Joeli 3 - Ai Vola Tabu Ena Vakavakadewa Vou

¹ “Ia ena gauna o ya, ni'u sa vakalesuya oti tale kina vei Juta kei Jerusalemi na nona i yau,

² ka'u na qai vakasoqoni ira vata na lewe ni veimatanitu ka kauti ira sobu ki na buca i Josefati, ka'u na qai veilewaitaki ira mai kea, ena vukudra na noqu tamata kei Isireli na noqu i votavota, baleta ni ra a dui biubiuti ira ena kedra veimama na veimatanitu, ka ra a veivotayaka na noqu vanua.

³ Era a vakawirimadigitaki ira na noqu tamata, era a soli ira na gonetagane me i voli ni yalewa dautagane, ka volitaka na goneyalewa me i sau ni waini me ra gunuva.

⁴ Kemudou o Taia kei Saitoni kei na yasayasa vaka-Filisitia, a cava vei au oi kemudou? Dou sa via veisausaumitaka vei au e dua na ka? Kevaka e vakakina, au na sauma vakatotolo ka vakasauri sara vei kemudou na i sau ni nomudou i valavala.

⁵ Ka ni dou a kauta na noqu siliva kei na noqu koula ka yauta na noqu i yau talei ki na nomudou veivalenisoro.

⁶ Dou volitaki ira na tamata i Juta kei Jerusalemi vei ira na kai Kirisi, ka kauti ira me ra yawa tani mai na i nodra i yalayala.

⁷ Ia oqo au na vakayavalati ira mai na vanua dou a volitaki ira kina, kau na qai sauma lesu e ulumudou na nomudou i valavala.

⁸ Au na volitaki ira na luvemudou tagane kei na luvemudou yalewa ki na ligadra na luve i Juta, era na qai volitaki ira vei ira na kai Sipa, ki na matanitu yawa sara, sa kaya vakaoqo na Kalou.”

⁹ “Dou kacivaka oqo ki na veimatanitu: ‘Ni vakarau ki na i valu; Ni kacivi ira mai na nomuni tamata qaqa; Soqoni ira kece mai na nomuni sotia ka tayabe yani!

¹⁰ Tukitukia na bati ni siviyara me i seleiwau, Kei na nomudou i sele ni sasamaki me moto; Ka me kaya o koya sa gogo, “Au sa dauvala.”

¹¹ Dou vakatotolo ka lako mai Na veimatanitu kece sa volita, Dou soqoni vata yani ki kea. I Jiova, ni kauti ira sobu mai Na nomuni qaqa.

¹² Me ra yadra na veimatanitu, Ka lako sobu mai ena buca o Josefati; Mai kea, au na veilewaitaki ira Na veimatanitu kei na vanua sa volita.

¹³ Dou vakarautaka na i sele ni tatamusuki, Ka tamusuki ira me vaka na sila Ena gauna ni tatamusuki. Lako yani, ka butuqaqia Me vaka na qerepi. Sa sinai ka vuabale na i keli waini, Ni sa ka levu na nodra caka cala.

¹⁴ Sa udolu vakaudolu Era sa tiko ena buca ni veicudruvi. Sa voleka ga na siga i Jiova Ena buca ni veicudruvi.

¹⁵ Ena vakabutobutotaki Na rarama ni matanisiga kei na vula; Ka ra sa tabonaka na kedra rarama Na veikalokalo.

¹⁶ Ia ko Jiova sa kurukuru mai Saioni, Ka sa tabalaka na domona mai Jerusalemi; Ka sa yavavala na lomalagi kei vuravura. Ia sai drodro ga ko Jiova Vei ira na nona tamata; Sa nodra koro kaukauwa na Isireli o koya.

¹⁷ “Dou na qai kila Ni sai au ko Jiova na nomudou Kalou, Au sa tiko mai Saioni, Na noqu ulunivanua tabu. Ena yaco o Jerusalemi me koro tabu Era na sega ni taukena tale na vulagi.

¹⁸ Ia, ena siga o ya Ena tiri na waini vou mai na veiulunivanua, Ena drodro na sucu ena veidelana, Na veidreke ni wai kece sara e Juta, Ena drodro mai kina na wai; Ena dave na wai mai na vale i Jiova Me vakasuasuataka na Buca o Sitimi.

¹⁹ Ena vaka na vanua dravuisiga o Ijipita Ka yaco o Itomo me vanua lala, Baleta ni ra a valuta na vanua o Juta, Ka vakamatei ira sa sega nodra cala.

²⁰ Ia o Juta ena tawani tikoga ka sega ni mudu. Kei Jerusalemi mai na i tabatamata e dua Ka yacova na veitabatamata e muri.

²¹ Au na cudruvaka na kedra dra, Au na sauma vei ira sa caka cala, Ni sai au o na Jiova, Ka'u sa tiko ena Ulunivanua o Saioni.