Joni 1 - Ai Vola Tabu Ena Vakavakadewa Vou

Na Vosa ni Bula

¹ Ena i vakatekivu a sa bula tu kina na Vosa; a sa tiko vata kei na Kalou na Vosa, ka sa Kalou o koya na Vosa.

² Ena i vakatekivu e rau sa tiko vata kina o koya na Vosa kei na Kalou.

³ A sa bulia ka vakatubura na Kalou na ka kecega ena vukuna; sa sega ni dua na ka e buli me a sega ni cakava o koya.

⁴ Sa i vurevure ni bula na Vosa, ka sa kauta mai na rarama ki na tamata na bula oqo.

⁵ Sa cilava na butobuto na rarama, ia sa sega ni tabonaka rawa na rarama o ya na butobuto.

⁶ A sa tala mai na Kalou e dua na nona i talai, a yacana o Joni,

⁷ o koya sa lako mai me tukuna na rarama oqo vei ira na tamata, me rawa kina ni ra rogoca na i tukutuku ka vakabauta.

⁸ O koya vakataki koya sa sega ni rarama o ya; ia sa mai kacivaka ga na rarama.

⁹ Sa i koya ga oqo na rarama dina, na rarama sa lako mai ki vuravura ka sa cilava na tamata kecega.

¹⁰ A sa tiko e vuravura na Vosa, ka dina ga ni sa bulia na vuravura na Kalou ena vukuna, ia sa sega ga ni kilai koya o vuravura.

¹¹ E a lako mai o koya ki na nona vanua, ia era a sega ni ciqomi koya o ira na kai nona.

¹² Ia eso vei ira sa ciqomi koya ka vakabauti koya; sa solia kina vei ira o koya na dodonu me ra yaco rawa me ra luve ni Kalou.

¹³ Era sa sega ni yaco me ra luve ni Kalou ena sala vakatamata, o ya me ra sucu mai vei ira na nodra i tubutubu; ia mai vua ga na Kalou ni sa Tamadra o koya.

¹⁴ A sa yaco me tamata na Vosa, sa sinai ena lolomasavu kei na dina, ka sa bula ena keda maliwa. Keitou a raica na nona i serau, na i serau sa ciqoma o koya me vaka ni Luvena sa duabau ga ka a vakatuburi mai vei Tamana.

¹⁵ Sa tukuni koya o Joni, ka sa kacivaka vakaoqo, “Sa i koya oqo au sa dau tukuna tiko, ‘O koya sa muri au mai sa levu cake vei keirau, me vaka ni a sa bula tu o koya ni'u se bera ni sucu.’ ”

¹⁶ Eda sa vakalougatataki kece sara mai na veika sa sinai tu vua, o ya mai na lolomasavu sa vakaikuritaki tikoga.

¹⁷ Na Kalou sa solia vei Mosese na nona Lawa, ia sa yaco mai na lolomasavu kei na dina mai vei Jisu Karisito.

¹⁸ E sega ni dua na tamata e se bau raica na Kalou. Na Luvena e duabau ga, sa vakatubura o koya, ka sa tiko vata kei Tamana, sa mai vakatakilai koya.

Na i Tukutuku i Joni na Dauveipapitaisotaki

¹⁹ Sa i koya oqo na ka e tukuna o Joni ena gauna era a talai yani kina vua o ira na bete kei ira na kawa i Livai. Era a talai mai vei ira na nodra i liuliu na Jiu mai Jerusalemi, me ra la'ki kaya vua, “O cei beka o iko?”

²⁰ A sa sauma o Joni ka sega ni cakitaka, ka tusanaka ga vakadodonu, “Au sega ni Mesaia oi au.”

²¹ Era sa qai taroga, “O cei beka ga o iko? O iko o Ilaijia?” A sauma o Joni ka kaya, “E segai.” Era sa tarogi koya tale, “Sa i iko beka o koya na Parofita?” Sa qai sauma ka kaya, “E segai.”

²² Era sa qai kaya tale vua, “Ia o cei ga o iko? Me bau dua na ka me keimami la'ki tukuna vei ira sa talai keimami mai. A cava o sa kaya me baleti iko?”

²³ Sa qai kaya o Joni, “Oi au na domona e dua sa kacikaci voli ena vanua lala, ‘Cakava me dodonu na sala me muria na Turaga,’ me vaka sa kaya o Aisea na parofita.”

²⁴ Ia o ira era sa talai mai vei ira na Farisi

²⁵ sa qai tarogi Joni, ka kaya vua, “A cava ga o veipapitaisotaki kina ni o sega ni o koya na Mesaia, se o Ilaijia, se o koya na Parofita?”

²⁶ A qai vosa vei ira o Joni, ka kaya, “Au sa veipapitaisotaki ena wai; ia sa tucake tu ena kemuni maliwa e dua o ni sa sega ni kila.

²⁷ O koya sa muri au tiko mai, ia sa sega ni ganiti au mada ga me'u sereka na wa ni nona i vava.”

²⁸ A yaco tiko na veika oqo mai Pecani ena tai kadua ni Joritani, na vanua e veipapitaisotaki tiko kina o Joni.

