Jope 42 - Ai Vola Tabu Ena Vakavakadewa Vou

Sa Vakayalomalumalumutaki o Jope ka Yalovakacegu

¹ A sa qai sauma o Jope na vosa i Jiova, ka kaya,

² Au sa kila, kemuni Jiova, ni o ni sa rui kaukauwa; Ka rawa mo ni cakava na ka kecega o ni vinakata.

³ O ni a taroga se'u doudou rawa vakacava Me'u vakataroga na nomuni vuku Ni sa rui levu tu mada ga na noqu lecaika. Au a tukuna na veika au sega ni kila, Me baleta na veika veivakurabuitaki sa dredre me'u kila rawa.

⁴ O ni a tukuna vei au me'u vakarorogo mada ka mo ni vosa, Ka qai tovolea me'u sauma na nomuni taro.

⁵ Au a dau rogoci kemuni ena daligaqu, Ia oqo sa qai raici kemuni na mataqu.

⁶ O koya oqo au sa madualaka kina na veika kece au tukuna, Ka veivutuni ena kuvu ni qele kei na dravusa.

Na Kena i Tinitini

⁷ Ni sa vosataka oti vei Jope na ka kecega oqo ko Jiova, sa qai kaya vei Ilivasi, “Au sa cudruvi iko vata kei rau na nomu i tokani, baleta ni dou a sega ni tukuna na ka dina e baleti au, me vaka sa cakava o Jope, na noqu tamata.

⁸ Dou kauta kina oqo vei Jope e vitu na bulumakau tagane kei na vitu na sipi tagane ka la'ki vakacabora me nomudou i soro. Ena qai masulaki kemudou o Jope, ka'u na sauma na nona masu ka'u na sega ni vakamaduataki kemudou me vaka na ka e rauta me caka vei kemudou. O dou a sega ni tukuna na ka dina e baleti au me vaka na ka sa cakava o koya.”

⁹ E ratou sa qai cakava na lewe tolu, o Ilivasi, o Vilitati kei Sofa, na ka sa tukuna vei iratou ko Jiova me ratou cakava, ka sa qai sauma ko Jiova na masu i Jope.

¹⁰ Ia ni masulaki iratou oti na nona i tokani o Jope, sa qai vakavutuniyautaki koya tale ko Jiova ka vakaruataka vua na levu ni nona i yau e liu.

¹¹ E ratou a mai sikovi koya na tacina, na ganena kei ira na nona veikilai makawa ka ra mai kana vata sara kei koya ena nona vale. Era a tusanaka vua na nodra lomani koya vakalevu ka ra vakacegui koya mai na lewa kecega sa vakayacora vua ko Jiova. Era a dui solia vua e tau yadua na mama koula kei na so na i lavo.

¹² A qai vakalougatataka vakalevu cake sara ko Jiova na bula i Jope ena gauna e muri mai na kena sa cakava vua ena i matai ni gauna. A qai taukena tale o Jope e 14,000 na sipi, e 6,000 na kameli, e 2,000 na bulumakau, kei na 1,000 na asa.

¹³ A sa vitu tale na luve i Jope tagane ka tolu na yalewa.

¹⁴ E a vakayacana o Jope na luvena yalewa ulumatua me o Jimaima, ai karua o Kesaia, kei na i katolu o Kereni Apuka.

¹⁵ E sega sara ni dua tale na yalewa ena vuravura taucoko me rairai vinaka me vakataki iratou na luve i Jope. A qai vota talega vei iratou o tamadratou e dua na i wase ni i yau me vaka sa cakava vei iratou na ganedratou.

¹⁶ Mai na gauna o ya, a qai bula tale tiko o Jope ka 140 na yabaki, ka gauna balavu vinaka sara me bula donui ira tale na makubuna kei ira na makubuna vakarua.

¹⁷ A sa mate o Jope ni sa balavu vinaka na nona bula ka sa qase sara.