Isikeli 32 - Ai Vola Tabu Ena Vakavakadewa Vou

Osivaki na Tui Ijipita kei na Nona Matanitu

¹ “Ia ena i matai ni siga ni katini karua ni vula ni katini karua ni yabaki, sa qai yaco tale mai vei au na vosa i Jiova, ka vaka,

² “Luve ni tamata, mo osivaka na tui Ijipita, ka kaya vua: O sa okati iko mo laione vei ira na veimatanitu, ia o sa vaka ga na korokotaile e loma ni wasawasa; o sa lako vata mai kei na nomu veiuciwai, ka vakayavalata na wai ena yavamu, ka vakavuvuya na nodra veiuciwai.

³ Sa kaya vakaoqo na Kalou ko Jiova: Ni sa vakasoqoni vata mai e lewe vuqa na tamata, au na coriti iko ena noqu lawa ka laivi ira me ra yarataki iko yani ki vanua.

⁴ Ia ka'u na biuti iko sara ki dela ni qele, ka'u na viritaki iko ki na loma ni vanua, ka lewa me ra ro e delamu na manumanu vuka kecega, era na veikocokocotaka na lewemu na manumanu taucoko e vuravura.

⁵ Au na yanaraka na lewemu ena dela ni veiulunivanua, ka vakasinaita na veibuca ena dagodago ni yagomu.

⁶ Au na vakasuasuataka na vanua, ka me bau la'ki yaco sara ki na veiulunivanua ena nomu dra ka sa dave tiko; ia na veisoniwai era na sinai tu ena veitikimu.

⁷ Ni'u sa vakarusai iko oti, ka'u na qai ubia na lomalagi, ka vakabutobutotaki ira na veikalokalo; Au na ubia na matanisiga ena dua na o, na vula talega ena sega ni solia na kena rarama.

⁸ Ka'u na vakabutobutotaka na rarama lumilumisa ramase kecega mai lomalagi, ka vakayacora na butobuto ena nomu vanua, sa kaya na Kalou ko Jiova.”

⁹ “Au na vakaleqa na lomadra e lewe vuqa na tamata, ni'u sa kauti iko vakavesu na veimatanitu, ki na vanua o sa sega ni kila se butuka.

¹⁰ Au na cakava me ra domobulataki iko e lewe vuqa sara na tamata, ka ra na ririko e lewe vuqa na tui ena vukumu, ni'u sa na laveta cake na i seleiwau e matadra; era na dui sautaninini tikoga na tamata yadua ena vuku ni nodra bula yadua ena siga o sa bale kina.”

¹¹ Sa kaya vakaoqo na Kalou ko Jiova: “Ena tau vei iko na nona i seleiwau na tui Papiloni.

¹² Au na vakavuna me ra tamata rerevaki vei ira na veimatanitu. “Ka ra na vaqeyavutaka na viavialevu nei Ijipita, ka ra na rusa yani na lewe vuqa.

¹³ Au na vakarusa tani na manumanu kecega mai na bati ni uciwai e vuqa; ka sa na sega tale na yava ni tamata me vakaleqai ira, ka vaka talega kina na nodra ququ ni manumanu.

¹⁴ Au na qai vakamakaretaka na wai, ka'u na cakava na uciwai me drodro me vaka na waiwai, sa kaya na Kalou ko Jiova.

¹⁵ Ia ni'u sa vakalala na vanua o Ijipita ka tokitaka tani mai na vanua na ka kecega sa sinai kina, ni'u sa samuti ira kecega era sa tiko kina, era na qai kila ni sai au ko Jiova.

¹⁶ Sa i koya oqo na sere ni lolosi era sa lagata ena nodra vakalolokutaki koya. Era na lagata oqo o ira na goneyalewa ni veimatanitu ena nodra lolositaki Ijipita kei ira kecega na nona lewenivanua,” a sa kaya na Kalou ko Jiova.

Na Vuravura ni Mate

¹⁷ Ena i katini kalima ni siga, ni matai ni vula ni katini karua ni yabaki, a qai yaco vei au na vosa i Jiova, ka vaka:

¹⁸ Luve ni tamata, mo tagicaki ira na lewe vuqa ni Ijipita, ka biuti ira sobu, o koya kei ira na goneyalewa ni veimatanitu rogo, ki na ruku ni vuravura, vei ira era sa lako sobu ki na nodra vuravura na mate.

¹⁹ O cei li o uasivi cake vua ena mata vinaka? Mo lako sobu, ka la'ki koto kei ira na tawa cili!

