Isikeli 1 - Ai Vola Tabu Ena Vakavakadewa Vou

Matai ni Raivotu i Isikeli me Baleta na Kalou ( 1.1—7.27 ) Na i Tikotiko Cecere Vakatui ni Kalou

¹ Ena i kalima ni siga ni i kava ni vula ena i katolusagavulu ni yabaki, ni'u a tiko kei ira na bobula mai na Uciwai o Kipa, a qai tadola na lomalagi, ka'u a raica na raivotu ni Kalou.

² Ena i kalima ni siga ni vula, sai koya na i kalima ni yabaki ni nona vakabobulataki o Jioiakini na tui.

³ A qai yaco sara mai na vosa ni Kalou vei Isikeli na bete, na luve i Pusi, ena nodra vanua na kai Kalidia mai na Uciwai o Kipa; a tiko vua mai kea na liga i Jiova.

⁴ Ia ni'u vakaraica voli, a sa uku mai e dua na vualiku kaukauwa kei na dua na o levu lumilumisa ramase ka tatibi veitarataravi mai kina na livaliva. Ia ena tikina e tatibi tiko kina na livaliva, e koto kina e dua na ka sa vaka na tatalivaliva ni parasa.

⁵ Ena loma ni uto ni cagi kaukauwa, sa vaka me rairai mai na veika bula e va. A vakaoqo na kedratou i rairai: e ratou rairai vakatamata,

⁶ sa tau yava na matadratou yadua, ka tau yava na tabadratou.

⁷ A sa dodonu vinaka na yavadratou kei na qeteqete ni yavadratou sa tautauvata kei na qeteqete ni yava ni luve ni bulumakau. Era sa taliva me vaka na parasa sa vakasavasavataki ka boroi vakavinaka.

⁸ Ena ruku ni tabadratou ena yasana vava, e koto kina na ligadratou vakatamata. E ratou sa dui vakamatana ka dui vakatabana o iratou na lewe va oqo.

⁹ A veiuturi na tabadratou, e ratou a sega ni veigoleyaki ka ratou lako vakadodonu ga yani.

¹⁰ Oqo na i tuvaki ni matadratou yadua na veika bula e va: na mata ni tamata mai liu, na mata ni laione ena yasana i matau, na mata ni bulumakau ki na i mawi, kei na mata ni ikeli mai muri.

¹¹ A vakatateba e cake e yarua na tabadratou ka veiuturi; ka yarua na tabadratou e ubia na yagodratou.

¹² E ratou vakanamata tu na veika bula ki na yasana vava ni matanicagi, ka rawa kina ni ratou lako vata ga ki na vanua cava ga e ratou via lako kina ka sega tale ni veigoleyaki.

¹³ Ena lomadonu ni kedratou veimama na veika bula, a caudre tiko kina e dua na bukawaqa a veitosoyaki tiko me vaka e dua na cina matanibuka ena kedratou maliwa; a ramase sara na bukawaqa ka tibi mai kina na livaliva.

¹⁴ E ratou a veiladeyaki vaka ka vaka na veika bula, me vaka na tibi ni liva.

¹⁵ Ena noqu vakaraica tiko na veika bula e va, au a raica e va na qiqi ni sa tau ena dela ni vanua, ka tau yadua ena dui yasadratou na ka bula.

¹⁶ Na i rairai kei na i cakacaka ni qiqi sa tautauvata kece sara; eratou sa taliva yadua me vaka na vatu talei, ka sa semati na veiqiqi yadua ki na dua tale na qiqi ena dua na kena i bulibuli

¹⁷ me vukea na toso ni qiqi ki na yasa ni vanua cava ga e via lako kina, ka sega ni veigoleyaki.

¹⁸ A sa robota na bati ni qiqi vava na yaloka ni mata.

¹⁹ Ena gauna e ratou toso kina na veika bula, e toso vata kei iratou talega e yasadratou na qiqi; ena gauna e ratou tubu cake kina mai dela ni qele na ka bula, e ratou tubu cake talega vakakina na qiqi.

²⁰ E ratou sa lako ga ki na vanua eratou via lako kina na veika bula, ka sa vakakina na qiqi, baleta ni sa lewai na i tosotoso ni qiqi mai vei iratou na ka bula.

²¹ Ni ratou sa lako na ka bula, e ratou sa lako talega na qiqi; ni ratou tu vakadua, e tu vakadua talega na qiqi; ni ratou sa cavutu mai dela ni vuravura, sa ia vakakina na qiqi; ni sa tiko ga ena qiqi na yalo sa tiko vei iratou na veika bula.

²² A sa cowiri baleta na uludratou na ka bula e dua na ka sa vaka na wasa iloilo sa makare sara me vaka na karisitala.

²³ E ratou sa tucake tu na ka bula ena ruku ni wasa iloilo, ka vakatetaba vakadodonu, ka dui veiqaravi; a sa tau yarua na taba ni veika bula yadua ka sa ubia na dui yagodratou.

²⁴ Ni ratou sa lako, au a rogoca na cacarobaroba ni tabadratou ni sa vaka na vadugu ni ua levu, a sa vaka na rorogo ni valu, ka vaka na domo i koya na Kalou Kaukauwa. Ni ratou sa vuka oti, e ratou sa qai biuta sobu na tabadratou,

²⁵ ia sa dua na rorogo sa rogo tikoga mai na dela ni wasa iloilo ka toka baleta na uludratou.

²⁶ Ena dela ni wasa iloilo ka toka e dela ni uludratou, a sa tiko kina e dua na ka sa vaka na i tikotiko vakaturaga, a kena i rairai sa vaka na vatu safaia, ka dabe toka kina e dua na i yaloyalo-ni-ka e vaka na i rairai ni tamata.

²⁷ Me tekivu mai na tolona ka kauta cake, au a raica kina e dua na ka sa vaka na qilaiso waqa, e dua na ka sa vaka na bukawaqa sa vakavolivolita; ia me tekivu mai na tolona ka kauta sobu ki ra, au a raica kina e dua na ka sa vaka na yameyame ni buka ka sa serau tu na veitikina.

²⁸ Me vaka na i rairai ni drodrolagi ena o ena siga ni uca, sa vakakina na rairai vinaka ni kena veitikina. A sa vakaoqo na ka e rawa ni vakatauvatani kina na i rairai ni lagilagi i Jiova. Sa vakaoqo na raivotu ni vakatakarakara ni ukuuku i Jiova. Ia ni'u sa raica na ka oqo, ka'u a qai cuva vakatoboicu ka rogoca na domona e dua sa vosa mai.