Jeremaia 2 - Ai Vola Tabu Ena Vakavakadewa Vou

Sa Kauwaitaki Isireli na Kalou

¹ A sa kaya tale vei au ko Jiova

² Me'u tukuna vei ira yadua mai Jerusalemi Na nona vosa oqo: “Au sa nanuma tiko na nomu yalodina Ni o a se gone, Ena nomu daulomani au Ni daru a se qai vakawati; O a muri au ena loma ni vanua dravuisiga, Ki na dua na vanua e se sega ni bau teivaki.

³ I Isireli, o sa vakatabui mo noqu taudua ga, O sai sevu uasivi duadua ni noqu vuata. Au na vakararawataki ira era vakararawataki iko, Ka'u na vakavuna na nodra leqa,” Sa kaya ga ko Jiova.

A Nodra Cala na Tubudra na Isireli

⁴ Ni vakarorogo mada ki na vosa i Jiova Na kawa i Jekope, Na veivuvale kece sara e Isireli.

⁵ Sa kaya ko Jiova: “A cava era raica na nomuni qase ni'u cala kina, Ka vakavuna me ra biuti au? Era qarava na veimatakau tawa yaga Me vaka na tamata yalo wai Ka ra sa mani yaco kina me ra ucui ira.

⁶ Era sa sega ni bau kauwaitaki au, Era sega ni bau vakataroga, Sa e vei ko Jiova ka a kauti keimami tani Ka liutaki ira mai ena loma ni vanua dravuisiga, Ena vanua veidelana ka sukusukura, Ena vanua dravuisiga, vakadomobula, Na vanua e sega ni bau dau lakovi, Ka sega ni bau dua e tiko kina.

⁷ Au a kauti ira ki na dua na vanua bulabula Me ra matalau ena kania na kena vuata Kei na kena veika vinaka e vuqa. Ia ni ra sa lako mai, Era sa vakacacana na noqu vanua; Ka vakadukadukalitaka na vanua au solia vei ira.

⁸ Era sega sara mada ga ni bau taroga na bete, “E vei ko Jiova?” Ka ra sa sega ni kilai au na nodra turaganilewa. Era sa vorati au na nodra i liuliu; Na parofita era parofisai ena yaca i Peali; Ka ra qarava na veikalou tani.

Na Veibeitaki i Jiova vei Isireli

⁹ Ia oqo oi au ko Jiova Au sa beitaki ira tale na noqu tamata; Au sa beitaki ira talega na luvedra na luvemudou.

¹⁰ Lako vaka ki na ra Ki na veiyanuyanu o Saipurusi ka raica; Talatala mada ki na tokalau ka vakaraica vakavinaka: E sa bau yaco kina e dua na ka vakaoqo e liu?

¹¹ E bau dua li na matanitu sa veisautaka na nona kalou, Ka dina ga ni ra kalou lasu era sa qarava? Ia era sa vakaisosomitaki au na noqu tamata, Mai na Kalou ka sa vakarogoi ira, Ki na veikalou sa sega ni vukei ira rawa.

¹² Mo kidroa o iko na lomalagi, Ka ririkotaka na veika oqo; Sa kaya ga ko Jiova.

¹³ Era sa vakayacora e rua na ka ca O ira na noqu tamata sa biuti au: Era sa vuki tani mai vei au, Na i vurevure ni wai bula, Ka ra sa kelia eso na i keliwai, Na i keliwai cicila sa sega ni tawa rawa.

Na i Sau ni Tawa Yalodina i Isireli

¹⁴ E bobula li o Isireli? Sa sucu beka ga mai me veiqaravi? Ia ena vuku ni cava ga Era sa vakasasataki koya kina na kena meca?

¹⁵ Era sa tagi vaka na laione ki vua; Era sa cakava na nona vanua me dravuisiga. Sa vakacacani sara vakaca nona veikoro, Ka sa lala tu.

¹⁶ Io, o ira na kai Mefisi kei Tapanesi Era sa voroka na nona qavokavoka.

¹⁷ Sa baleti iko ga na ka oqo, Isireli! Ni o sa biuti Jiova na nomu Kalou, Ena noqu a tuberi iko voli ena sala.

¹⁸ A cava o a vakasaqara lako i Ijipita? Mo la'ki gunuva na wai mai na uciwai na Naile? A cava o a vakasaqara ena nomu lako ki Asiria? Mo la'ki gunuva na wai mai na Uferetisi?

¹⁹ Na nomu i valavala ca ga ena sauti iko; Kei na nomu gole tani vei au ena vakarusai iko. O na kila vakataki iko na kena gaga kei na kena ca Na nomu vakanadakui Jiova na nomu Kalou, Ka sega ni rerevaki koya.” Sa kaya ga ko Jiova na Kalou ni lewevuqa.

