Josua 15 - Ai Vola Tabu Ena Vakavakadewa Vou

Vanua e Nodra na Mataqali Juta

¹ Sa vakaoqo na vanua ka votai me nodra na veivuvale ena mataqali i Juta. Na i yalayala ni nodra vanua ena ceva, sa tekivu sara mai na vanua ka yawa duadua ki na ceva ni vanua lala o Sini.

² A sa vakatekivu na kena i yalayala oqo ena ceva, mai na ceva ni Waitui Mate,

³ ka qai gole vaka ki na ceva me tekivu mai na i curucuru o Akirapimi ka lako yani ki Sini. Sa cici sobu ena ceva kei Katesi Banea, me siviti Asironi, cabe ki Ata, ka gole vaka ki Karika,

⁴ Sa lako yani ki Esimoni, ka muria na uciwai ena i yalayala kei Ijipita ki na Wasa Meditereni. O ya na i yalayala kei Juta ki na ceva.

⁵ Ia na kena i yalayala ki na tokalau na Waitui Mate, me yaco sara ki na vanua e rau sota kina kei na gusu ni wai na Joritani. A tekivu e kea na kena i yalayala mai na vualiku,

⁶ ka tete yani vaka ki Peci Okila, ka cici vaka ki na vualiku ni tokaitua era sarava sobu tu na Buca o Joritani.

⁷ Sa qai cabe na i yalayala mai na Buca i Akori ka lako cake ki Tepiri, ka gole vaka ki Kilikali ena vualiku, na koro ka qarava na i curucuru o Atumimi ena ceva ni qakilo. Sa vakamuria cake me yaco sara ki na mata ni wai mai Enisemesi ka basika ki Enirokeli,

⁸ ka cabeta cake na buca i Peniinomi ena ceva ni baba ka toka kina o Jerusalemi, na nodra koro na Jepusaiti. Mai kea a gole cake na i yalayala ki na dela ni ulunivanua ka toka ena ra ni Buca o Inomi ena ucu ni Buca o Refaimi ka gole ki na vualiku.

⁹ Sa qai gole vakadodonu mai na dela ni ulunivanua ki na veivurevure ni wai i Nefitoa, ka lako yani ki na veikoro volekata na ulunivanua o Efironi. Mai kea a gole na i yalayala vaka ki Beala se o Kiriaci Jiarimi,

¹⁰ ka wavoki yani vaka ki na ra kei Beala ka gole yani ki na vanua veidelana o Sia, ka muria na vualiku ni yasa ni ulunivanua o Jiarimi se, o Kisaloni, ka gole sobu ki Pecisemesi ka takoso yani ki Timina.

¹¹ Mai kea sa gole yani na i yalayala ki na ulunivanua ena vualiku kei Ekironi, gole vaka ki Sikironi, sivita na ulunivanua o Beala, gole yani ki Japinieli ka yaco sara na i yalayala ki wasawasa.

¹² Na kena i yalayala ena ra na baravi ni Wasa Meditereni. Sai koya oqori na i yalayala ni vanua ka kovuta na nodra i votavota na lewe ni veivuvale ni mataqali i Juta.

Tawana na Nona Vanua o Kelevi

¹³ Me vaka ni sa vakarota vua ko Jiova, a solia o Josua e dua na qele mai na nodra i votavota na Juta me nei Kelevi na luve i Jifune tagane. A sa soli vua o Epironi na koro i Aripa na tama i Anaki.

¹⁴ Sa vakasavi iratou tani na kawa i Anaki mai Epironi o Kelevi, o ya o iratou na mataqali i Sesei, Eimani, kei na nei Talimei.

¹⁵ Mai kea sa lako yani me valuti ira na kai Tepiri. Na koro levu ka yacana e liu o Kiriaci-seferi.

¹⁶ Sa qai tukuna o Kelevi, “Au na soli Akesa na luvequ yalewa me watina na tamata ena valuti Kiriaci-seferi ka vakamalumalumutaka.”

¹⁷ Sa qai vakamalumalumutaka na koro o ya o Ocinieli na luve i Kenasi, ka sa soli Akesa vua o Kelevi me watina.

¹⁸ Ena siga ni vakamau a vakauqeti Akesa o Ocinieli me kerea vei tamana e dua na tiki ni qele. A siro sobu mai na nona asa o Akesa, ka tarogi koya o Kelevi, se cava e vinakata.

¹⁹ A sauma o Akesa ka tukuna, “Mo cakava mada ena vukuqu e dua na ka. Me vaka ni o a solia oti vei au e dua na tiki ni qele ena vanua o Nejevi, mo solia talega eso na i vurevure ni wai.” A qai solia vua o Kelevi na i vurevure ni wai e cake kei na kena e ra.

