Josua 12 - Ai Vola Tabu Ena Vakavakadewa Vou

Ira na Tui ka Vakadrukai mai vei Mosese

¹ Era sa vakadrukai oti, ka taukena na veivanua ena tokalau ni Joritani o ira na Isireli, o ya me tekivu mai na Buca o Arinoni ka lako cake ki na Buca o Joritani, ka yaco sara ki na Ulunivanua o Erimoni ena vualiku. E rua na tui e rau sa vakadrukai kina.

² E dua vei rau o Sioni na nodra tui na Amoraiti ka tiko mai Esiponi; na nona matanitu e wili kina na veimama ni vanua o Kiliati, o ya me tekivu mai Aroeri (ena i yalayala ni buca o Arinoni) kei na koro ena lomadonu ni buca o ya, me yaco sara ki na uciwai na Jepoki, na nodra i yalayala ni vanua na kawa i Amoni;

³ ka wili talega kina na Buca o Joritani, me tekivu mai na Drano o Kalili ena ceva me yaco sara ki Peci-jesimoni ena tokalau ni Waitui Mate, ka lako sara yani vaka ki na ruku ni ulunivanua o Pisika.

⁴ Na i karua ni tui era sa vakamalumalumutaka o Oki na tui Pasani, e dua vei ira na i otioti ni kawa na Rafaimi ka veiliutaki e Asitoreci kei Etirei.

⁵ Na nona matanitu e wili kina na Ulunivanua o Erimoni, kei Salika, o Pasani taucoko me yacova yani na nodra i yalayala ni vanua na kai Kisuri kei ira na kai Meeka. E wili talega kina na veimama ni vanua o Kiliati me yacova na i yalayala nei Sioni na tui Esiponi.

⁶ E a rawai rau na tui oqo o Mosese kei ira na Isireli. A sa qai solia na vanua oqo o Mosese na tamata ni Kalou vei ira na mataqali i Rupeni, Kata kei na veimama ni mataqali i Manasa, me ra taukena.

Ira na Tui ka Vakadrukai mai vei Josua

⁷ Era a vakarusai ira kece na tui ena ra ni Joritani o Josua kei ira na Isireli, me vakatekivu mai Peali-kata ena buca o Lepanoni ki na Ului Alaki ena ceva volekati Itomi. E a qai wasewasea na vanua oqo o Josua vei ira na veimataqali ka sa solia vei ira me nodra i votavota ka tawa mudu.

⁸ Na vanua oqo a wili kina na vanua veidelana, na vanua ena ruku ni veidelana ki na ra, na Buca o Joritani kei na kena ruku ni veidelana, na baba kece ena tokalau, kei na vanua talasiga ena ceva. Oqo na vanua era a tawana tu na Itaiti, na Amoraiti, na Kenanaiti, na Perisaiti, na Aivaiti kei na Jepusaiti.

⁹ O ira na Isireli era sa vakadrukai ira na tui oqo kei na nodra koro lelevu: na tui Jeriko, na tui Ai (volekati Peceli),

¹⁰ na tui Jerusalemi, na tui Epironi,

¹¹ na tui Jarimuci, na tui Lakisi,

¹² na tui Ekiloni, na tui Keseri,

¹³ na tui Tepiri, na tui Keteri,

¹⁴ na tui Orima, na tui Arati,

¹⁵ na tui Lipina, na tui Atulama,

¹⁶ na tui Maketa, na tui Peceli,

¹⁷ na tui Tapua, na tui Eferi,

¹⁸ na tui Efeki, na tui Leseroni,

¹⁹ na tui Matoni, na tui Asori,

²⁰ na tui Simironi-meroni, na tui Efikasi,

²¹ na tui Tenaki, na tui Mekito,

²² na tui Ketesi, na tui Jokiniame volekati Kameli,

²³ na tui Doa e koto e baravi, na tui Koimi e Kalili,

²⁴ na tui Tirisa. E tolusagavulu kadua taucoko na kedra levu.