Sa Bese ni Qaravi Jiova o Isireli

²⁰ “Isireli, o a sa besetaka makawa sara na noqu lewa; O cata na muri au, ni o sa kaya, Au na bese ni qarava! Ia ena veidelana cecere Kei na ruku ni veivunikau drokadroka, O a sega ni yalodina vei au Me vaka na yalewa dautagane.

²¹ Au a tei iko me vaka na vaini digitaki, Ka mo vaka talega na sorenikau vinaka sara. Ia raica mada na kemu i rairai! O sa vaka na vaini ca ni veikau.

²² Kevaka o na savai iko ena lase ka sisili vakalevu ena sovu, Au na raica tikoga na dukadukali ni nomu i valavala ca.

²³ O kaya rawa vakacava ni o sega ni vakadukadukalitaki iko, Ni o a sa sega ni bau qaravi Peali? Raica mada na i valavala ca o a cakava ena buca; raica na ka o sa cakava. O sa vaka na kameli kila sa via veiyacovi, ka sa veiciciyaki voli me vakaceguya na lomana,

²⁴ ka sa vakatotolo yani ki na vanua lala. Ni sa tuburi koya na via veiyacovi, o cei ena tarova rawa? E sega na tagane e vinakati koya me na suka wale; Ni sa dau tu vakarau ena gauna ni veidauci.

²⁵ Me kakua ni yavu na yavamu, i Isireli; Se cakava me mamaca na nomu i tilotilo mai na vakacemuri ira na veikalou tani. Ia o sa qai kaya, “Sega! Sa sega ni rawa ni'u vuki lesu. Au sa vinakati ira na kalou tani, Ka'u sa na muri ira ga!”

Rauta Vinaka me Totogi o Isireli

²⁶ Me vaka na nona vakamaduataki na daubutako ni sa vesu, ena vakakina na nomuni vakamaduataki na Isireli; o kemuni, na nomuni tui, na luvedra na tui, na nomuni bete kei ira na parofita,

²⁷ era sa kaya ki na vunikau, “O iko na tamaqu,” ka kaya ki na vatu, “O iko na tinaqu.” Baleta ni o ni sa vakanadakui au, ka sega ni vakanamata mai. Ia ena gauna ni leqa era sa kaya, “Ni lako mai ka vakabulai keimami!”

²⁸ Ia era sa lako evei na veikalou o ni sa cakava me nomuni? Laiva me ra lako mai, ke rawa ni ra vakabulai kemuni, ena nomuni leqa; ni sa rui levu na nomu kalou me vaka na levu ni nomu veikoro, i Juta.

²⁹ A sa kaya ko Jiova, “A cava o ni sa beitaki au kina? O ni a biuti au kece sara.

³⁰ Au a totogitaki ira na luvemuni, ia sa sega ni yaga, era sa sega ni vulica rawa e dua na ka. O ni sa vakamatei ira na nomuni parofita ena i seleiwau me vaka na laioni cudrucudru.

³¹ Ni rogoca vinaka kece sara na Isireli na vosa ni Turaga. Au a vaka li na vanua dravuisiga vei iko, se vaka e dua na vanua rerevaki? A cava o ni kaya kina na noqu tamata keimami sa lewai keimami ga, keimami na cakava ga na ka keimami vinakata, ni keimami sa galala ka keimami sa na sega ni lesu tale yani vei iko?

³² Ena guilecava li e dua na goneyalewa na nona i ukuuku, se na yalewa vakarau vakamau na nona i sulu ni vakamau? Ia o ira na noqu tamata era sa guilecavi au, ena vuqa na siga ka sa sega ni wiliki rawa.

³³ O sa rui matai dina ena vakasaqarai ira mai o sa domona, ka sa tuberi ira talega na yalewa i vakarau vakasisila ena nomu sala.

³⁴ Sa dukadukali tu na nomu i sulu ena nodra dra na dravudravua kei na yalododonu, na nodra dra era sega ni bau mai butako ena nomu vale. Ia, e veitalia ga na veika kece sara oqo, o sa kaya tikoga,

³⁵ ‘Au na sega ni cala, ena sega ni cudruvi au ko Jiova!’ Ia, sa kaya ko Jiova, ‘Au na vakaitotogitaki iko, baleta ni o sa kaya, Sa sega na nomu cala.’

³⁶ A cava sa rui rawarawa kina na nomu veisautaka na lomamu? Era vakamaduataki iko o Ijipita, me vaka e a cakava o Asiria.

³⁷ O na gole tani talega mai Ijipita ka vakacuva na ulumu ena madua. Ni sai au o au sa cati ira o sa vakadinata. O na sega sara ni rawata e dua na ka mai vei ira.”