Josua 13 - Ai Vola Tabu Ena Vakavakadewa Vou

Na Veivanua vaka-Kenani me Vakadrukai

¹ A sa qase sara o Josua. Sa qai vosa vua ko Jiova, ka tukuna, “O sa qase sara, ia e sa levu tu na vanua me rawai ka taukeni.

² Oqo na veivanua ka sa vo tu: Na nodra veivanua kece na kai Filisitia kei na nodra vanua kece na kai Kesuri,

³ ka vakakina na nodra vanua na Avimi ena ceva. Na vanua kece me tekivu mai na uciwai o Siori, ena i yalayala kei Ijipita ka gole cake ki na vualiku ki na i yalayala kei Ekironi ka sa dau kilai tu me vanua vaka-Kenani; o ira talega na tui Filisitia ka vakaitikotiko mai Kasa, Esitoti, Esikeloni, Kaca kei Ekironi.

⁴ Na nodra vanua kece na kai Kenani kei Meara ka qali vei ira na kai Sitoni, me yaco sara ki Afeki, ena nodra i yalayala ni vanua na Amoraiti,

⁵ na nodra vanua na Kipali; o Lepanoni taucoko ki na tokalau me vakatekivu mai Peali-kata ena ceva ni ulunivanua o Erimoni me yaco sara ki na i curucuru ki Emaci.

⁶ Oqo era wili kina na nodra vanua taucoko na kai Sitoni ka vakaitikotiko ena vanua veidelana ena maliwa ni ulunivanua o Lepanoni kei Masirifoci-meimi. Au na vakasavi ira tani ni ra sa toso tiko yani na Isireli. Mo wasea sara na vanua o ya vei Isireli me vaka au sa vakaroti iko kina.

⁷ Ia mo wasea na vanua oqo vei ira na lewe ciwa na mataqali kei na veimama ni mataqali i Manasa, me ra taukena me nodra.”

Wasewase ni Vanua ena Tokalau ni Joritani

⁸ E ratou sa taura oti na nodratou vanua o iratou na mataqali i Rupeni, kei Kata kei na dua na veimama ni mataqali i Manasa ena tai ni tokalau ni Joritani, me vaka a solia o Mosese na tamata ni Kalou.

⁹ Na i yalayala ni nodra vanua sa tete yani vaka ki Aroeri ena yasa ni buca o Arinoni, kei na koro ka koto ena lomadonu ni buca o ya kei na vanua cecere me tekivu mai Meteva ka yaco yani ki Tiponi;

¹⁰ ka gole yani vaka ki na i yalayala kei Amoni, ka kovuta na koro kece ka liutaka e liu o Sioni na nodra tui na Amoraiti, ka vakaitikotiko mai Esiponi.

¹¹ A sa wili talega kina o Kiliati, kei na yasana era sa tiko kina na kai Kesuri kei ira na kai Meka, na ulunivanua taucoko o Erimoni kei Pasani taucoko me yaco yani ki Salika.

¹² A sa wili talega kina na matanitu i Oki, na kedra i otioti na Refaimi, o koya ka veiliutaki mai Aseteroci kei Etirei. E a vakamalumalumutaki ira oqo o Mosese, ka vakasavi ira tani.

¹³ Ia era sa sega ga ni vakasavi ira tani na kai Kesuri kei ira na kai Meeka, o ira na Isireli, ka rau sa tiko ga e Isireli me yacova na siga oqo.

¹⁴ E a sega ni solia o Mosese e dua na vanua ki na mataqali i Livai. Era sa taura ga me nodra e dua na i wase ni veika sa vakacabori ena bukawaqa vei Jiova, me vaka sa vakaroti Mosese kina ko Jiova.

Vanua e Nodra na Mataqali Rupeni

¹⁵ A sa solia o Mosese e dua na tiki ni vanua vei ira na nodra veivuvale na mataqali i Rupeni me ra taukena.

¹⁶ Na i yalayala ni nodra vanua sa kovuti Aroeri ena i yalayala ni buca i Arinoni, na koro ena lomadonu ni buca o ya, kei na vanua cecere kece wavokiti Meteva,

¹⁷ ka okati kina o Esiponi kei na veikoro kece ena vanua cecere: o Tiponi, o Pamoci-peali kei Peaci-pealimioni,

¹⁸ o Jeasa kei Kitemoci, o Mefeaci,

¹⁹ kei Kiriaceimi, o Sipima kei Sereci-aseari ena delana ka koto ena loma ni buca,

²⁰ o Pecipiori kei na baba ni Ulu i Pisika kei Peci-jisimoci,

²¹ A sa wili kina na veikoro kecega ena vanua cecere, kei na matanitu taucoko nei Sioni na nodra tui na Amoraiti, ka veiliutaki mai Esiponi. A sa vakamalumalumutaki koya o Mosese, kei ira talega na turaga ni Mitiani, o Ivi kei Rekemi, o Suri, Uri kei Repa. Era a cicivaka na vanua o ya o iratou oqo, ena ruku ni veiliutaki i Sioni.

²² A sa okati vata kei ira na tamata era a vakamatea na Isireli o Balami na daurairai na luve i Piori.

²³ Na nodra i yalayala ni vanua na Rupeni ena ra, na Joritani. Oqo na veikoro lelevu kei na veikoro lalai ka votai me nodra i votavota na veivuvale ena mataqali i Rupeni me nodra.

Vanua e Nodra na Mataqali Kata

²⁴ A sa solia o Mosese vei ira na veivuvale ni mataqali i Kata e dua na i wase ni vanua me nodra.

²⁵ Na nodra vanua sa wili kina o Jaseri kei na koro kece e Kiliati, na veimama ni nodra vanua na Amoni me yaco sara ki Aroeri, ena tokalau kei Repa.

²⁶ A sa vakatekivu mai Esiponi na nodra vanua, ka yaco yani ki Ramaci Misipe kei Pitonimi, mai Meeneimi ki na i yalayala kei Tipiri.

²⁷ Na Buca o Joritani e okati kina o Peci Araimi, o Pecinimira, o Sukoci, kei Sifoni, ka ra i vovo ni matanitu i Sioni na tui Esiponi. Na i yalayala ni nodra vanua ena ra sai koya na Uciwai na Joritani me yaco sara ki na vualiku ni Drano o Kalili.

²⁸ Sai ira oqori na veikoro lelevu kei na veikoro lalai a soli vei ira na veivuvale ena mataqali i Kata me ra taukena.

Vanua e Nodra na Mataqali Manasa

²⁹ A sa solia talega o Mosese e dua na tiki ni vanua vei ira na veivuvale ena veimama ni mataqali i Manasa me ra taukena.

³⁰ Na nodra vanua a tete yani vaka ki Meeneimi, ka kovuti kina na vanua kece o Pasani, na matanitu Oki na tui Pasani, ka vaka talega kina na onosagavulu na koro lalai nei Jairi e Pasani.

³¹ A sa wili kina na veimama kei Kiliati, ka vakakina o Asitoreci kei Etirei na koro turaga ni matanitu i Oki mai Pasani. A sa soli na veivanua oqori ki na veivuvale ni dua na veimama ni kawa i Mekiri na luve i Manasa.

³² Sa vakaoqo na nona a wasewasea na veivanua ena tokalau ni Joritani kei Jeriko o Mosese ena gauna sa tiko kina ena buca o Moapi.

³³ Ia e sa sega ni solia o Mosese e dua na vanua vei ira na mataqali i Livai me nodra. A sa tukuna ga vei ira ni sa nodra i votavota ga ko Jiova na Kalou ni Isireli, me vaka na nona vosa ni yalayala vei ira.