Isikeli 33 - Ai Vola Tabu Ena Vakavakadewa Vou

Vakadrukai kei Jerusalemi

¹ Sa yaco tale mai vei au na vosa i Jiova, ka vaka:

² “Luve ni tamata, mo vosa vei ira na kai nomu ka kaya, ni'u sa kauta mai na i seleiwau ki na vanua, ka ra kauta na lewe ni vanua e dua na tamata, ka lesi koya me nodra i vakatawa;

³ ia kevaka sa raica o koya ni sa lako tiko mai ki na vanua na i seleiwau, uvuca na davui, ka vakaroti ira na mate;

⁴ ia kevaka sa rogoca dina e dua ga na tamata na domo ni davui, ka sega ni muria, ka yaco mai na i seleiwau, me mate kina o koya; sa baleti koya ga na nona mate.

⁵ Sa rogoca o koya na domo ni davui, ka sega ni kauwai kina; sa na baleti koya ga na nona mate. Ia kevaka sa muria na i vakaro, ena rawa ni vakabulai koya.

⁶ Ia kevaka sa raica o koya na i vakatawa ni sa lako tiko mai na i seleiwau, ka qai sega ni uvuca na davui, ka ra sega ni vakaroti kina na tamata, sa yaco mai na i seleiwau, ka mate kina e dua vei ira na tamata; sa mate yani o koya ena nona i valavala ca, ia na nona mate ka'u na taroga vua na i vakatawa.

⁷ “Ia o iko, na luve ni tamata, ka'u sa lesi iko mo nodra i vakatawa na mataqali i Isireli; mo solia na noqu i vakaro ena gauna ga o rogoca kina na vosa ka tau mai gusuqu.

⁸ Kevaka ka'u sa kaya vua na tamata ca, o iko na tamata ca, o sa na mate vakaidina, ia o qai sega ni vakaroti koya na tamata ca me vuki tani mai na nona i tovo ca, sa na mate ga na tamata o ya ena vuku ni nona i valavala ca, ia na nona mate ka'u na taroga vei iko.

⁹ Ia kevaka o sa vakaroti koya na tamata ca me gole tani mai na nona i tovo ca, ka qai sega ni vuki tani mai; ena mate ga o koya ena nona i tovo ca, ia o sa vakabulai iko.

¹⁰ “Ia o iko na luve ni tamata, mo kaya vei ira na mataqali i Isireli, Mo ni vosa vakaoqo, ka kaya, ‘Ia na noda talaidredre kei na noda i valavala ca, sa na saumi vei keda, ka da na uru sobu kina ena vuku ni veika oqo; ia e da na qai bula vaka e vei oi keda?’

¹¹ Mo kaya vei ira, Me vaka na dina ni noqu bula, sa kaya na Kalou ko Jiova, au sa sega ni vinakata se marautaka me mate na tamata ca, au vinakata ga me vuki tani mai o koya mai na nona i tovo ca; a cava li o ni via mate kina Oi Kemuni na Mataqali i Isireli?

¹² “Ia o iko na luve ni tamata, mo kaya vei ira na kai nomu, Ena sega ni vakabulai koya na yalododonu na nona i valavala dodonu. Ena siga sa talaidredre kina; ia na nona cala na tamata ca ena sega ni mate kina o koya ni sa vuki tani mai na nona ca; ia o koya sa yalododonu ena sega ni vakabulai koya na nona i valavala dodonu ena gauna sai valavala ca kina.

¹³ Ia sa dina au sa kaya vei ira na yalododonu ni sa na vakabulai vakaidina o koya, ia kevaka e vakararavi ki na nona i valavala dodonu, ka qai i valavala ca, ena sega ni la'ki nanumi tale na nona i valavala dodonu; ia ena mate ga ena vuku ni valavala ca sa cakava o koya.

¹⁴ “Ia sa dina ka'u sa kaya tale vua na tamata ca, ‘O na mate vakaidina,’ ia kevaka e gole tani mai na nona i valavala ca, ka cakava ga na ka e dodonu ka vinaka;

¹⁵ kevaka sa vakasuka na tamata ca na i vakadinadina, ka vakasuka talega na ka sa butakoca, ka sa muria na vunau ni bula, ka sega ni cakava na ka ca; ena bula vakaidina o koya, ena sega ni mate.

