Jope 1 - Ai Vola Tabu Ena Vakavakadewa Vou

Sa Vakatovolei Jope o Setani

¹ A tiko voli mai na vanua o Usu e dua na tamata ka yacana o Jope. E tamata yalodina vua na Kalou ena nona vakabauta kei na nona veiqaravi. Sa dau qarauna vinaka o koya me kakua ni torova na ca.

² E ratou lewe vitu na luvena tagane ka lewe tolu na yalewa.

³ Sa taukena o Jope e 7,000 na sipi, e 3,000 na kameli, e 1,000 na bulumakau, kei na 500 na asa. Era lewe vuqa sara na nona tamata ka vutuniyau duadua o koya mai na Tokalau.

⁴ Sa dau tiko na siga me ratou caka magiti yadua kina na luvena tagane ka ratou dau sureti mai kina na kena vo, ka sureti talega mai ki na kana vata o iratou na ganedratou e lewe tolu.

⁵ Ni oti na kana vata yadua, sa qai dau yadra ena mataka lailai ni siga ka tarava o Jope me vakacabora eso na i soro kama me ratou vakasavasavataki taucoko kina na luvena. Na ka oqo sa dau cakava voli o koya ena veigauna kece baleta ni nanuma de ratou a mani caka cala na gone ka vosavakacacataka lo na Kalou ena dui lomadratou.

⁶ Ia ni yaco mai na siga me ra rairai yani kina na agilosi ki na mata i Jiova, a bau tiko talega e kea o Setani na agilosi dauveivakatovolei.

⁷ A qai tarogi Setani na Kalou, ka kaya, O a tu mai vei? A sauma o Setani, ka kaya, Au a veilakoyaki tu ga, ka'u vakalakova kece sara na veiyasa i vuravura.

⁸ A qai kaya ko Jiova, O sa bau kilai Jope tiko li na noqu tamata, se sega? E sega sara ni dua na tamata yalodina e tiko e vuravura me tautauvata kei koya. E qaravi au tiko o koya, ka dau qarauna vakavinaka sara me kakua ni cakava e dua na ka ca.

⁹ E a sauma na vosa i Jiova o Setani, ka kaya, Ena qaravi kemuni beka o Jope kevaka e sega na ka e rawata tiko mai kina?

¹⁰ Ni o kemuni o ni viribaiti koya tiko, na nona vuvale kei na nona i yau kecega. O ni vakalougatataka na ka kecega e vakayacora, ka yaco kina me vutuniyau.

¹¹ Ia kevaka o ni kauta laivi na veika kecega sa taukena, ena sega sara ga ni via kilai kemuni tale!

¹² A qai kaya vei Setani ko Jiova, Sa vinaka, mo vakayacora ki na nona i yau na ka ga o via cakava kina. Ia mo kakua ga ni vakamavoataka na yago i Jope. Oti o ya, a qai lako yani o Setani.

Vakarusai na i Yau kei na Luve i Jope

¹³ Ena dua na siga, ni ratou a vakayacora tiko na nodratou kana vata na luve i Jope ena vale nei koya ka qase duadua vei iratou na tagane,

¹⁴ a qai cici mai vei Jope e dua na i talai, ka mai kaya vua, “Keimami a siviyara tiko ena loga ni i teitei, ka ra kana voli na asa ena dua na i kanakana voleka ga.

¹⁵ Era a qai sikabotei keimami na kai Sipa ka ra butakoca kece na asa. Era vakamatei ira kece sara talega na nomuni tamata. Oi au duadua ga au dro rawa mai me'u mai tukutuku vei kemuni.”

¹⁶ Ia ni bera ni oti na nona tukutuku, a lako tale yani e dua na tamata i Jope, ka tukuna vua, “A lidiki ira na sipi kei ira na i vakatawa na yaseyase ka mani vakamatei ira kece sara. Oi au duadua ga au dro rawa mai me'u mai tukutuku vei kemuni.”

¹⁷ Ia ni bera ga ni oti na nona tukutuku, a basika tale yani e dua na tamata i Jope, ka la'ki kaya vua, “Era a basika vakasauri mai e tolu na i lala kai Kalidia ka vakamatei ira na i vakatawa ni kameli ka ra butakoca kece na kameli. Oi au duadua ga au dro rawa mai me'u mai tukutuku vei kemuni.”

¹⁸ Ia ni bera ga ni oti na nona tukutuku na tamata oqo, a lako tale yani e dua na dauveiqaravi ka la'ki kaya vei Jope, “E ratou a kana vata tiko na luvemuni ena vale nei koya ka qase duadua vei iratou na tagane,

¹⁹ ena gauna e a laba vakasauri mai kina e vanua dravuisiga e dua na cagi. A mani bale na vale ka vakamatei iratou taucoko kece sara. Oi au duadua ga au a dro rawa mai me'u mai tukutuku vei kemuni.”

²⁰ A qai tucake o Jope ka dresulaka na nona i sulu ka tasivoritaka na uluna ka bitalaki koya vakatoboicu ki na qele me i vakaraitaki ni nona rarawa.

²¹ A qai mai kaya yani, “Au a sucu luvawale mai na kete i tinaqu, ka'u na lesu luvawale tale ni'u mate. E a solia ko Jiova, ka sa kauta tani o koya. Me vakarokorokotaki tikoga na yacana!”

²² E dina ga ni a yaco na ka ca kecega oqo, ia e a sega ni bau i valavala ca o Jope me kaya ni ca na Kalou.