Jeremaia 8 - Ai Vola Tabu Ena Vakavakadewa Vou

¹ Ena gauna o ya, sa kaya ko Jiova, ena kau mai na suidra na tui kei na suidra na turaga e Juta, ka vakakina na suidra na bete, na suidra na parofita, vata kei na suidra na lewe i Jerusalemi mai na nodra i bulubulu.

² Era na mai tuvalaki tu me cilava na matanisiga, na vula, kei na veikalokalo era a dau lomana ka qarava. Era na sega ni kumuni vata se bulu tale, ia era na vaka na benu ena dela ni qele.

³ Sa dodonu me ra taleitaka cake vakalevu na mate mai na bula o ira kece sara na vo-ni-bula era lewe ni vuvale ca oqo ena veivanua kece ka'u a dui biuti ira kina,” a sa kaya ko Jiova ni lewevuqa.

Na i Valavala Ca kei na Kena i Totogi

⁴ Jeremaia, tukuna vei ira na noqu tamata, Oqo na veika e tukuna ko Jiova. Kevaka era sa bale na tamata, era na sega li ni tucake tale? Kevaka e dua sa gole tani, ena sega beka ni rawa ni lesu tale mai?

⁵ Kemuni na noqu tamata, a cava o ni sa gole tani kina; a cava o ni sa gole tani kina vakawasoma mai vei au? O ni sa taura matua na nomuni matakau, ka bese ni lesu mai vei au.

⁶ Au a vakarorogo vinaka sara, ia o ni sega ni tukuna na ka dina. E sega ni bau dua vei kemuni e veivutunitaka na nona ca; e sega ni bau dua e taroga, A cava beka na cala au cakava? Era dui lako na tamata yadua ena nona sala me vaka e dua na ose sa cici ki na i valu.

⁷ Na belo sara mada ga ni maliwa lala e kila na gauna me lesu kina; na ruve, na belo loa kei na kakabace era kila na gauna ni nodra lako. Ia o ira na noqu tamata, era sega ni kila na i vakaro i Jiova na Turaga.

⁸ O ni kaya rawa vakacava, ‘Keimami sa vuku ka sa tu vei keimami na i vakaro i Jiova’? Ni raica, sa veisautaki na i vakaro ena nodra mata ni peni na vunivola dauveivakaisini.

⁹ Era sa vakamaduataki na nomuni tamata vuku; era sa veilecayaki ka tacori. Era sa biuta na noqu vosa, ia oqo, na vuku cava sa qai tu vei ira?

¹⁰ O koya oqo au na solia kina na watidra vei ira na tani kei na nodra vanua vei ira eso me ra taukena. Na tamata kece sara, o ira na cecere kei ira na lolovira era sa via rawa i lavo ena sala veivakaisini. O ira sara mada ga na parofita kei na bete, era sa veivakaisini kecega.

¹¹ Era sa sega ni kauwaitaka na mavoa ni lomadra na noqu tamata, era kaya, ‘Sa yaco na vakacegu, sa yaco na vakacegu,’ ia e sega ga ni kune na vakacegu.

¹² Kemuni na noqu tamata, o ni a sega ni o ni a vakayacora na i valavala vakasisila? Sega, o ni a sega sara ni bau madua vakalailai, o ni sega ni bau vakarisevacu, O koya oqo o ni na bale vata kina kei ira era sa bale; ena gauna au na totogitaki kemuni kina, o ni sa na qeavu vakadua,” sa kaya ko Jiova na Turaga.

¹³ Au na vakarusai ira vakadua na noqu tamata. Era na vaka na vunivaini sa sega kina na qerepi, e vaka e dua na lolo sega ni vua; na drauna mada ga sa malai tu. O koya oqo au na solia kina vei ira na veika eso sa kitaka.”

¹⁴ A cava e da sa dabe vakadua kina? Ni lako mai me da mai cici ki na veikoro vakabai ka mate mai kea. Sa vakararawataki keda ko Jiova me da mate, sa solia vei keda na wai gaga me da gunuva baleta ni da sai valavala ca vua.

¹⁵ Eda nuitaka na sautu, ia sa sega ni yaco mai e dua na ka vinaka; me dua na gauna ni veivakabulai, ia sa kena i sosomi na rere.

¹⁶ Sa rogoci mai Tani na suru ni nodra mataivalu ose. Ena vadugu ni suru ni mataivalu ose oqo, sa uneune kina na vanua taucoko. Era sa lako mai me ra vakarusa na noda vanua kei na ka kece sa tu kina, na noda koro kei ira kece era tiko kina.

¹⁷ Ni qarauna! Au sa talai ira yani na gata vei kemuni, na gata bati gaga ena sega ni rawa ni vakayalovinakataki, ka ra na kati kemuni,” sa kaya ko Jiova.

Na Rarawa i Jeremaia e Vukudra na Wekana

¹⁸ Sa sega ni vakacegui rawa Na noqu rarawa; Sa tauvi mate na yaloqu.

¹⁹ Rogoca na nodra tagi Na noqu tamata Sa rogo ena loma ni vanua taucoko “Sa sega dina ni tiko mai Saioni ko Jiova? Sa sega ni tiko dina mai Saioni na kena tui? A cava era sa vakacudrui au kina Ena nodra matakau, Kei na nodra matakau tawa yaga Na kai tani?

²⁰ Sa sivi na gauna ni tatamusuki, Sa oti na vula i katakata, Ia e da sa bera ga ni vakabulai.”

²¹ Sa mavoa na yaloqu Ena vuku ni mavoa ni yalodra Na noqu tamata; Au tagi, Ka sa vesuki au na rere, A cava sa sega kina ni ia. Na veivakabulai ko Jiova? A cava na vuna E sega ni vakayacora kina E dua na ka?

²² Sa sega li Na wai ni mate mai Kiliati? Sa sega beka Na vuniwai mai kea? A cava era sega ni vakabulai kina Na kai noqu?