Isikeli 14 - Ai Vola Tabu Ena Vakavakadewa Vou

Sa Cudruva na Kalou na Qaravi kalou Matakau

¹ A qai lako mai vei au eso vei ira na qase ni Isireli, ka mai tiko e mataqu.

² A sa vosa vei au ko Jiova, ka kaya,

³ “Luve ni tamata, o ira na tamata oqo era sa dui vakaduria na nodra matakau ena lomadra, ka ra dui tauca e matadra na nodra caka cala era tarabe kina; me'u vakalaiva li me ra vakatarogi au o ira oqo?

⁴ O koya oqo mo kaya kina vei ira, ‘Sa kaya vakaoqo na Kalou ko Jiova: Na tamata yadua ni mataqali i Isireli sa vakaduria na nona matakau e lomana, ka sa tauca e matana na nona caka cala sa tarabe kina, ia me qai lako ga vua na parofita; oi au ko Jiova au na sauma vua sa levu na nona matakau;

⁵ me rawa ni'u taura na lomadra na mataqali i Isireli, o ira kecega ka ra yalo vakatani vei au ena vuku ni nodra matakau.’

⁶ O koya oqo, mo ni kaya kina vei ira na mataqali i Isireli, ‘Sa kaya vakaoqo o koya na Kalou ko Jiova: Ni veivutuni, biuta tani na nomuni matakau, ka vakanadakuya na nomuni veika vakasisila kecega’.

⁷ “O ira yadua na mataqali i Isireli, kei ira na kai tani era tiko mai Isireli, vei koya sa tawasei koya tani mai vei au, ka vakaduria na nona matakau e lomana, ka sa tauca kina e matana na nona caka cala me tarabe kina, ka qai lako vua na parofita me tarogi au vua; au sa na vosa ka sauma yani vua oi au ko Jiova;

⁸ ia ka'u na vakaukauwataka se vakacudrucudruya na mataqu vua na tamata o ya me sa ca, ka'u na cakava me dua o koya na i vakatakilakila kei na i bole, ka muduki koya tani mai vei ira na noqu tamata; ia o ni na kila ni sai au ko Jiova.

⁹ “Ia kevaka sa vakacalai na parofita, ni sa cavuta e dua na ka, sai au ko Jiova ka'u na vakacala na parofita o ya, ia ka'u na dodoka yani na ligaqu, ka vakarusai koya tani mai vei ira na noqu tamata na Isireli.

¹⁰ Era sa colata na i sau ni nodra dui caka cala - me rau tautauvata na nona cudruvi na parofita kei koya ka la'ki taro vua

¹¹ me kakua tale ni lako sese mai vei au na mataqali i Isireli, se me ra vakadukadukalitaki ira tale ena nodra talaidredre kecega; ia me ra yaco mada ga me ra noqu tamata, ka me'u yaco talega me'u nodra Kalou, sa kaya ko Jiova.”

¹² A yaco tale vei au na vosa i Jiova, ka vaka,

¹³ “Luve ni tamata, ni sai valavala ca vei au e dua na vanua ni sa talaidredre sara, ka'u na qai dodoka yani kina na ligaqu, ka muduka na kakana e bula kina, io, na madrai, ka vakavuna kina na viakana, ka muduka tani mai kina na tamata kei na manumanu.

¹⁴ Kevaka mada ga e ratou tiko kina na tamata tolutolu oqo, o Noa, o Taniela, kei Jope, e ratou sa dui vakabula ga na yalodratou ena nodratou yalododonu, sa kaya na Kalou ko Jiova.

¹⁵ “Kevaka ka'u sa lewa me lakova na vanua na manumanu ca, ka ra vakacacana, me lala, ka sega na tamata me lako rawa kina ena vuku ni manumanu; ia kevaka mada ga e ratou tiko kina na tamata tolutolu oqo,

¹⁶ me vaka na dina ni noqu bula, sa kaya na Kalou ko Jiova, e ratou na sega ni vakabula rawa na luvedratou tagane se na luvedratou yalewa; e ratou na vakabulai ga o iratou tolutolu; ia na vanua ena lala ga.

¹⁷ “Ia kevaka ka'u sa vakayacora ki na vanua na i seleiwau, ka kaya, Laiva na i seleiwau me lako voli yani ki na loma ni vanua; ka me'u muduka tani mai kina na tamata kei na manumanu;

¹⁸ ia kevaka mada ga e ratou tiko kina na tamata tolutolu oqo, me vaka na dina ni noqu bula, sa kaya na Kalou ko Jiova, e ratou na sega ni vakabula rawa na luvedratou tagane se na luvedratou yalewa; ia e ratou na vakabulai ga o iratou.

¹⁹ “Se kevaka ka'u na vakayacora ki na vanua na mate dauveitauvi, ka sovaraka kina na noqu cudru ena mate, me'u muduka tani kina na tamata kei na manumanu;

²⁰ ia kevaka mada ga e ratou tiko kina o Noa, o Taniela kei Jope, me vaka ga na dina ni noqu bula, sa kaya na luvedratou tagane se na luvedratou yalewa; ia ena vakabulai ira ga na nodra yalododonu.”

²¹ Ni sa kaya vakaoqo na Kalou ko Jiova, “Me na vakavica tale na noqu vakanakuitataki Jerusalemi ena va na i totogi ni veivakarusai ni noqu cudru, o ya na i seleiwau, na dausiga, na manumanu ca, kei na mate dauveitauvi, me'u muduka tani mai kina na tamata kei na manumanu!

²² Ia kevaka era i vovo ni bula, me ra kauti ira tani na gone tagane kei na goneyalewa, era na lako mai vei kemuni: ia mo ni raica na nodra i tovo kei na nodra i valavala; dou na qai vakacegui ena vuku ni ka ca ka'u sa kauta mai ki Jerusalemi kei na ka kece ka'u sa vakayacora kina.

²³ Era na vakacegui kemuni, ni o ni sa raica na nodra i tovo kei na i valavala; o ni na qai kila kina ni'u sa sega ni cakava wale na ka kece ka'u sa vakayacora kina,” sa kaya na Kalou ko Jiova.