Jope 35 - Ai Vola Tabu Ena Vakavakadewa Vou

¹ A kuria tale o Ilaiu, ka kaya,

² E sega ni dodonu vei iko, Jope, mo kaya Ni o sega ni cala ena mata ni Kalou,

³ Se mo tarogi koya, ka kaya, E lauti kemuni vakacava na noqu i valavala ca? E sega ni vinaka vei au ke'u sega ni cakava na i valavala ca.

⁴ Au sa na sauma vei iko kei iratou talega na nomu i tokani na nomu vosa.

⁵ Rai cake mada ki macawa! Raica na kedra yawa ki cake na veio!

⁶ Kevaka o sai valavala ca, Na ka oqori ena sega ni ca vua na Kalou. Kevaka sa vuqa na ca o cakava, Ena nona beka o koya na kena ca?

⁷ O vukea tiko beka na Kalou ena nomu sa rui yalododonu? E sega sara ga na ka e vinakata mai vei iko o koya.

⁸ Na nomu i valavala ca ena vakararawataki ira na kai nomu, Ia na nomu caka vinaka ena vukei ira.

⁹ Era vutugu na tamata ni ra sa vakasaurarataki; Era tagi me bau dua e vukei ira.

¹⁰ Ia era sega ga ni bau gole vua na Kalou, na nodra Dauveibuli, O koya ka dau soli kaukauwa vei ira Ena gauna voravora duadua ni nodra vakaleqai.

¹¹ Era sega ni gole vua na Kalou, Ka vakavukui keda, Me da vuku cake mai vei ira na manumanu yava i va Kei na manumanu vuka.

¹² Era tagi veivuke, ia e sega ni bau sauma mai na Kalou, Baleta ni ra tamata ca ka dokadoka.

¹³ Sa sega na betena vei ira me ra tagi qoqolou; Sa sega ni raici ira se rogoci ira o koya na Kalou Kaukauwa.

¹⁴ I Jope, o kainaka o iko ni o sega ni raica rawa na Kalou, Ia mo waraka mada vakamalua na ka e baleti iko Sa koto sara ga oqo e matana.

¹⁵ O tukuna o iko ni sega ni dau veitotogitaki na Kalou, Ka sega ni dau via kila na vakayacori ni valavala ca.

¹⁶ E sega na betena mo tosoya tikoga na nomu vosa; Sa makare vinaka sara tu ga Ni o sega ni kila na ka o kainaka tiko.