Jeremaia 20 - Ai Vola Tabu Ena Vakavakadewa Vou

Na Veileti i Jeremaia kei Pasuri na Bete

¹ O Pasuri na luve i Ima, e dua na bete ka i liuliu ena Vale ni Soro. A rogoci Jeremaia na parofita ni sa vunautaka na veika oqo.

² A vakanakuitataki Jeremaia o Pasuri ka vesuka ena sinucodo ki na matamata mai cake i Penijamini ena Valenisoro.

³ Ena mataka ka tarava ni sa sereki koya o Pasuri, a kaya vua o Jeremaia, “Sa sega ni vakatoka na yacamu ko Jiova o Pasuri. Sa vakatoka me yacamu o Rere ena veiyasana kecega.

⁴ A sa kaya ko Jiova, “Au na cakava mo vu ni rere vei iko vakataki iko, kei ira na wekamu, ia o na raica ni ra vakamatei kece ena i seleiwau mai vei ira na kedra meca. Au na soli ira kece sara na lewe i Juta vua na tui Papiloni; ena kauti ira vakabobula eso ki Papiloni, ka so era na vakamatei.

⁵ Au na laivi ira talega na kedra meca me ra butakoca na i yau kece sara ni koro oqo ka vesuka na kena veiyaya kece sara kei na ka e tu kina, era na bau kauta talega na nodra veiyau talei na tui Juta ka kauta kece ki Papiloni.

⁶ Ia o iko Pasuri kei ira kece na nomu vuvale, o ni sa na kau vakavesu ki Papiloni. O na mate mai kea ka bulu kina vata kei ira na wekamu o tukuna vei ira na veika lasu oqo.”

Na Vakatukutuku i Jeremaia vei Jiova

⁷ Kemuni na Turaga, O ni sa vakaisini au, Ka'u sa veidabuitaki. O ni sa kaukauwa cake vei au, Ka vakamalumalumutaki au. Era sa vakalialiai au Na tamata kecega; Era sa dredrevaki au Ena loma ni siga taucoko.

⁸ Ena veigauna kece ni'u vosa, Au dau qolou ka kailavaka, Na i Tovo Kaukauwa! na Rusa! Turaga, au sa vakalialiai ka vakacacani Ena veigauna kecega, Baleta ni'u vunautaka tiko Na nomuni vosa.

⁹ Ia ena gauna au kaya kina, “Au na guilecava na Turaga Ka sega tale ni vosa Ena vuku ni yacana.” A qai kama na nomuni vosa ena lomaqu Me vaka na buka; Sa sogolati ena suiqu. Au sa oca ena vosota tiko e lomaqu Ka'u sa sega ni rawa ni tarova.

¹⁰ Au sa rogoca Na nodra vakasolokakana na lewe vuqa, Era sa vakatoka na yacaqu Me o vu ni rere Ena veiyasana kecega. Era a kaya, “Vakatukutukutaki koya. Me da vosa vakacacataki. O ira sara mada ga na wekaqu, Era sa waraka na noqu bale sobu.” Era kaya, “Ena rawa beka ni lawakitaki, Me rawa ni da vesuki koya, Ka sauma noda cudru vua?”

¹¹ Ia, Turaga O ni sa totaki au, O ni sa kaukauwa ka qaqa Ka ra sa tarabe O ira kece era vakararawataki au; Era na sega sara ni qaqa. Era na vakamaduataki sara vakalevu Baleta ni ra na sega ni rawa ni qaqa. Na nodra madua Ena sega ni oti rawa Ka na sega sara ni guilecavi.

¹² Kemuni Jiova ni lewevuqa, O ni sa vakatovolea na tamata dodonu. O ni sa kila Na ka sa tiko ena yalodra Kei na nodra vakasama na tamata, Ia me'u raica mada Ni o ni na sauma na ca Vei ira na kequ meca, Baleta ni'u sa vakararavi vei kemuni.

¹³ Sere vei Jiova! Vakacaucautaka na Turaga! Sa vueti ira na vakalolovirataki Mai na nodra kaukauwa Na tamata i vadi ca dau veivakalolomataki.

¹⁴ Sa dua na siga ca au a sucu kina! Guilecava na siga e a vakasucumi au kina o tinaqu!

¹⁵ Me yaco na ca Vua na tamata e a vakamarautaki tamaqu, Ni sa kauta vua na i tukutuku, Sa sucu e dua na luvemu tagane!”

¹⁶ Laiva na tamata o ya Me vaka na veikoro sa vakarusa ko Jiova Ka sega ni lomana. Me rogoca na domo ni tagi Ena rere ena mataka lailai, Kei na domo ni davui ni valu ena yakavi,

¹⁷ Baleta ni a sega ni vakamatei au Ni'u a bera ni sucu mai; Me kequ i bulubulu ga kina Na kete i tinaqu Ka na levu tu kina vakadua na ketena.

¹⁸ A cava beka au a sucu kina? Me'u mai kila ga na rarawa kei na leqa, Ka tinia na noqu bula ena madua?