Josua 17 - Ai Vola Tabu Ena Vakavakadewa Vou

Nodra Vanua na Manasa ena Ra ni Joritani

¹ E dua na tiki ni vanua ena tai i ra ni Joritani, sa votai vei ira eso na vuvale mai na kawa i Manasa na ulumatua i Josefa. O Mekiri, na tama i Kiliati, a tamata qaqa ni valu, ka ulumatua vei iratou na luve i Manasa, a votai me nona o Kiliati kei Pasani, ena tai tokalau ni Joritani.

² Na vanua ena tai i ra ni Joritani sa votai vei iratou na vo ni luve i Manasa: o Epiesa, Eleki, Esireli, Sikemi, Eferi kei Simita. Oqo o iratou na tagane ena kawa i Manasa na luve i Josefa, ena nodratou dui tokatoka.

³ O Silovati na luve i Eferi, na luve i Kiliati, na luve i Mekiri, na luve i Manasa, a sega na luvena tagane, a so ga na luvena yalewa. Na yacadratou o Mala, Noa, Okila, Milika kei Teresia.

⁴ E ratou a lako vei Eliesa na bete, kei Josua na luve i Nuni, kei ira na i liuliu ka tukuna, “Sa vakarota vei Mosese ko Jiova me soli vei keitou, me vaka sa soli vei ira na weka i keitou tagane, e dua na tiki ni qele me keitou taukena.” Ia, me vaka ga na i vakaro i Jiova, a soli talega vei iratou na qele me vakataki ira na wekadratou tagane.

⁵ Na i votavota i Manasa a kovuti vata kina e tini na i votavota ni qele ena tai i ra ni Joritani, me i kuri ni vanua o Kiliati kei Pasani ena tai tokalau ni Joritani,

⁶ baleta ni wasei talega e dua na nodratou i votavota na yalewa mai na nodra i votavota na tagane. Sa nodra na vo ni kawa i Manasa na vanua o Kiliati.

⁷ Na i yalayala ni vanua i Manasa e vakatekivu mai Aseri me yaco ki Mikimecaci ena tokalau kei Sikemi. Sa qai gole ki na ceva na i yalayala me okati ira na kai Enitapua.

⁸ Sa nodra na Manasa na vanua o Tapua, ia ena nodra na kawa i Ifereimi na koro o Tapua ka koto ena kena i yalayala.

⁹ Sa qai lako sobu na kena i yalayala ki na uciwai o Kana. Na veikoro lelevu ena ceva ni uciwai e nei Ifereimi, e dina ga ni ra koro ena loma ni nodra vanua na Manasa. Na i yalayala ni vanua i Manasa e cici muria na tai vualiku ni uciwai me tavutu sara yani ki na Wasa Meditereni.

¹⁰ Sa nodra na Ifereimi na vanua ena ceva, ka nei Manasa na vanua ena vualiku, ia sa kedrau i yalayala ena ra na Wasa Meditereni. Ena vualiku ni vua-i-ra o Aseri, kei Isikari ena vua-i-cake.

¹¹ Ena loma ni vanua o Isikari kei Aseri, sa nodra na Manasa o Peci-siani, Ipiliami, vata kei na veikoro lalai kece ka voliti rau, ka vakakina o Doa ena baravi, Edoa, Tanaki, Mekito kei na kena veikoro lalai.

¹² Era a sega ni vakasavi ira tani rawa na lewe ni veikoro o ya o ira na Manasa, ka ra sa mani tawana tikoga o ira na kai Kenani.

¹³ Ni ra sa tubu me kaukauwa o ira na Isireli, era sa sega ga ni vakasavi ira tani na kai Kenani, ia era sa vakasaurarataki ira ga me ra cakacaka vei ira.

Vakaduiduile na Kawa i Josefa

¹⁴ Era sa qai vosa vei Josua na kawa i Josefa, ka tukuna, “Na cava o sa solia kina vei keimami e dua ga na i votavota ni qele me keimami taukena vata? Keimami sa lewe levu sara, ka ni sa vakalougatataki keimami ko Jiova.”

¹⁵ Sa qai tukuna vei ira o Josua, “Kevaka sa lewe levu sara na kemuni wiliwili, ka lailai vei kemuni na vanua veidelana o Ifereimi, ia ni lako ki na veikau ka caramaka me nomuni na nodra vanua na Perisaiti kei ira na Refaimi.”

¹⁶ Era a qai tukuna na luve i Josefa, “E qiqo ka lailai sara vei keimami na vanua veidelana; ia era vaqiqi ni valu kaukamea o ira na kai Kenani ka ra tiko e buca. E vaka talega kina o ira na kai Kenani e Peci-siani kei na kena veikoro ka tiko ena buca o Jesireli.”

¹⁷ Sa qai vosa o Josua vei ira na mataqali i Ifereimi kei na mataqali i Manasa, ka tukuna, “O ni sa lewe levu vakaidina, ka o ni sa kaukauwa ka qaqa. Ena sega ni dua wale ga na i wasewase me nomuni votavota.

¹⁸ Ena nomuni talega na vanua e veidelana. E dina ga ni veikau tu, ia mo ni caramaka ka taukena mai na dua na muana ki na dua tale. Ia, o ira na kai Kenani, mo ni vakasavi ira tani, veitalia ga ni ra kaukauwa ka vaqiqi ni valu kaukamea.