Jeremaia 4 - Ai Vola Tabu Ena Vakavakadewa Vou

Na Kaci me Ia na Veivutuni

¹ Kemuni na Isireli, kevaka o ni lesu mai, ni lesu mai vei au,” sa kaya ko Jiova. “Ni biuti ira laivi na matakau vakasisila, mo ni lesu mai ka yalodina vei au,

² Sa na qai rawa mo ni vosa bubului ena yacaqu ena yalodina, dodonu ka savasava. Era na kerei au na veimatanitu kece me'u vakalougatataki ira, ka ra na vakacaucautaki au.”

³ A sa kaya ko Jiova vei ira na tamata mai Juta kei Jerusalemi, “Ni cukita na nomuni vanua sa bera ni cuki; ni kakua ni kaburaka nomuni sore ni kau ena veiwa vakavotona.

⁴ Kemuni na tamata mai Juta kei Jerusalemi, ni maroroya na nomuni veiyalayalati kei au, na nomuni Kalou ka vakacabora na yalomuni vei au. De na qai waqa noqu cudru me vaka na buka; me baleta na veika ca o ni sa cakava, ena kama ka na sega e dua me bokoca rawa.

⁵ Uvuca na davui Ena loma ni vanua taucoko Kaila vakadomoilevu me macala! Tukuna vei ira na tamata Mai Juta kei Jerusalemi Me ra dro ki na veikoro vakabai.

⁶ Dusia na sala ki Saioni! Ni dro mo ni bula! Kakua na wawa! Sa kauta mai na ca ko Jiova, Kei na veivakarusai levu mai cake, Vaka ki na vualiku.

⁷ Sa curu mai e dua na laioni Mai na nona i vunivuni; Sa lako mai na dauveivakarusai ni veimatanitu. Sa biuta mai na nona vanua, Me vakarusai Juta vakadua. Ena biu tu me rusa tu na veikoro e Juta, Ka na sega e dua me tawani ira.

⁸ Ni daramaka na i sulu taga, Tagi ka qoqolou, Baleta ni sa sega ni gole tani Na cudru waqawaqa ni Kalou Ki na vanua o Juta.”

⁹ A sa kaya ko Jiova, “Ena siga o ya era na rere na tui kei na turaga, era na kidacala na bete, ka ra na kidroa na parofita.”

¹⁰ Ia au a qai kaya, “Kemuni na Turaga na Kalou! O ni sa vakacalai ira vakalevu na lewe i Jerusalemi. O ni a kaya ni na yaco na sautu, ia oqo sa tu e dua na i seleiwau e domodra.

¹¹ Ena yaco mai na gauna ena tukuni kina vei ira na tamata e Jerusalemi ni sa liwa mai e dua na cagi katakata mai na vanua dravuisiga ka gole yani vei ira na luvequ yalewa. Ena sega ni liwa mai me cagina tani kina na qani sila se me veivakasavasavataki.

¹² Na cagi ena liwa mai ena lewa ni Turaga ena rui kaukauwa sara ena vuku ni ka o ya. Ia oqo na Turaga ga vaka i koya sa cavuta na i totogi oqo baleti ira na nona tamata.”

Sa Wavoliti Juta na Meca

¹³ Raica, era sa lako mai na meca me vaka na veio; ka sa vaka na covulaca na nona qiqinivalu; na nona ose era totolo cake mai na ikeli. Eda sa rusa! Eda sa leqa!

¹⁴ Jerusalemi, savuya tani na ca mai na yalomu, ka mo vakabulai kina. Ena vakacava so na dede ni nomu vakananuma voli na veika ca.

¹⁵ E dua na dautukutuku mai Tani, sa kauta mai na veitukutuku ca mai na veidelana mai Ifereimi.”

¹⁶ A sa kaya ko Jiova, “E rau sa kaya ki na veimatanitu ka tukuna ki Jerusalemi ni sa lako tiko na meca mai na dua na vanua vakayawa. Era na bolebole na veikoro e Juta,

¹⁷ Era na voliti Juta, me vaka na tamata era yadrava tiko e dua na buca, baleta ni sa veisaqasaqa kei au na matanitu.” A sa kaya ga ko Jiova.

¹⁸ Juta, na nomu i tovo ga kei na veika o a cakava, sa kauta mai vei iko na veika oqo; Na nomu ca ga sa vuna na ka rarawa oqo; ka sa tara sara na yalomu.

Sa Tagicaki Ira na Kai Nona o Jeremaia

¹⁹ “Ulei! au sega ni tukuna rawa Na rarawa ni yaloqu. Sa vavadugudugu vakaukauwa sara ga kina na utoqu! Au sa sega ni rawa ni galu; Au sa rogoca na domo ni davui Kei na cibi ni valu.

²⁰ Sa yaco veitarataravi na veika ca Ka sa rusa vakadua na vanua taucoko. Sa vakacacani vakasauri Na noqu valelaca, Ka kakadresudresu vakamatailalai Na kena i latilati.

²¹ A cava so na kena dede Me'u raica tiko na rerevaki ni valu, Ka rogoca na domo ni davui.

²² A sa kaya ko Jiova, “Era sa lialia na noqu tamata; Era sa sega ni kilai au. Era sa vaka na gone yalo wai, Sa sega na nodra vakasama. Era sa matai ni cakava na ka ca, Ia era sa sega ni kila Na cakava na ka dodonu.”

Raivotutaka o Jeremaia na Veivakarusai sa Votu Mai

²³ Ia, au a qai raica na vuravura Ka sega na kena i tuvaki se vatukana; Ka sa sega ni dua na rarama ena lomalagi.

²⁴ Au rai yani ki na veiulunivanua, Ka raica ni ra sa yavavala Ka ra veitosoyaki na veidelana.

²⁵ Au vakararai, Ka'u sega ni raica e dua na tamata, Ka ra sa vuka tani kece yani Na manumanu vuka.

²⁶ Na vanua bulabula Sa yaco me dravuisiga, Ka vakarusai kece tu Na kena veikoro, Baleta na cudru katakata ni Turaga.”

²⁷ A sa kaya ko Jiova, “Ena lala na vuravura taucoko Ia ena sega ni vakarusa taucoko sara vakadua.”

²⁸ “Ena tagi yaso na vuravura, Ka na loaloa mai na lomalagi” Sa i Jiova ga sa kaya vakaoqo. Ena sega ni veisautaki na lomana Sa vakatauca oti na nona lewa, Ka na sega ni veisautaka tale.

²⁹ Ena domodra na mataivalu vodo ose Kei na dauvanataki dakaititi Era na dui dro yani kina na tamata yadua; Eso era na dro ki na lekutu, Ka so era na kaba Ki na tadrua ni veivatu. Na veikoro kece sara Ena biu lala tu; Ka na sega e dua Me tawani ira.

³⁰ I Jerusalemi, o sa vakarusai! A cava o vakaisulu kina ena i sulu kulakula? A cava o tokara kina na i ukuuku koula, Ka boroya na matamu? Sa tawa yaga na nomu sauni iko! Era sa cati iko na nomu i tau; Ka ra via vakamatei iko.

³¹ Au rogoca e dua na tagi, E vaka e dua na yalewa sa taratara, E dua na vutugu E vaka e dua na yalewa E vakasucuma na nona ulumatua. A domo ni tagi i Jerusalemi Ena nona cegu oca, Ka dodoka yani na ligana Ka kaya, “Au sa vakarusai! Era sa lako mai Me ra vakamatei au!”