Josua 14 - Ai Vola Tabu Ena Vakavakadewa Vou

Wasewase ni Vanua ena Ra ni Joritani

¹ Oqo na veitiki ni vanua a soli vei ira na Isireli me nodra i votavota ena vanua o Kenani, me vaka sa vota vei ira na veimataqali e Isireli o Eliesa na bete, kei Josua na luve i Nuni kei ira na i liuliu ni mataqali.

² Me vaka na i vakaro i Jiova vei Mosese, e sa votai na nodra vanua na ciwa veimama na mataqali ena ra ni uciwai na Joritani ena vakawiri madigi.

³ A sa solia oti o Mosese na nodra i votavota na rua veimama na mataqali ena tokalau ni Joritani, ia e sa sega ga ni solia o koya e dua na vanua vei ira na Livai,

⁴ ka ni sa rua na nodra mataqali na kawa i Josefa: o Manasa kei Ifereimi. E a sega ni soli vei ira na Livai e dua na i wase ni qele, ia sa soli ga me nodra eso na koro me ra tiko kina, kei na vanua veico eso me kana kina na nodra manumanu yava i va.

⁵ Era sa wasea na qele o ira na Isireli me vaka sa vakaroti Mosese kina ko Jiova.

Soli na Vanua o Epironi vei Kelevi

⁶ Ena dua na siga, era sa lako mai vei Josua e Kilikali eso na tamata mai na mataqali i Juta. A dua vei ira, o Kelevi na luve i Jifune, a sa tukuna vei Josua, “O sa kila na vosa sa tukuna ko Jiova vei Mosese na tamata ni Kalou mai Katesi Banea me baleti kedaru.

⁷ Au a yabaki vasagavulu ena gauna sa talai au kina na tamata ni Kalou o Mosese ki Katesi Banea me'u mai yamata ena vanua oqo. Au a qai kauta lesu mai vua na i tukutuku dina.

⁸ Ia, o iratou na wekaqu keitou a lako vata e ratou a vakayalolailaitaki ira na tamata me ra rere vakalevu. Ia, au a yalodina ka talairawarawa ga vei Jiova na noqu Kalou ena veika au cakava.

⁹ Ena vuku ni ka o ya, sa yalataka kina o Mosese vei au kei ira na luvequ me solia vakaidina me neitou i votavota na vanua sa butuka na yavaqu.

¹⁰ Ia oqo, raica, sa oti yani e vasagavulu-kalima na yabaki mai na siga ka cavuta kina na vosa o ya vei Mosese ko Jiova. E a yaco na ka o ya ena gauna era lako voli kina na Isireli ena loma ni vanua lala, ia sa vakabulai au tiko ko Jiova mai na siga o ya me yacova mai na siga oqo, me vaka na nona vosa ni yalayala. Raici au mada! Au sa yabaki 85 oqo

¹¹ ka'u se kaukauwa vinaka tikoga me vaka na noqu kaukauwa ena siga ka veitalai yani kina o Mosese. Au se rawa talega ni la'ki vala se cakava eso tale na ka.

¹² Ia oqo, mo solia vei au na vanua veidelana oqo me vaka sa yalataka vei au ko Jiova ena siga o ya. O a rogoca talega o iko ni a tukuni ena siga o ya ni ra tiko mai kea na kawa i Anaki kei na nodra koro lelevu sa vakabai wavoki; ia de rairai na tiko vata kei au ko Jiova, ka'u na qai vakasevi ira tani, me vaka ga na nona vosa.”

¹³ Sa qai vosa vakalougatataki Kelevi na luve i Jifune o Josua ka soli Epironi vua me nona i votavota.

¹⁴ Era sa taukeni Epironi tikoga na kawa i Kelevi na luve i Jifune na Kenisaiti, ena vuku ni nona a talairawarawa ena yalodina vua ko Jiova na Kalou ni Isireli.

¹⁵ E liu, a vakatokai voli o Epironi me koro i Aripa. (O Aripa e kilai ni nodra qaqa rogo levu duadua na kai Anaki.) Sa qai yaco na sautu ena vanua.