Isikeli 28 - Ai Vola Tabu Ena Vakavakadewa Vou

Na Parofisai me Baleti Tui Taia

¹ Sa yaco tale vei au na vosa i Jiova, ka vaka: “Luve ni tamata, mo kaya vua na tui Taia,

² Sa kaya vakaoqo na Kalou ko Jiova: Ena vuku ni sa rui dokadoka na lomamu, o sa kaya kina, ‘Oi au e dua na kalou, Ka'u sa tiko ena nodra i tikotiko na kalou, e loma ni wasawasa,’ ia o tamata ga, o sega ni kalou, ia sa dina ni o sa okati iko mo vuku me vaka e dua na kalou,

³ o sa vuku cake vakaidina beka mai vei Taniela; sa sega ni dua na ka me ra vunia rawa vei iko;

⁴ ena nomu vuku kei na nomu yalomatua o sa binia kina na i yau levu me nomu, o sa kumuna vata na koula kei na siliva ena nomu vale ni yau;

⁵ ena levu ni nomu vuku vakadauveivoli, o a vakalevutaka kina na nomu i yau, ia sa viavialevu na lomamu ena vuku ni nomu i yau!

⁶ A sa kaya kina na Kalou ko Jiova, “O koya oqo, ni o sa nanuma e lomamu ni o sa vuku me vaka e dua na kalou,

⁷ au na kauti ira mai na kemu meca rerevaki me ra vorati iko. Era na vakacacana na veika talei kece o sa kilai kina mai na nomu vuku kei na kila vakacakacaka.

⁸ Era na biuti iko sobu ki na i keli ni rusa, o na mate me vakataki ira sa vakamatei e loma ni wasawasa.

⁹ O sa kaya tiko li, ‘Oi au e dua na kalou,’ e matadra ka ra vakamatei iko, ia sa dina ni o sa tamata ga, ka sega ni kalou, ena ligadra o ira era vuetaki iko?

¹⁰ O na mate me vaka na koli ena ligadra na kai tani era sa tawa cili. Sa i au ga, na Turaga ko Jiova, ka'u sa cavuta na i vakaro oqo.”

¹¹ A sa yaco tale mai vei au na vosa ni Kalou ko Jiova, ka vaka,

¹² “Luve ni tamata, mo osivaki koya na tui Taia, ka kaya vua, ‘Sa kaya vakaoqo na Kalou ko Jiova: Oi vakatakilakila ni ka e totoka vakaoti, ka sinai ena vuku. Ka uasivi vakaoti ena mata vinaka!

¹³ O a tiko mai Iteni, na nona i teitei na Kalou, ka daramaka na veimataqali vatu talei: na rupi kei na daimani; na topasa, na berili, na kaneliani, na jasipa; na safaia, na emeralita, kei na qarineti. Sa tiko talega vei iko na veiukuuku koula. Era sa vakarautaki ga me nomu ena siga o a buli kina.

¹⁴ Au a vakatikora e dua na jerupi mai keri me vakatawani iko. O a tiko ena noqu ulunivanua tabu ni ka lako voli ena kedra maliwa na veivatu makumakualiliva.

¹⁵ Sa dodonu sara o iko ena veisala o muria me vakatekivu mai na siga o a buli kina, me yacova ni sa kune na nomu caka cala.

¹⁶ Ena kena levu na nomu dau veivoli o sa vakasinaiti ena i tovo kaukauwa, ka o sai valavala ca; Ka'u sa viritaki iko kina me vaka e dua na ka sa beci ka vakasisilataki mai na ulunivanua ni Kalou, ka sa vakasavi iko tani na jerupi ka i vakatawa mai na loma ni vatu bukawaqa.

¹⁷ Sa dokadoka na lomamu ena vuku ni nomu mata vinaka; o sa vakacataka na nomu vuku me baleta na kemu totoka. Ka'u sa viritaki iko ki na qele; Ka'u na vakatusai iko e matadra na tui, me raici iko sara kina na matadra.

¹⁸ Ni sa levu sara na nomu caka cala, ena nomu cakacaka vakayalododonu ni nomu veivoli o sa vakacacana kina na nomu veivale tabu; ka'u sa vakayacora mai kina na bukawaqa vei kemuni; ka sa kani iko, ka'u sa vukici iko mo dravusa ena dela i vuravura e matadra kece era raici iko.

¹⁹ O ira kecega era kilai iko e matadra na tamata era sa domobulataki iko; o sa yacova mai e dua na i tinitini rerevaki ka o sa yali sara ka tawa mudu.’ ”

²⁰ A yaco vei au na vosa i Jiova, ka vaka:

²¹ Luve ni tamata, mo vaqara na matamu ki Saitoni, ka parofisaitaka na ca ena yaco kina, ka kaya,

²² sa kaya vakaoqo na Kalou ko Jiova: Raica, au sa veimecaki kei iko Saitoni, ka'u na vakaraitaka na noqu i ukuuku vei kemuni. Era na kila ni sai au ko Jiova, ni'u sa vakatauca vua na veilewa, ka vakamacalataka na noqu yalododonu vua.

²³ Ni'u sa na vakayacora vua na mate dauveitauvi, kei na dra me dave ena nona veigaunisala; ka ra na babale o ira na vakamatei vei ira, ka a veimecaki kaya na i seleiwau mai na veiyasana kecega. Era na qai kila ni sai au ko Jiova.

Ena Vakalougatataki o Isireli

²⁴ A sa kaya ko Jiova, “Ena sega tale ni dua na matanitu voleka ka ra dau vosabecitaki Isireli me na vakararawataki Isireli tale me vaka na soni dauveilau kei na wa vakavotona. Era na qai kila ni sai au na Kalou ko Jiova.”

²⁵ A kaya vakaoqo na Kalou ko Jiova, “Ena gauna ka'u na vakasoqoni ira lesu mai kina na Isireli mai na veimatanitu era sa dui tu kina, au na qai vakamacalataka na noqu yalododonu vei ira e matadra na veimatanitu. Era na qai laki tiko ena nodra vanua ka'u a solia vua na noqu tamata o Jekope.

²⁶ Era na tiko vakacegu e kea, ka ra na tara na nodra veivale ka tea na nodra loganivaini. Io, era na tiko vakacegu ga ena gauna ka'u na totogitaki ira kina era tiko vakavolivoliti ira ena vuku ni nodra dau vakalolomataki ira. Era na qai kila ni sai au ko Jiova na nodra Kalou.”