Na Lami ni Kalou

²⁹ Ena siga ka tarava, sa raici Jisu sara o Joni ni lako tiko yani vua, ka a kaya sara, “Raica na Lami ni Kalou, o koya sa kauta tani na nodra i valavala ca na kai vuravura!

³⁰ Sa i koya ga oqo au sa tukuna tiko kina, ‘Sa muri au tiko mai e dua na tamata, ia sa levu cake vei keirau o koya, baleta ni sa bula tu o koya ni'u se bera ni sucu.’

³¹ Au sega mada ni kila se o cei o koya; ia na vu ni noqu lako mai ka veipapitaisotaki ena wai o ya me rawa ni ra kilai koya kina o ira na Isireli.”

³² Sa qai tukutuku tale o Joni, ka kaya, “Au a raica na Yalo Tabu ni sa lako sobu mai me vaka na ruve mai lomalagi, ka mai ro toka vua.

³³ Au a sega tiko ni kila ni sai koya ga oqo, ia na Kalou ka talai au mai me'u veipapitaisotaki ena wai sa kaya vei au, ‘O koya o na raica ni lako sobu vua na Yalo Tabu ka la'ki ro toka vua; sai koya oqori ena veipapitaisotaki ena Yalo Tabu.’

³⁴ Au sa raica oti, ka'u sa tukuna oqo ni sai koya ga na Luve ni Kalou.”

O Iratou na i Matai ni Tisaipeli i Jisu

³⁵ Ena siga ka tarava, sa tu tale e kea o Joni kei na rua na nona tisaipeli;

³⁶ ia ni sa raici Jisu ni lako tiko yani sa kaya sara, “Raica, na Lami ni Kalou!”

³⁷ E rau a rogoca na nona vosa oi rau na tisaipeli ka rau muri Jisu sara.

³⁸ A qai vuki ko Jisu ka raici rau ni rau sa muri tiko yani, ka mani kaya vei rau, “A cava o drau vakasaqara?” E rau a qai kaya vua, “Rapai,” (ka kena i balebale, Vakavuvuli,) “E vei na vanua o ni vakaitikotiko kina?”

³⁹ Sa qai kaya vei rau o koya, “Lako mai ka raica.” (Na gauna o ya e sa via rauta toka na va na kaloko ena yakavi.) E rau sa qai lako vata yani kei koya ka raica na vanua e tiko kina, ka rau mani tiko kaya voli ena vo ni siga o ya.

⁴⁰ E dua vei rau o Adriu, na taci Saimoni Pita.

⁴¹ E a kunei Saimoni taumada, na tuakana, ka kaya vua, “Keirau sa kunea na Mesaia.” (Na vosa oqo e kena i balebale na “Karisito”.)

⁴² Sa qai kauti koya sara vei Jisu. E a vakaraici koya ko Jisu, ka kaya vua, “O iko o Saimoni na luve i Jona; o na vakatokai o Kifa.” (A kena i balebale o Pita, se vatu.)

Sa Kacivi Filipe kei Nacanieli ko Jisu

⁴³ Ena siga ka tarava, sa vinakata ko Jisu me lako ki Kalili. E a mani kunei Filipe o koya, ka kaya vua, “Muri au mai!”

⁴⁴ (O Filipe oqo e kai Pecisaita, na koro nei Adriu kei Pita.)

⁴⁵ A qai kunei Nacanieli o Filipe, ka kaya vua, “Keitou sa kunei koya ka a vola o Mosese ena i vola ni Lawa ka ra tukuna talega na parofita ena nodra i vola, o ya ko Jisu na kai Nasareci, na luve i Josefa.”

⁴⁶ Sa qai kaya vua o Nacanieli, “E rawa li ni tubu mai Nasareci e dua na ka vinaka?” A qai kaya vua o Filipe, “Lako mai mo raica.”

⁴⁷ Ia ni sa raici Nacanieli ko Jisu ni sa lako tiko yani vua, sa qai kaya, “Raica, e dua na Isireli dina, ka sa sega vua na lasu!”

⁴⁸ Sa qai kaya vua o Nacanieli, “O ni kilai au beka vakacava?” A sauma ko Jisu, “Au a raici iko ena gauna o a tiko kina ena ruku ni vunilolo, ni se bera ni kacivi iko o Filipe.”

⁴⁹ Sa qai kaya vua o Nacanieli, “Vakavuvuli, sai kemuni na Luve ni Kalou, sai kemuni na nodra Tui na Isireli!”

⁵⁰ A sauma ko Jisu ka kaya vua, “O sa vakabauta li baleta ni'u sa tukuna oti niu a raici iko ena ruku ni vunilolo? O na raica na veika lelevu cake mai na kena oqo.”

⁵¹ Sa qai kaya tale vua ko Jisu, “Au tukuna vakadodonu sara vei kemuni, ni o ni na raica ni tadola na lomalagi ka raici ira talega na agilosi ni Kalou ni ra kaba cake tiko ka siro sobu vua na Luve ni Tamata.”