Jeremaia 12 - Ai Vola Tabu Ena Vakavakadewa Vou

Sa Vakatarogi Jiova o Jeremaia

¹ Kemuni na Turaga Kevaka au veileti kei kemuni, O ni sa dodonu ga. Ia sa dodonu me'u tarogi kemuni mada ga Baleta na lewa dodonu. A cava era toso cake kina na tamata ca? A cava era tiko vinaka kina na dauveivakaisini?

² O ni a tei ira, Ka ra sa vakawakana; Era tubu ka vua sara. Era sa vosa vakavinakataki kemuni Ena gusudra. O ni sa yali ka yawa ena lomadra.

³ Io Jiova, o ni sa kilai au, O ni sa raici au, Ka vakatovolea na lomaqu vei kemuni. Ni yarataki ira oqo Me vaka na sipi sa kau me vakamatei; Tawasei ira tani Me yacova na siga me ra vakamatei kina.

⁴ Ena vakacava so na dede ni lauqa ni vanua, Ka mamaca na co ni veibuca? Era na mate na manumanu kei na manumanu vuka Baleta na nodra ca Na tamata era tiko kina, Ka ra kaya ni o ni sega ni raica Na nodra i valavala.

⁵ Sa kaya ko Jiova, “Jeremaia, kevaka o sa cegu oca Ni o veitau cici vata kei na tamata; Ena qai rawa vakacava Mo veitau cici vata kei ira na ose? Ia kevaka o sa bale Ena dua na vanua galala, O na qai bula vakacava Ena veikau osooso mai na Joritani?

⁶ O ira sara mada ga na tacimu Kei na lewe ni nomu vuvale Era sa cakitaki iko, Era sa wili talega Me ra saqati iko Kakua sara ni vakadinati ira, Veitalia ga Kevaka era vosa vakavinaka vei iko.”

Na Rarawa i Jiova baleta na Nona Tamata

⁷ Sa kaya ko Jiova, “Au na vakanadakui ira na noqu tamata, Au na biuta laivi na noqu matanitu digitaki. Ka'u na soli ira na tamata au sa lomani ira Ki na ligadra na kedra meca.

⁸ Era sa saqati au na noqu tamata Me vaka e dua na laione Ena loma ni veikau; Era sa tagi vakacudrucudruya mai vei au, Ia au sa cati ira.

⁹ O ira na noqu tamata digitaki Sa vaka na manumanu Sa voliti ira eso na manulevu Me veivala kaya. Kacivi ira mai na manumanu kila Me ra mai kana talega!

¹⁰ Sa vuqa na i liuliu ni veivanua tani Era sa vakacacana na noqu loganivaini; Era sa buturaka sobu na noqu vanua; Ka ra sa vukica na noqu vanua vinaka Me vanua lala.

¹¹ Era sa cakava na vanua me tawa yaga; Sa davo vakaloloma koto e mataqu. Sa yaco na vanua taucoko me vanua dravuisiga, Ka sega ni dua me kauwaitaka.

¹² Era sa lako mai na dauveivakarusai Mai na veidelana dravuisiga kece. Au sa tala na i valu Me vakarusa na vanua taucoko Ka na sega sara e dua na tamata Me bula vakacegu tikoga.

¹³ Era na tea na witi na noqu tamata, Ia era sa tamusuka na wa vakavotona; Era cakacaka vakaukauwa, Ia era sega ni rawata kina e dua na ka. Baleta na noqu cudru rerevaki Sa sega ni vua kina na veika era tea.”

Na Yalayala i Jiova baleti Ira ka Bula Veitikivi kei Isireli

¹⁴ A sa kaya ko Jiova, me baleti ira na tamata sa bula veitikivi kei Isireli ka ra sa vakacacana na vanua au a solia vei ira na noqu tamata na Isireli. “Au na kauti ira tani na tamata oqo mai na dui nodra vanua me vaka na kau cavu vakadua, ka'u na vakabulai Juta mai vei ira.

¹⁵ Ia ni'u sa kauti ira tani oti, au sa qai lomani ira, au na qai kauta lesu tale na veimatanitu yadua ki na dui nodra vanua kei na dui nodra veimatanitu.

¹⁶ Ia kevaka era na ciqoma na nodra vakabauta na noqu tamata ena yalodra taucoko, ka bubului, ‘Me vaka sa bula ko Jiova’ me vaka na nodra a vakavulici ira na noqu tamata me ra bubului ki na yaca i Peali, era na qai wiliki vata kei ira na noqu tamata.

¹⁷ Ia kevaka e dua na matanitu ena bese ni muria, au na cavuraka vakadua ka vakarusa. Oi au, ko Jiova, ka'u sa tukuna oqo.