Jeremaia 42 - Ai Vola Tabu Ena Vakavakadewa Vou

Kerei o Jeremaia me Masulaki Ira

¹ Era a qai lako mai vei Jeremaia na parofita na turaganivalu kece, kei Jonani na luve i Karea, kei Asaraia na luve i Osaia vata kei ira na tamata, me tekivu vei ira era cecere, ka yacovi ira na lalai sara,

² ka kaya vua, “Ni yalo vinaka mo ni vakayacora na ka keimami kerea. Mo masu mada vua na Kalou ena vuku i keimami. Ni masulaki keimami kece na vo-ni-bula sa tu oqo. Keimami a lewe levu, ia o sa rawa ni raica ni keimami sa qai vo ga oqo e lewe vica.

³ Mo masulaka me vakaraitaka vei keimami na Turaga ko Jiova na neimami Kalou na sala me keimami muria kei na ka me keimami cakava.”

⁴ Ia a qai kaya vei ira o Jeremaia na parofita, “Sa vinaka, au sa na masu vei Jiova na noda Kalou me vaka o ni kerea, ka'u na mai tukuna vei kemuni na ka kece sara e kaya. Au na sega ni vunia e dua na ka vei kemuni.”

⁵ Era a qai kaya vei Jeremaia, “Na dina kei na yalodina ni Turaga me i vakadinadina kevaka keimami sega ni talairawarawa ki na veivakaro kece ena solia na Turaga vei iko me baleti keimami.

⁶ Veitalia se vinaka vei keimami se sega, keimami na talairawarawa ga vei Jiova na neimami Kalou ka keimami sa talai iko vua.”

Sau ni Masu i Jeremaia

⁷ Ni oti e tini na siga, a qai vosa na Turaga ko Jiova vei Jeremaia.

⁸ Ia sa qai kacivi Jonani na luve i Karea kei ira kece na turaganivalu era tiko kaya kei ira kece na tamata, me tekivu mai vei ira era cecere sara ka yaco vei ira era lalai sara.

⁹ A sa kaya vei ira, “Sa tukuna mai ko Jiova na noda Kalou na Isireli, o koya o ni a talai au kina me'u tukuna vua na nomuni kerekere.

¹⁰ Kevaka o ni via tiko ga ena vanua oqo, au sa na tarai kemuni cake, ka sega ni talaraki kemuni sobu. Au sa na tei kemuni ka sega ni cavuraki kemuni tani. Au sa rarawa sara ena vuku ni veivakarusai au a kauta mai vei kemuni.

¹¹ Ni kakua ni rerevaki koya na tui Papiloni, baleta ni'u sa tiko kei kemuni; au na vakabulai kemuni ka sereki kemuni mai na nona kaukauwa.

¹² Au na yalololoma vei kemuni ka vakavurea talega vua me lomani kemuni.

¹³ Ia kevaka o ni kaya ‘Keimami na sega ni tiko ena vanua oqo,’ o ni sega ni via muria na nona vosa ko Jiova na nomuni Kalou,

¹⁴ ka kaya, ‘Keimami sa na lako ki na vanua o Ijipita na vanua keimami na sega ni raica kina na i valu, se rogoca na domo ni davui se viakana, keimami sa na la'ki tiko e kea.’

¹⁵ ‘Ia oqo mo ni rogoca mada na nona vosa ko Jiova oi kemuni na vo-ni-bula e Juta. Sa tukuna ko Jiova na nodra Kalou na Isireli. Ia kevaka o ni lako ki Ijipita ka la'ki tiko e kea,

¹⁶ sa na qai yaco yani vei kemuni na i valu o ni rerevaka tiko, ka na muri kemuni yani ki kea na viakana, o ni na qai mate mai Ijipita.

¹⁷ O ira kece era nakita me ra la'ki tiko ki Ijipita era na mate ena i valu, viakana se ena mate ca. Ena sega sara ni dua na vo-ni-bula se me dua na drotaka rawa na veivakarusai au na kauta vei ira.”

¹⁸ A sa kaya ko Jiova na nodra Kalou na Isireli, “Ena sovaraki na noqu cudru kei na noqu rarawa kevaka o ni na lako ki Ijipita, me vaka na kena sovaraki na noqu cudru kei na noqu rarawa vei ira na tamata mai Jerusalemi. Ena vakadomobula na kemuni i rairai; era na vakalialiai kemuni na tamata ka vakayagataka na yacamuni me vaka e dua na ka veivakamaduataki. O ni na sega tale ni raica na vanua oqo.”

¹⁹ Ia a vakuria o Jeremaia ka kaya, “Sa tukuna oti ko Jiova vei kemuni na vo-ni-bula i Juta mo ni kakua ni lako ki Ijipita. Ia oqo au sa vunauci kemuni,

²⁰ ni o ni sa vakayacora e dua na cala bibi sara. O ni sa talai au vei Jiova na noda Kalou ka kaya vei au, ‘Ni masulaki keimami vei Jiova na noda Kalou! Mo tukuna vei keimami na ka kece sara e dodonu me keimami cakava, ka keimami na cakava!’

²¹ Ia oqo au sa tukuna vei kemuni, ia o ni sa sega ni muria na veika kece sara sa tukuna mai vei au ko Jiova na noda Kalou.

²² Mo ni kila vinaka sara oqo: o ni na mate ena i valu, na viakana se ena mate ca ena vanua o ni sa vinakata mo ni lako ka la'ki tiko kina.”