Isikeli 7 - Ai Vola Tabu Ena Vakavakadewa Vou

Sa Voleka na i Cavacava kei Isireli

¹ A yaco tale vei au na vosa i Jiova, ka kaya,

² “Luve ni tamata, sa kaya vakaoqo na Kalou ko Jiova ki na vanua o Isireli: Sa i koya oqo na i cavacava ni vanua taucoko oqo!

³ “I Isireli, sa yaco mai na i vakataotioti vei iko. Au na vakayacora na noqu cudru vei iko, ka vakataulewa vei iko me vaka na nomu i valavala; ka'u na totogitaki iko me baleta na nomu i tovo vakasisila kecega.

⁴ Au na sega ni vosoti iko ka sega talega ni yalololoma vei iko. Ia ka'u na cudruvi iko ga ena vuku ni nomu i valavala, ni sa tu oqori vei iko na i valavala vakasisila. Ena ka oqo o na qai kila kina ni sai au ko Jiova.”

⁵ Sa kaya vakaoqo na Kalou ko Jiova, “Na leqa veitarataravi! Raica, ena yaco mai vei iko.

⁶ Sa cava na ka kecega. Oqo na i vakataotioti. Sa oti vakadua vei iko.

⁷ Sa voleka mai na i cavacava ni gauna ni nodra tiko na lewenivanua ena vanua. Sa roro mai na gauna me mudu kina na solevu ni mamaue ena veiulunivanua.

⁸ “Ena dua ga na gauna lekaleka oqo ka'u na sovaraka yani kina na noqu cudru vei iko, ka lewai iko me vaka na nomu i valavala; ka'u na sauma vei iko na nomu i valavala vakasisila kecega.

⁹ Au na sega ni vosoti iko ka'u na sega talega ni yalololoma vei iko. Au na sauma ga vei iko me vaka na nomu i valavala vakasisila ka sa tu oqori vei iko. Ia o na qai kila kina ni sai au ko Jiova ka'u sa ia na veitotogitaki.”

¹⁰ Raica, na kena siga! Sa yaco mai oqo na siga ni rarawa. Sa tubu cake ga na i vakarau kaukauwa. Sa tu sara ena dua na delana cecere na dokadoka viavialevu.

¹¹ Sa vakatubura e levu tale na i tovo vakasisila na i vakarau kaukauwa. Ena sega na ka me na bau vo vei ira, se dua na nodra i yau, se na kedra i divi, se na nodra i ukuuku.

¹² Sa yaco mai na kena gauna, sa toro voleka mai na kena siga. Me kakua ni reki oi rau sa ia na veivoli, ka ni rau na cudruvi ruarua ga, me vaka ni'u na cudruvi ira kece na lewe ni vanua.

¹³ Ni na sega ni lesuva rawa tale na dauvolivolitaki na ka sa volitaka, ni ra sa bula tiko. Ni sa yaco na cudru vei ira na nodra i wiliwili ka sa na sega ni lesu tale mai, ena vuku ni nona caka cala, ka sega ni dua me vukea na nona bula.

¹⁴ Era sa uvuca na davui, io, me ra vakarau kecega; ia sa sega ni dua e via vakarorogo, ni sa tau tiko na noqu cudru vei ira na lewe vuqa.

¹⁵ Sa tiko e taudaku na i seleiwau; sa tu e loma ni vale na mate dauveitauvi kei na dausiga; ia o koya sa tiko ena lomanivanua ena mate ena i seleiwau; o koya sa tiko mai na koro, ena kani koya na dausiga kei na mate dauveitauvi.

¹⁶ Eso era na dro ki na veiulunivanua me vakataki ira na ruve ni veibuca. Era na osivaka kece sara na nodra i valavala ca.

¹⁷ A liga kece ena wadamele, ka malumu na durudra me vaka na wai.

¹⁸ Era sa vauci ira ena i sulu taga, ka sa nodra i tutuvi na taqaya kei na domobula; era na matamadua o ira kecega, ka na mira kece na uludra.

¹⁹ Era sa biuta tani na nodra siliva e gaunisala ni soro, kei na koula sa na ka dukadukali vei ira. Na nodra siliva kei na nodra koula ena sega ni vakabulai ira rawa mai na cudru i Jiova. Era na sega talega ni vakaceguya rawa kina na nodra viakana me ra mamau. Ni sa nodra caka cala oqo era tarabe kina.

²⁰ Ia na nodra i ukuuku rairai totoka ka ra tokara me ra qaciqacia kina, na nodra matakau vakasisila kei na ka velavela era sa cakava kina; au na saumaka me ra na vakasisilataka.

²¹ “Ia ka'u na solia ki na ligadra me i toki; ia ka ra na vakacacana.

²² Au na vagolea tani na mataqu mai vei ira, ka ra na vakacacana kina na noqu tikina tabu; ni ra na curu kina na daubutako me ra vakacacana, ka vakalala.

²³ “Ena vuku ni sa sinai na vanua ena cala ni vakadave dra, ka sa levu sara na i valavala kaukauwa ena koro,

²⁴ ka'u sa kauti ira mai na tamata lolovira ni veimatanitu me ra mai taukena na nodra veivale. Au na muduka vakadua na nodra viavialevu kaukauwa; ena vakacacani na nodra veiyasana tabu.

²⁵ Ni sa yaco mai na rarawa bibi kei na yaluma, era na vakasaqara na veivinakati, ia ena sega sara.

²⁶ Ena yaco veitarataravi na leqa rerevaki ka vakadomobula, ka veitarataravi talega na i tukutuku vuka; era na qai taroga na raivotu vua na parofita, ia sa yali na vunau mai vua na bete, ka sa yali talega na i vakasala mai vei ira na qase.

²⁷ Sa vakaloloku na tui, ka luvuci koya na turaga na taqaya; a ligadra talega na lewe ni vanua ena sautaninini ena rere. Au na cakacaka vei ira me vaka na nodra i valavala, ka'u na vakataulewa vei ira me vaka na nodra dui lewa; era na qai kila ni sai au ko Jiova.”