Isikeli 42 - Ai Vola Tabu Ena Vakavakadewa Vou

¹ A qai kauti au yani o koya ki na lomanibai e loma, donuya na mata ni vualiku, ka kauti au yani ki na rumu ka koto donuya na lomanibai ni Valenisoro veidonui vata kei na vale vaka ki na vualiku.

² Na balavu ni vale e toka ena yasa vaka ki na vualiku sa 50 na mita.

³ Me veitaravi kei na tikina sa 10 na mita ki lomanibai e loma ka qarava na sala rara vatu ki lomanibai e taudaku, sa koto veibasai veitarataravi e taba tolu na rumu.

⁴ Ia na mata ni veivale, sa dua kina na sala ena veimama ni vale ki loma, ka 5 na mita na kena raba, ka 50 na mita na kena balavu; ia na kedrau katuba sa qara vaka ki na vualiku.

⁵ Ia oqo na i taba veivale e cake sa rabalailai sobu, ena vuku ni varada ni sa rui rabailevu ki loma, ki na kena lalaga talega mai ra, kei na kena e loma ni vale.

⁶ E taba tolu e loma ni vale, ka sega ni vakaduru me vaka sa vakaduru na lomanibai. Ena ka oqo, sa lailai sobu kina na veitiki ni vale e cake sara, sa levu cake na kena i karua ki ra ka vakakina na kena i katolu.

⁷ A sa dua na bai e taudaku sa cici veidonui kei na veivale, ka gole vaka na lomanibai e taudaku, ka donuya na veivale, ka 25 na mita na kena balavu.

⁸ Na kena balavu na veitiki ni vale e lomanibai e taudaku e 25 na mita, ia o ira ka ra veidonui kei na Valenisoro sa 50 na mita.

⁹ Ia ena ruku ni veivale oqo, sa tu kina na kena katuba ena yasana vaka ki na tokalau ni dua e curu kina mai na lomanibai e taudaku,

¹⁰ na vanua e tekivu kina na bai e taudaku. Ena yasana talega ki na ceva, donuya na rara ka veibasai kaya na vale, sa koto kina na veivale, sa davo kina e dua na sala;

¹¹ era tautauvata sara kei na veivale vaka ki na vualiku, ka tautauvata na kedra balavu kei na kedra raba, ka vaka talega kina na kedra i tuvaki.

¹² Ia ena ruku ni veivale ena ceva, sa koto kina e dua na katuba, ena yasa ki na tokalau, ka kena katuba ni da muria na sala sa veidonui kei rau oqo sa qara donu ki na lalaga ka tawasea.

¹³ A kaya vei au o koya, “A veivale ena mata ni vualiku kei na kena ena mata ni ceva, o koya sa donuya na rara era sa veibasai vata kei na yasana tabu, oqori na veitiki ni Valenisoro, era dau kana kina na bete era torova na Turaga, ka ra na kania kina na i madrali tabu; era maroroya e kea na veika tabu, kei na i soro ni caka cala, ni sa tikina tabu.

¹⁴ Ni ra sa curu kina na bete, me ra kakua sara ni lako tani mai na tikina tabu, ki lomanibai ki taudaku, ni sa bera ni ra virikotora e ke na nodra i sulu ni cakacaka, ni sa tabu oqori; me ra veisau e ke ki na i sulu tani, ni bera ni ra toro volekata yani na kena ka nodra na tamata wale.”

Na Vakarautaki ni Tautuba ni Valenisoro

¹⁵ Ia ni vakarautaka oti o koya na vanua ni Valenisoro, a kauti au yani ki na dua na matamata ni koro, donuya na tokalau, ka vakarautaka na Valenisoro kei na kena e volita.

¹⁶ A sa taura na gasau ni vakarau ka vakarautaka na yasana vaka ki na tokalau, ka sa 250 na mita.

¹⁷ A vuki ka vakarautaka na tikina ki na vualiku, ka sa 250 na mita.

¹⁸ A qai tu ka vakarautaka na yasana vaka ki na ceva, ka sa 250 na mita.

¹⁹ A vuki ka vakarautaka na yasana vaka ki na ra, ka sa 250 na mita.

²⁰ Sa vakarautaka o koya na yasana vava. Sa viribaiti vakavolivoliti sara, ka sa rua na drau limasagavulu na mita na kena balavu, ka rua na drau limasagavulu na mita kena raba, me tawasei tani kina na tikina tabu kei na tikina sa vakatarai raraba.