Jope 3 - Ai Vola Tabu Ena Vakavakadewa Vou

Vakatekivu me Vosa o Jope

¹ Ia ni sa oti oqo, sa qai vakatekivu me vosa o Jope ka a qai rulaka na siga e a sucu mai kina.

² A kaya o Jope,

³ Kemuni na Kalou, ni rulaka mada na siga au a sucu mai kina; Io mo ni cakava e dua na ka me sauta na bogi au a kunekunetaki kina!

⁴ Me vuki me butobuto na siga. Mo ni kakua ni qai nanuma tale na siga o ya; Ka mo ni kakua tale ni vakacilava kina na rarama.

⁵ Ni cakava me siga ni vakaloloku kei na buto loaloa; Ka mo ni solega na siga oqori ena veio, ka tabonaka na matanisiga.

⁶ Ni bokoca vakadua na bogi o ya mai na yabaki o ya, Ka me kakua sara ni qai wiliki tale;

⁷ Mo ni cakava me bogi velavela ka sega kina na marau.

⁸ Tukuna vei ira na dauvakadraunikau, me ra vosavakacacataka na siga o ya, O ira era kila na vakayavalati Livaiacani.

⁹ Ni tabonaka tani mada; na kalokalo i vola siga; Ka me kakua ni nuitaka na bogi o ya ni na kida mai na mataka.

¹⁰ Ni rulaka na bogi o ya ena nona vakalaiva me'u sucu mai; Ni'u a mai sotava tu oqo na rarawa kei na leqa.

¹¹ Isa, o au me'u a sa mate ga ena kete i tinaqu, Se ni'u a sa qai tau sara ga kina ki vuravura.

¹² A cava beka e a roqoti au dabedabe toka kina o tinaqu? Ka cava na vu ni nona a vakani au toka ena sucuna?

¹³ Ke'u a sa mate sara ga ena gauna o ya, Ke'u sa vakacegu koto ena gauna oqo,

¹⁴ Ka moce lutu koto me vakataki ira na tui kei na turaga Era a tara na veivale vakatui ni gauna makawa.

¹⁵ Ke'u a moce koto beka me vakataki ira na luvenitui Ka bini tu ena nodra veivale na koula kei na siliva,

¹⁶ Se moce koto me vakataki ira na gone sucu mate.

¹⁷ Ni ra sa koto ena i bulubulu na tamata ca, Sa qai mudu na nodra dau caka ca; Ka ra cegu na tamata cakacaka mai na nodra oca kecega.

¹⁸ O ira talega na kaivesu, Era a la'ki tiko kina ena vakacegu; Na rogo vosa karakara, a la'ki mudu vakadua Vata kei na i vakaro a dau rogo kaukauwa.

¹⁹ Era a la'ki tiko kecega mai kea, O ira na rogo kei ira na lolovira; Ka ra a qai galala tu vakadua Ka tamata dau tu vakabobula.

²⁰ A cava na vuna era biu tu ga kina na tamata Ena bula e rui vakaloloma sara? Se cava na vuna e soli tiko kina na rarama Vei ira era sa rarawa voli ga?

²¹ Era waraki mate tiko, ia e sega ni bau yaco; Sa vinaka cake vei ira na i bulubulu, ka ca na i lavo.

²² Era a sega ni marau rawa ka yacova ni ra mate, ka buluti;

²³ Na nodra gauna e muri e vunia sara ga na Kalou, Ka vakalatia na nodra sala ena veiyasana kece sara.

²⁴ Au a vakaloloku, ka'u sa bese ni kana, Ia na noqu vutugu sa sega ni mudu rawa,

²⁵ Me baleta ni sa qai yaco dina sara Na ka au a domobula kina ka dau rerevaka.

²⁶ Au a sega ni tiko vinaka, Na vakacegu, sa yawa kalia sara; Ia na noqu leqa a sega ni mudu rawa.