²⁰ “Era na bale ga o ira na vakamatei ena i seleiwau, ka ra na koto kaya o ira na lewe vuqa.

²¹ O ira na tamata qaqa ka vala ena vukudra na kai Ijipita era sa kidavaki ira na kai Ijipita ki na nona vuravura na mate. Era sa kailavaka yani: ‘O ira na tawa vakabauta na Kalou ka vakamatei ena i valu era sa lako mai ki ra oqo, ka ra sa davo tu eke!’

²² “Sa tiko mai kea o Asiria, kei ira na nona i lawalawa, na kedra i bulubulu e vakavolivoliti koya, o ira kece era vakamatei ka ra bale mate ena i seleiwau:

²³ ka sa koto na kedra i bulubulu ena yasana titobu duadua ni vuravura ni mate. O ira na nona sotia kece sa bale ena i valu, ka sa wavoliti na nona i bulubulu mai na nodra i bulubulu na sotia. Ena dua na gauna era a vakavuna voli na rere kei na taqaya o ira oqo ena nodra vuravura na bula.

²⁴ “Sa tiko mai kea o Ilama kei ira kece na lewe vuqa, ka ra koto volita na nona i bulubulu; o ira kece era vakamatei ena i seleiwau, ka ra lako sobu ka tawa cili tu ki na ruku ni vuravura, o ira ka ra vakatetea na rere kei na taqaya levu ena nodra vanua na bula tiko; ka ra sa nodra tu na mata madua kei ira vata era lako sobu ki na vuravura ni mate.

²⁵ Era a cakava vua e dua na nona i davodavo ena kedra maliwa na vakamatei kei ira kece na nona i soqosoqo ni lewe vuqa, ka ra tu voliti koya ena nona i bulubulu o ira kecega ka tawa cili, ka ra vakamatei ena i seleiwau; ni sa vakatetei na i tukutuku ni nodra taqaya levu ena nodra vanua na bula, ka ra na kauta sobu na nodra vakamaduataki vei ira ka ra lako sobu ki na vuravura ni mate; era sa vakotori vata kei ira na vakamatei.

²⁶ “E rau sa tiko mai kea o Meseki, kei Tupali, kei ira na nodrau lawalawa; ka ra tu vakavolivoliti rau na kedra i bulubulu, ka ra tawa cili taucoko, ka vakamatei ena i seleiwau; ni ra sa vakateteya na taqaya levu ena nodra vanua na bula tiko.

²⁷ Era sa sega ni vakotori vata kei ira na tamata qaqa ni gauna e liu, o ira ka ra lako sobu ki na vuravura ni mate kei na nodra i yaragi ni valu, o ira ka ra vakailokoloko ena nodra i seleiwau ka davoca koto ga na nodra i sasabai. O ira na bati qaqa oqo era a tamata kaukauwa ka ra a dau vakadomobula tu vei ira sa bula tiko.

²⁸ “Ia o iko, o na voroki ga ka vakotori kei ira na tawa cili kei ira era sa vakamatei ena i seleiwau.

²⁹ “Sa tiko mai kea o Itomi, o ira na kena tui kei ira na kena turaga kecega, kei na nodra qaqa kece era sa koto kei ira era sa vakamatei ena i seleiwau; era koto kei ira na sega ni cili, kei ira ka ra sa lako sobu ki na vuravura ni mate.

³⁰ “Era sa tiko mai kea o ira kece na turaga mai na vualiku, kei ira kecega na kai Saitoni, o ira ka ra sa lako yani ena madua vata kei ira na vakamatei, ena vuku ni taqaya levu ka ra vakavuna ena nodra kaukauwa; ka ra koto ka ra sega tu ni cili kei ira era vakamatei ena i seleiwau; ka ra colata vata na nodra madua kei ira era lako sobu ki na vuravura ni mate.

³¹ “Ia ni sa raici ira o tui Ijipita, ena vakacegui koya kina ena vukudra na nona lewe vuqa era sa vakamatei ena i seleiwau, io o tui Ijipita kei ira kecega na nona i valu, sa kaya na Kalou ko Jiova.

³² “Ni sa vakatetea o koya na taqaya ena nodra vanua na bula tiko; o koya oqo, e sa vakotori kina o koya kei ira na sega ni cili, kei ira era sa vakamatei ena i seleiwau, io o tui Ijipita kei ira kecega na nona i lawalawa,” sa kaya na Kalou ko Jiova.