¹⁶ Ena sega tale ni la'ki nanumi me baleti koya na i valavala ca sa kitaka oti o koya; sa cakava o koya na ka dodonu ka vinaka, ena bula vakaidina o koya.

¹⁷ Ia, era sa kaya ga na kai nomu, ‘Sa sega ni dodonu na i valavala i Jiova’; ni o ira ga vaka i ira sa sega ni dodonu na nodra i valavala.

¹⁸ Ni sa gole tani o koya sa yalododonu mai na nona i valavala dodonu, ka sa cakava na ka ca, ena mate kina o koya.

¹⁹ Ia ni sa gole tani na tamata ca mai na nona ca, ka cakava na ka dodonu ka vinaka, ena bula vakaidina o koya.

²⁰ Ia o ni sa kaya tiko, ‘Sa sega ni dodonu na i valavala i Jiova’. Oi kemuni na mataqali i Isireli, au na lewai kemuni yadudua me vaka na nomuni valavala.”

Tukutuku mai Jerusalemi

²¹ Ia ena i kalima ni siga ni katini ni vula ni katini karua ni yabaki ni neimami tiko vakabobula, a qai lako mai vei au e dua na tamata a dro mai Jerusalemi, ka kaya, “Sa vakadrukai na koro.”

²² Ia oqo na liga i Jiova sa tu vei au ena yakavi ni bera ni tadu mai vei au o koya sa dro mai; ka sa dolava na gusuqu ko Jiova ena gauna ka lako mai kina vei au ena mataka; ka sa rawa kina me'u vosa ka sega ni galu tiko.

²³ Sa yaco mai vei au na vosa i Jiova, ka vaka:

²⁴ “Luve ni tamata, Era sa vosa na i vakatawa na veitiki ni vanua lala e Isireli, ka kaya: ‘Sa lewe dua ga o Eparama, ni sa taukena na vanua; ia e da sa lewe vuqa oi keda; sa soli vakaidina vei keda na vanua me da taukena.’

²⁵ O koya oqo mo kaya kina vei ira, ‘Sa kaya vakaoqo na Kalou ko Jiova: O ni sa kania na lewe vata kei na dra, ka tacake na matamuni ki na nomuni veimatakau, ka vakadave dra; ia mo ni qai taukena li na vanua?

²⁶ O ni sa vakararavi ki na i seleiwau, ka cakava na ka vakasisila, o ni sa vakacacana na watina na kai nona; ia mo ni taukena li na qele?’

²⁷ Mo kaya vakaoqo vei ira, ‘Sa kaya vakaoqo na Kalou ko Jiova: Me vaka na dina ni noqu bula, era na mate ga ena i seleiwau o ira ka vakatawa na veitiki ni vanua lala; ia o koya talega mai na i bili ka'u na soli koya vei ira na manumanu me ra kania; o ira ka ra tu ena vale kaukauwa vakaivalu, na ulu vatu, kei na qara vatu, era na mate ena mate dauveitauvi.

²⁸ Ni'u sa na vakalala na vanua me rusa; ena mudu talega na nona kaukauwa na viavialevu; ena lala talega na veiulunivanua e Isireli, ka sega ni dua na tamata me curuma yani.

²⁹ Era na qai kila ni sai au ko Jiova, ni'u sa vakalala na vanua ka me rusa ena vuku ni nodra i valavala vakasisila kecega era sa cakava.’

³⁰ “O iko talega na luve ni tamata, era sa veivosakitaki iko tikoga na kai nomu e tutu ni lalaga ni veivale kei na kedra katuba talega, ka ra veivosaki vaka i ira vakaveitacini, ka kaya, ‘Ni lako mai ka mai rogoca mada se na vosa cava sa rogo mai vei Jiova.’

³¹ Era a lako mai vei ira me vaka era lako mai na tamata, ka mai tiko e matamu me vakataki ira na noqu tamata, ka ra rogoca na nomu vosa, ia era sega ni muria se cakava, ni sa tu e tebe ni gusudra na vosa vakayalololoma, ia na lomadra sa muria ga na nodra kocokoco.

³² Raica, o sa vaka vei ira, e dua ka sa lagata na sere ni veidomoni, ka domo vinaka, ka qiria vinaka talega na i vakatagi, ni ra sa rogoca na nomu vosa, ka ra sega ga ni cakava.

³³ Ia ni sa yaco na ka oqo ka na yaco vakaidina! era na qai kila ni a tiko kei ira e dua na parofita.”