni nakita, sa rawa me dro ki na veikoro ni drodro oqo, ka me rawa ni levea kina na veivakamatei mai vei ira era via sauma na dra i koya a mate, me yacova ni sa lewai o koya mai vei ira na i soqosoqo.