Jeremaia 7 - Ai Vola Tabu Ena Vakavakadewa Vou

Vunau o Jeremaia ena Valenisoro

¹ A sa vosa vei Jeremaia ko Jiova ka kaya.

² Lako ki na matamata ni vale i Jiova ka la'ki vunautaka kina na vosa oqo, ‘Kemuni kece na lewe i Juta o ni dau curu ki na matamata oqo mo ni qaravi Jiova.’

³ Sa tukuna ko Jiova ni lewevuqa na nodra Kalou na Isireli, ‘Ni veisautaka na nomuni vakarau kei na nomuni tovo, au na qai solia mo ni tiko ga ena vanua oqo.

⁴ Ni kakua ni vakadinata tiko na veivosa lasu oqo, ‘Oqo na vale i Jiova, oqo na vale i Jiova, oqo na vale i Jiova.’

⁵ Ni veisautaka na nomuni vakarau kei na nomuni tovo. Me dodonu na ka o ni dau cakava vei ira na tani.

⁶ Me kakua na i valavala veivakaisini vei ira na vulagi, na luveniyali kei ira na yada. Me mudu na vakamatei ira na tamata yalododonu ena vanua tabu oqo. Me kakua talega na qarava na veikalou tani de'u na qai vakarusai kemuni.

⁷ Ia, au na qai laiva mo ni na tiko ga ena vanua oqo, na vanua au a solia vei ira na nomuni qase me nodra i votavota tawa mudu.

⁸ Raica, o ni sa vakararavi ki na veimatakau tawa yaga.

⁹ O ni butako, laba, veibutakoci, bubului vakailasu, vakacaboisoro vei Peali, ka qarava na veikalou tani o ni sega ni kila,

¹⁰ Ia o ni qai lako mai ka mai tu e mataqu ena noqu Vale ni Soro, ka kaya, ‘Keimami sa vagalalataki mai na neimami i valavala ca!’ ni oti ga, o ni lesuva tale.

¹¹ O ni nanuma beka ni nodra i vunivuni na daubutako na noqu vale? Au sa raica na ka o ni cakava tiko.

¹² Ni lako mada ki Sailo, na vanua au a digitaka taumada me'u dau qaravi kina, ka raica na ka au sa cakava kina baleta na nodra ca na noqu tamata na Isireli.

¹³ O ni sa vakayacora na ka ca kece au sa cavuta oti. E dina ga au sa vosa vei kemuni vakavuqa, o ni sega ni via rogoca, o ni sega talega ni bau rogo mai ni'u kacivi kemuni.

¹⁴ O koya oqo au sa na cakava kina ki na noqu vale oqo sa vakatokai ena yacaqu, na vale o ni sa vakararavi kina ka vakayacora vaka talega kina vei kemuni kei ira na nomuni qase.

¹⁵ Au na vakasavi kemuni tani mai na mataqu me vaka au a kitaka vei ira na wekamuni, o ira na kawa kece i Ifereimi.”

Na Nodra Talaidredre na Tamata

¹⁶ Jeremaia, kakua ni masulaki ira na tamata oqo. Kakua ni tagi se masu ena vukudra. Kakua ni masu mai vei au baleta ni'u na sega ni rogoci iko.

¹⁷ O sega ni raica na ka ra cakava tiko ena veikoro e Juta kei na veigaunisala e Jerusalemi?

¹⁸ Era cabuka mai na gone, era vakawaqara na matadravu na tagane, ka ra bali valawa na marama me ra vavi keke baleta na kalou yalewa era vakatoka me ranadi ni lomalagi; era sova talega na waiwai dau vakacabori ki na veikalou tani me ra vakacudrui au kina.

¹⁹ Ia era sa vakacudrui au li? A sa kaya ko Jiova, “Sega, era sa vakararawataki ira ga vaka i ira, ka vakavuna ga na ka me ra madua kina.”’

²⁰ O koya oqo sa kaya kina ko Jiova. “Au na sovaraka na noqu cudru waqawaqa ena vanua oqo. Au na sovaraka vei ira na tamata, ka vakakina vei ira na manumanu, na veikau, kei na veika e tei. Na noqu cudru ena vaka e dua na buka e sega e dua me bokoca rawa.

²¹ Kemuni na noqu tamata, ni soqona vata mai na i soro kama kei na i soro taucoko e dodonu me vakacabori vei au, ka kania na lewena ka vakaceguya kina na lomamuni.” Oqo na ka a kaya ko Jiova, na Kalou ni lewe vuqa, na nodra Kalou na Isireli.

²² Ena gauna au a kauti ira tani mai kina na nomuni qase mai Ijipita, au a sega ni bau solia vei ira e dua na i vakaro me baleta na i soro kama se dua tale na mataqali i soro.

²³ Ia au a vakaroti ira na gone me ra talairawarawa vei au, ka'u na qai nodra Kalou ka ra na qai yaco me ra noqu tamata. Au a tukuna vei ira me ra muria na veika au a vakarota vei ira me ra na tiko vinaka kina.

²⁴ Ia era a sega ni talairawarawa se vakarogorogo kina. Era sa vakamuria ga na veika e gadreva na yalodra domoqa me ra cakava, era sa qai toro sobu ga kina ka ra sega ni bau vinaka cake.

²⁵ Me tekivu mai na siga era a lako tani kina mai Ijipita na nomuni qase ka yacova mai na siga oqo, au sa talai ira tikoga mai vakaveitaravi na noqu tamata na parofita vei ira.

²⁶ Ia era sega ni via vakarorogo se muria. Era sa qai vakaukauwataka na lomadra ka ra sa ca sobu sara mai vei ira na nodra qase.

²⁷ Jeremaia, o na tukuna vei ira na veivosa kece oqo, ia era na sega ni vakarorogo vei iko, o na kacivi ira era na sega ni sauma mai.

²⁸ O na tukuna vei ira, ‘Oqo na matanitu sa sega ni talairawarawa vei Jiova na nodra Kalou se vinakata me ra vakadodonutaki. Sa rusa na dina, sa sega tale ni bau rogo ena gusudra me ra veivosakitaka.”’

Na i Valavala Ca ena Buca o Inomi

²⁹ Mo ni tagi na lewenivanua e Jerusalemi; Ni kotiva na drau ni ulumuni ka viri yawa. Ena veidelana mo ni lagata na sere ni veibulu baleta ni'u sa cudru Na nomuni Kalou ka cati kemuni.

³⁰ Era sa cakava e dua na ka ca na tamata e Juta. Era sa vakadukadukalitaka na noqu vale tabu ni ra la'ki vakatikora kina na nodra matakau au sevaka.

³¹ Na i cabocabonisoro o Tofeci era a tara ena Qakilo kei Inomi me ra rawa ni cabori ira kina na luvedra tagane kei na yalewa ena bukawaqa. Au a sega ni vakaroti ira me ra cakava na ka oqo, a sega tale mada ga ni bau lasika mai ena noqu vakanananu.

³² Ia sa na yaco mai na gauna me na sega ni qai vakatokai kina na vanua oqo me o Tofeci se Qakilo kei Inomi, ia me Qakilo ni Veivakamatei. Era na bulu e kea na tamata baleta ni sa sega tale na vanua me ra la'ki bulu kina.

³³ Na yago ni tamata mate ena kedra na manumanu vuka kei na manumanu kila, ka na sega me na vakarerei ira tani.

³⁴ Ena dravuisiga na vanua. Au na muduka na veirorogo ni marau, na dredre kei na mauwe ni kana magiti ni vakamau ena veikoro e Juta kei na veigaunisala e Jerusalemi.”