Na Veikoro Lelevu e Juta

²⁰ Oqo na vanua ka soli ki na veivuvale ena mataqali i Juta, me nodra i votavota.

²¹ Sai ira oqo na nodra koro lelevu na Juta ena ceva sara e ra ni nodra vanua, ka toka voleka yani ki na i yalayala kei Itomi: o Kapisieli, Eteri, kei Jakuri,

²² Kina, Timona, Atiata,

²³ Ketesi, Asori, Ecinani,

²⁴ Sifi, Telemi, Paloci,

²⁵ Asorietata, Kiriociesironi o ya o Asori,

²⁶ Amani, Sema, Molata,

²⁷ Asarikata, Esimoni, Pecipaleti,

²⁸ Asarisuali, Perisepa, Piseocea,

²⁹ Beala, Iimi, Esemi,

³⁰ Elitolati, Kisili, Orima,

³¹ Sikilaki, Matimana, Sanisana,

³² Lipaoci, Silimi, Eini, kei Rimoni. E ruasagavulu kaciwa taucoko na koro lelevu kei na kedra veikoro lalai ka tu vakavolivoliti ira.

³³ Na veikoro ka ra koto ena buca, o Esitaoli, Sora, Esina,

³⁴ Sanoa, Enikanimi, Tapua, Enami,

³⁵ Jarimoce, Etulama, Soko, Aseka,

³⁶ Saceimi, Eticeimi, Kitera, kei Kiteroceimi. Na kena levu e tini ka va na koro lelevu kei na kedra veikoro lalai ka koto volita.

³⁷ O Sinani, Etasa, Mekitalikata,

³⁸ Tilani, Misipe, Jokicieli,

³⁹ Lakisi, Posikaci, Ekiloni,

⁴⁰ Kaponi, Lamami, Kicilisi,

⁴¹ Kiteroci, Pecitakoni, Naama, kei Maketa. E tini kaono na koro lelevu kei na veikoro lalai ka ra tu volita.

⁴² O Lipina, Eceri, Asani,

⁴³ Ipita, Esena, Nisipa,

⁴⁴ Keila, Ekisipi, kei Maresa. Na kena levu e ciwa na koro lelevu kei na veikoro lalai ka tu volita.

⁴⁵ O Ekironi kei na kena veikoro lalai kece sara,

⁴⁶ kei na veikoro lelevu kei na veikoro lalai volekati Asitoti, mai Ekironi ki na Wasa Meditereni.

⁴⁷ O Asitoti kei Qasa, vata kei na kedra veikoro lelevu kei na veikoro lalai, me yaco ki na dua na uciwai ena i yalayala kei Ijipita kei na baravi ni Wasa Meditereni.

⁴⁸ E koto ena vanua veidelana na koro o Samiri, Jatiri, Soko,

⁴⁹ Tana, Kiriaci-sana se o Tepiri,

⁵⁰ Anapi, Esitimoa, Animi,

⁵¹ Qoseni, Oloni kei Kilo. E tinikadua kece na koro lelevu kei na kedra veikoro lalai ka voliti ira.

⁵² O Erapi, Tuma, Esani,

⁵³ Janimi, Pecitapua, Efika

⁵⁴ Umita, Kiriaci Aripa, se o Epironi kei Siori: e ciwa taucoko na koro lelevu kei na kedra veikoro lalai.

⁵⁵ O Maoni, Kameli, Sifi, Juta,

⁵⁶ Jesireli, Joketiami, Sanoa,

⁵⁷ Keini, Kipea, kei Timina; e tiki na koro lelevu kei na kedra veikoro lalai.

⁵⁸ O Aluli, Pecisuri, Kitori,

⁵⁹ Meeraci, Pecianoci kei Elitikoni; e ono na koro lelevu kei na kena veikoro lalai.

⁶⁰ O Kiriaci Peali se o Kiriaci Jiarimi, kei Rapa; e rua na koro lelevu kei na kedra veikoro lalai ka koto volita.

⁶¹ Ena vanua lala o iratou o Peciarapa, Mitini, Sikaka,

⁶² Nipisani, na Koro ni Masima, kei Eniketi: e ono na koro lelevu kei na veikoro lalai era koto volita.

⁶³ Ia era mani sega ni vakasavi ira tani rawa na Jepusaiti era a tiko e Jerusalemi o ira na Juta. Era tiko ga na Jepusaiti e Jerusalemi vata kei ira na kai Juta me yacova na siga edaidai.