Jeremaia 13 - Ai Vola Tabu Ena Vakavakadewa Vou

Na Beleti Lineni

¹ A tukuna vei au ko Jiova me'u la'ki volia e dua na i beleti lineni ka daramaka sara; ia me'u kakua ni tonia ena wai.

² Au a mani la'ki volia na beleti ka daramaka sara, me vaka a vakarota vei au ko Jiova.

³ Ia a qai vosa tale vei au ko Jiova ka kaya,

⁴ Mo lako mada ki na uciwai na Uferetisi. Taura na beleti ka vauca tiko e tolomu, ka la'ki vunia ena dua na qara ena veivatu.”

⁵ Au sa mani lako yani ka la'ki vunia na beleti volekata na Uferetisi me vaka a vakarota ko Jiova.

⁶ Ena dua na gauna e muri, a tukuna vei au ko Jiova me'u lako tale ki na Uferetisi ka la'ki kauta mai na beleti lineni e a tukuna me'u la'ki vunitaka e kea.

⁷ Ia au a qai lesu tale ki na uciwai na Uferetisi. Au la'ki vakaraica na vanua au a vunitaka kina na beleti ka kunea kina. Au sa raica ni sa ca sara ka sa na sega ni yaga tale ena dua na ka.

⁸ A qai vosa tale vei au ko Jiova ka kaya,

⁹ Ena vakaoqo na noqu vakarusa na dokadoka i Juta kei na qaciqacia levu e tu vei Jerusalemi.

¹⁰ Na noqu vosa era sa bese ni muria na tamata ca oqo era sa muria ga na yalodra kaukauwa; era sa muri ira na veikalou tani me ra sokalou kina ka qaravi ira. O koya oqo era sa na vakakina na beleti oqo, sa na sega ni yaga ena dua na ka.

¹¹ Me vaka na kena qaqaco vinaka na beleti ena tolona e dua na tamata, sa vakakina na noqu nanuma me baleti ira kece na lewe i Isireli kei na lewe i Juta, me ra kabi matua vei au,” a kaya ko Jiova. Au na cakava na ka oqo me ra yaco kina me ra noqu tamata, me dokai ka vakarokorokotaki kina na yacaqu, ia era sa sega ni via vakarorogo.”

Na Saqa ni Waini

¹² Jeremaia, tukuna vei ira na Isireli, sa tukuna mai ko Jiova na nodra Kalou: Me tawa na saqa ni waini taucoko sara ena waini. Era na kaya vei iko ni ra sa kila ni dodonu me tawa kece sara na saqa ni waini ena waini.

¹³ Tukuna vei ira ni sa kaya ko Jiova, Au na vakasinaiti ira kece sara na lewe ni vanua oqo ena waini me yacova ni ra sa mateni: o ira na tui era kawa i Tevita, o ira na bete, o ira na parofita kei ira kece na lewe i Jerusalemi.

¹⁴ Au na qai botobotolaki ira vata me vaka na saqa, o ira na qase kei ira na luvedra. Sa na sega tale na loloma, se na yalo veivosoti se yalololoma me na tarova na noqu vakamatei ira.”

¹⁵ Sa kaya ko Jiova, “Kemuni na Isireli, Ni yalo malumalumu ka vakarorogo vua.

¹⁶ Ni vakarokorokotaka na Turaga Na nomuni Kalou; Ni se bera ni kauta mai na butobuto Ka bera ni qai tavutu na yavamuni Ena veiulunivanua ena buto ni yakavi; Ni se bera ni vuki me butobuto loaloa sara, Na rarama o ni nuitaka tiko.

¹⁷ Ia kevaka o ni na sega ni vakarorogo, Au sa na tagi vuni Baleta na nomuni qaciqacia; Au na tagi sara vakaukauwa, Ka na titiri na wai ni mataqu, Baleta ni ra sa kau tani vakabobula Na nona tamata na Turaga.”

¹⁸ A sa kaya ko Jiova vei Jeremaia, “Tukuna vua na tui Kei na tinana na ranadi Me rau siro sobu Mai na nodrau i dabedabe vakaturaga, Baleta na nodrau i sala vakatui rairai vinaka Sa lutu mai na uludrau.”

¹⁹ Sa valuti na veikoro mai ra, vaka ki na ceva, sa sega ni dua me lako rawa vei ira. Era sa kau tani kece sara na lewe i Juta era sa kau kece vakabobula.”

²⁰ Ni raica na lewe i Jerusalemi! Era sa lako sobu mai na kemuni meca mai cake, vaka ki na vualiku. Sa e vei o ira na tamata era soli ki na ligamu? O ira na nomu tamata era vaka e dua na qele ni sipi totoka.

²¹ A cava o ni nanuma me baleti ira na tamata o ni nanuma ni ra sa nomuni tokani era sa lesi me ra nomuni i liuliu? O ni na rarawa me vaka e dua na yalewa sa taratara?

²² Kevaka o ni taroga, se cava e yaco kina na ka oqo vei kemuni? A cava sa dresulaki kina na nomuni sulu, ka vakacacani kina? E baleta ga na rerevaki ni nomuni valavala ca.

²³ E rawa li vua e dua na kai Eciopea me vukica na kuli ni yagona? Se na leopate mai na kena tavutonotono? Kevaka e rawa, sa na rawa mo ni na cakava na ka vinaka oi kemuni sa dau kitaka na i tovo ca.

²⁴ Ena kaburaki kemuni ko Jiova me vaka na qani sila sa cagina tani ena cagi ni vanua dravuisiga.

²⁵ A sa kaya ko Jiova ni sai koya oqo na ka ca ena yaco vei kemuni baleta ni o ni sa guilecavi koya, ka vakadinata na veikalou lasu.

²⁶ Ko Jiova ga ena luvata laivi na nomuni sulu ka vakaraitaki kemuni mo ni madua.

²⁷ Sa raici kemuni ko Jiova ni o ni cakava na veika e cata: ena veidelana kei na veibuca, o ni sa muri ira na veikalou tani, me vaka e dua na tamata sa domona na watina na wekana, e vaka e dua na ose tagane sa garova e dua na ose yalewa. Kemuni na lewe i Jerusalemi, o ni sa na rusa! A cava na kena dede o ni na qai vakasavasavataki?