Jeremaia 44 - Ai Vola Tabu Ena Vakavakadewa Vou

Vosa ni Turaga vei ira na Jiu

¹ A sa kaya na Turaga ko Jiova vei Jeremaia ena vukudra kece sara na Jiu era tiko mai Ijipita, ena veikoro o Mikitoli, Tapanesi, Mefisi kei na ceva ni vanua o ya.

² Sa tukuna na turaga Qaqa na nodra Kalou na Isireli, “O ni a raica na veivakarusai au a kauta mai Jerusalemi kei na veikoro kece e Juta. Me yacova mai oqo era sa rusa tu ga ka sega ni tawani.

³ Au na cakava na ka oqo baleta ni ra a vakayacora na veika vakasisila na lewena ka vakacudrui au kina. Era vakacaboisoro ki na veikalou tani, ka ra qarava na veikalou era sega ni kila, ka sokalou kina, oi kemuni kei ira na nomuni qase.

⁴ Au sa talai ira kece tikoga mai na noqu dauveiqaravi na parofita era tukuna vei kemuni mo ni kakua ni cakava na ka rerevaki oqo, ni'u cata.

⁵ Ia o ni sega ni via rogoca se kauwaitaka. O ni sega ni via biuta na nomuni i tovo ca, na vakacaboisoro ki na veikalou tani.

⁶ Sa i koya na vuna au na sovaraka kina na noqu cudru kei na noqu rarawa ka vakama na veikoro e Juta kei na veigaunisala mai Jerusalemi. Era sa rusa ka rairai vakaloloma tu na kedra i rairai me yacova mai na siga oqo.

⁷ Sa i koya oqo a taroga kina na Turaga Qaqa na nodra Kalou na Isireli, “A cava o ni sa cakava kina na ka ca oqo vei kemuni? O ni vinakata mo ni kauta mai na veivakarusai vei ira na tagane, na yalewa, na gone, kei ira na gone dramidrami, ka sega na vo-ni-bula vei kemuni?

⁸ A cava o ni vakacudrui au kina ena nomuni matakau kei na nomuni vakacaboisoro ki na veikalou tani ena vanua oqo o Ijipita, na vanua o ni sa mai tiko kina oqo? O ni cakava na ka oqo mo ni vakarusai kemuni kina, ia me ra dredrevaki kemuni kina na veimatanitu, ka vakayagataka na yacamuni me yaca ni veivakamaduataki?

⁹ O ni sa guilecava na veika vakasisila era a vakayacora na nomuni qase kei ira na tui Juta kei ira na watidra vata kei kemuni kei ira na watimuni ena veikoro e Juta kei na veigaunisala mai Jerusalemi?

¹⁰ Ia me yacova mai na siga edaidai o ni sa sega ni via yalo malumalumu. O ni sega ni rerevaki au se muria na noqu i vakaro kei na noqu i vunau au a solia vei kemuni kei ira na nomuni qase.

¹¹ Sa i koya oqo sa kaya kina na Turaga Qaqa na nodra Kalou na Isireli. “Au na kauta mai vei kemuni na veivakarusai ka vakarusai Juta taucoko.

¹² Ia o ira na vo-ni-bula e Juta era sa vinakata me ra lako ka la'ki tiko ki Ijipita, era na vakarusai kece. Era na mate taucoko sara; o ira era cecere kei ira na lolovira, ena i valu se ena viakana. Era na veivakidacalataki, era na dredrevaki mai vei ira na tamata ka vakayagataka na yacadra me yaca ni veivakamaduataki.

¹³ Au na totogitaki ira era tiko e Ijipita me vaka au a totogitaki Jerusalemi ena i valu, viakana kei na mate ca.

¹⁴ Ena sega sara ni dua na vo-ni-bula e Juta ka sa lako me la'ki bula tale ki Ijipita me na dro bula se me na lesu tale mai. Ena sega ni dua ena lesu tale mai ka vakavo ga e vica na i se-ni-valu.”

¹⁵ Ia era a qai kaya vei Jeremaia na tagane kece era kila ni ra vakacaboisoro tiko na watidra vei ira na veikalou tani kei ira kece na yalewa era tu e kea kei ira kece na Jiu era tiko ena ceva kei Ijipita, e dua na i vavakoso vakaitamera.

¹⁶ Ena yaca ni Turaga, “Keimami sega ni via rogoca na ka o tukuna vei keimami se yalataka me keimami cakava.

