Isikeli 43 - Ai Vola Tabu Ena Vakavakadewa Vou

Lesu Tale Mai ni Turaga

¹ A kauti au o koya ki na matamata ni koro, ka qara vaka ki na tokalau.

² A raica, sa lako mai na tokalau na i serau ni Kalou ni Isireli; ia na domona sa vaka na vadugu ni wai levu; ia sa cilavi vuravura na nona i serau.

³ Ia na raivotu ka'u a raica, sa rairai tautauvata kei na raivotu ka'u a raica ni sa lako mai o koya me mai vakarusa na koro: ia na raivotu oqo sa vaka na kena ka'u a raica ena uciwai o Kipa; ka'u sa cuva vakatoboicu kina.

⁴ Ia na i serau i Jiova sa curuma na Valenisoro mai na matamata ni koro sa qara donu vaka ki na tokalau.

⁵ A tuberi au cake na Yalo i Jiova, ka kauti au ki na lomanibai e loma; ka raica, sa vakasinaita na loma ni Valenisoro na i serau i Jiova.

⁶ Ia ni tu ga e tikiqu na tamata o ya, au a rogoca e dua ni vosa tiko mai vei au mai na loma ni Valenisoro, ka kaya,

⁷ “Luve ni tamata, oqo na tikina sa noqu i tikotiko vakaturaga, kei na i tutu ni qeteqete ni yavaqu, na vanua ka'u sa tiko kina vei ira na Isireli ka sega ni mudu. Era na sega ni vakacacana tale na mataqali i Isireli na yacaqu tabu, se, na nodra tui, ena nodra dauyalewa, se na yagodra mate na nodra tui,

⁸ ena nodra cakava na nodra katuba ni vale kei na noqu katuba, kei na nodra duru ni sogo, kei na noqu duru ni sogo, ka qai koto ga na lalaga me tu ena keimami veimama. Era sa vakacacana na yacaqu tabu ena i valavala vakasisila era sa kitaka, ka'u sa vakarusai ira kina ena noqu cudru.

⁹ Ia oqo me ra biuta tani mada na nodra dau qarava na matakau ceuceu, ka me kauta tani vakayawa sara mai vei au na yagodra mate na nodra tui, ka'u na qai tiko kei ira ka sega ni mudu.”

¹⁰ “Ia o iko, na luve ni tamata, mo vakatakila ki na mataqali i Isireli, na Valenisoro kei na kena i tuvatuva, me ra maduataka kina na nodra cala.

¹¹ Kevaka era sa maduataka na ka kece era cakava, mo qai vakatakila vei ira na i vakarau ni vale, na kena i tuvatuva, na kena i curucuru ki tuba, na kena katuba ki loma, na kena i vakarau kecega; ka vakatakila na kena i vakarau, na kena i lesilesi kecega; vola e matadra, me ra vakabauta ka cakava na kena i vakarau, kei na kena i lesilesi kecega.

¹² Raica, na i vunau ni Valenisoro: sa tabu sara na vanua e volita ena dela ni ulunivanua. Oqo na i vunau me baleta na Valenisoro.”

Na i Cabocabonisoro

¹³ Sa vakaoqo na i vakavakarau ni i cabocabonisoro, ena kena vakayagataki na i vakarau vata ga ni Valenisoro. Ena yavu ni cabocabo ka wavokita, e koto kina na i tikina titobu ka 50 na senitimita na kena titobu, e 50 na senitimita na kena raba, kei na batibatina ena taudaku ni tutuna ka 25 na senitimita na kena cere.

¹⁴ Na tiki ni cabocabo sara e ra, mai na dela ni kena yavu e dua na mita na kena cere. Na tikina tarava, e toka vakalailai mai ki na daku ni tutuna, ka 50 na senitimita vakarivirivi, ka rua na mita na kena cere. Na tikina e tarava yani e toka vakalailai tale mai e daku ni tutuna ka 50 na senitimita vakarivirivi.

¹⁵ Ia na matadravu ni cabocabonisoro e rua na mita na kena cere. Na ucuna momoto ena tutu ni cabocabonisoro vava sa cecere cake mai na veitutu ni cabocabo kece sara.

¹⁶ Sa tautauvata na yasana vava ni mata ni cabocabo, ka ono na mita na balavu ni dua na yasana.

¹⁷ Ia me tautauvata talega na kena vata, me tini ka vitu na mita na kena balavu, ka tini ka vitu na kena raba, ka me dua na batina me volita me veimama na mita na kena raba; ia na rara e botona me veimama na mita ena veiyasana: na i kabakaba ni cabocabonisoro me qara donu ki na tokalau.

¹⁸ A kaya vei au o koya, “O iko, na luve ni tamata, a kaya vakaoqo na Kalou ko Jiova, Me vakaoqo na i valavala ni cabocabonisoro: Ena siga era sa cakava kina, me ra vakacabora kina na i soro kama, ka kureitaka ki delana na dra,

¹⁹ mo solia vei ira na bete, o ira na Livai era kawa i Setoki, era dau torovi au, me ra ia na cakacaka ni veiqaravi vei au, sa kaya na Kalou ko Jiova, e dua na luve ni bulumakau tagane me i soro ni valavala ca.

²⁰ Ia mo qai kauta eso na kedra dra, ka boroya na veiucuna momoto ena tutu ni cabocabonisoro, na mua vava ni rara, kei na kena i yalayala ena veitikina; oqo o sa vakasavasavataka kina na i cabocabonisoro, ka sorovaka.

²¹ Mo kauta talega na bulumakau ka i soro ni valavala ca, ia ena vakama o koya ena tikina digitaki ni Valenisoro, ena taudaku ni Vanua Tabu.

²² Ena i karua ni siga, mo vakacabora e dua na me tagane ka sega ni dua na ka e ca kina, me i soro ni valavala ca; ia me vakasavasavataki na i cabocabonisoro me vaka era sa vakasavasavataka na bulumakau.

²³ Ia ni sa oti na nomu vakasavasavataka, mo qai cabora e dua na luve ni bulumakau tagane sa sega ni dua na ka e ca kina, kei na dua na sipi tagane ka sa sega ni dua na ka e ca kina, mai na qele ni sipi.

²⁴ Mo qai vakacabori ira ena mata i Jiova, ia o ira na bete me ra kureitaka na masima ki yagodra, ka qai vakacabora vei Jiova me i soro kama.

²⁵ Me vakacabori tiko e tau yadua na me ena veisiga, ka me siga vitu, me i soro ni valavala ca; ka dua talega na luve ni bulumakau tagane kei na dua na sipi tagane ka sega ni dua na ka e ca kina.

²⁶ Me siga vitu me ra sorovaka tiko na i cabocabonisoro, ka vakasavasavataka, ka vakatabuya.

²⁷ Ia ni sa vakacavari oti na veisiga o ya, ka yaco mai na i kawalu ni siga, me ra qai vakacabora tiko na bete ena i cabocabonisoro, na nomuni soro kama kei na nomuni soro ni veivinakati; ia ka'u na ciqomi ka vinakati kemuni kina, sa kaya na Kalou ko Jiova.”