¹⁷ Keimami na vakacaboisoro ki na kalou yalewa ka vakatokai na radini lomalagi ka sova na i soro liviraki vua, me vaka keimami a dau cakava kei ira na neimami qase, ira na neimami tui, ira na neimami i liuliu mai na veikoro e Juta kei na veigaunisala mai Jerusalemi. Ia keimami a sautu kina ena kakana, tiko vinaka ka sega na leqa.

¹⁸ Ia me tekivu mai na gauna keimami sa sega kina ni vakacaboisoro ki na radini lomalagi, ka sega ni sova na i soro liviraki vua, sa yaco me keimami dravudravua ena ka kecega, ka ra mate na weka i keimami ena i valu kei na viakana.”

¹⁹ Era vakuria na yalewa ka kaya, “Ena gauna keimami vavia kina na keke me vaka na i bulibuli ni radini lomalagi, keimami a sega ni cakava vakailoa ka ni ra sa vakadonuya taumada na wati keimami ka qai sova na i soro liviraki vua na radini lomalagi.

²⁰ A qai kaya o Jeremaia vei ira kece na tamata, na tagane kei na yalewa,

²¹ Me vaka na veisoro o ni vakacabora kei ira na nomuni qase, nomuni tui, nomuni liuliu kei ira na lewe ni vanua ena veikoro e Juta kei na veigaunisala mai Jerusalemi, o ni nanuma beka e sega ni kila na veika oqori ko Jiova se sa guilecava?

²² Ena siga sara ga edaidai sa rusa tu ga na nomuni vanua ka lala tu. Sa yaco me ka e veivakidacalataki ka ra vakayagataka na tamata na yacana me ka ni veivakamaduataki baleta ni sa sega ni vosota rawa ko Jiova na nomuni tovo ca ka vakasisila.

²³ Sa yaco vei kemuni edaidai na veivakarusai oqo, baleta na nomuni vakacaboisoro vei ira na veikalou tani ka i valavala ca vei Jiova. O ni sega ni muria na nona i vakavuvuli, nona i vakaro, kei na nona i vunau.”

²⁴ A sa kaya tale o Jeremaia vei ira kece na tamata, ka vakauasivi vei ira na yalewa, “Kemuni kece mai Juta o ni sa tiko e Ijipita, ni rogoca mada na vosa ni Turaga.

²⁵ Oqo na ka e tukuna na Turaga Qaqa na nodra Kalou na Isireli: “Oi kemuni kei ira na dui watimuni o ni sa dui vakayacora na ka sa vosataka na gusumuni.” “Keimami na vakayacora na neimami vosa ni yalayala me vaka keimami a tukuna me keimami vakacaboisoro vua na radini lomalagi ka sova na i soro liviraki vua.” “Sa vinaka, ni vakadeitaka na nomuni vosa ni yalayala, ka vakayacora na nomuni bubului.

²⁶ Ia ni rogoca mada na vosa ni Turaga na lewe i Juta kece o ni tiko e Ijipita. “Raica au sa bubului ena yacaqu levu ni na sega tale ni dua na lewe i Juta e tiko e Ijipita me na bubului ki na yacaqu ka kaya, ‘Me vaka sa bula ko Jiova na Kalou.

²⁷ Au na raica tiko mo ni kakua sara ni toro cake, ia mo ni vakarusai ga. O ni na mate kece sara na lewe i Juta o ni tiko e Ijipita ena i valu se ena mate ca me yacova ni sa sega ni vo e dua vei kemuni.

²⁸ Ena lewe vica ga vei kemuni ena dro bula ka ra na lesu tani mai Ijipita ki Juta. Ia o ira ga na vo-ni-bula ni Juta, o ira sa lako mai ki Ijipita me ra vakaitikotiko kina, era na kila se na vosa nei cei e ka dina, na noqu se na nodra!

²⁹ Sa i koya oqo na kena i vakatakilakila au na solia vei kemuni,’ a kaya ko Jiova. ‘Au na totogitaki kemuni ena vanua oqo ka na yaco dina na noqu vosa ni yalayala me'u kauta mai vei kemuni na veivakarusai.

³⁰ Au na soli Ofira na tui Ijipita vei ira na kena meca era via vakamatei koya, me vaka ga na noqu a soli Setekaia na tui Juta vei Nepukanesa na tui Papiloni, o koya na kena meca ka a via vakamatei koya.